LUCAS 2

Ang Pagkatawo ni Jesus

(Mat. 1:18-25)

1Sa sadtong mga adlaw naghalin ang mando gikan kay Cesar Augusto nga ang bug-os nga kalibutan paglistahon. 2Ini among nahauna nga panglista nga ginhimo sang si Cirenio pangolo-puud sang Siria. 3Kag ang tanan nagkadto sa pagpalista, ang tagsatagsa sa iya banwa nga kaugalingon. 4Kag si Jose man nagtaklad gikan sa Galilea, halin sa banwa sang Nazaret, pa Judea, sa banwa ni David, nga ginatawag Betlehem, bangud nga sia sa kaliwatan kag sa panimalay ni David, 5sa pagpalista sang iya kaugalingon upud si Maria, nga katiayon niya, nga nagadala. 6Kag sang didto sila, natuman ang mga adlaw nga mag-anak sia. 7Kag nag-anak sia sang iya panganay nga lalaki kag ginputus niya sia sa mga lampin, kag ginkulan sia sa pasungan, bangud nga walay hulut sa ila sa balay nga dalayonan.

Ang mga Manugtunda kag ang mga Manugpahalab

8Kag may mga manugpahalab sang carnero sa among duta nga nagapakagab-i sa mga latagon, kag nagapulaw sa kagab-ihon sa ila panong. 9Kag ang manugtunda sang Ginoo nagpahayag sa ila, kag ang himaya sang Ginoo nagsilak sa palibut nila, kag hinadlukan sila sing tama. 10Kag ang manugtunda nagsiling sa ila, “Dili kamo mahadluk; kay yari karon, ginatunda ko sa inyo ang maayong balita sang dakung kalipay nga manginsa bug-os nga katawohan; 11kay natawo sa inyo karon nga adlaw sa banwa ni David ang Manluluwas, nga si Cristo nga Ginoo. 12Kag ini amo ang tanda sa inyo: makita ninyo ang bata nga naputus sa mga lampin kag nakulan sa pasungan.” 13Kag sa hinali may nagbuylog sa manugtunda nga isa ka kadam-an sang panong nga langitnon nga nagadayaw sa Dios kag nagasiling,

14“Himaya sa Dios sa kahitaasan,

kag paghidait sa duta sa tunga sang mga tawo nga iya nahamut-an!”

15Sang naghalin sa ila ang mga manugtunda pakadto sa langit, ang mga manugpahalab sang carnero nagsinilingay, “Makadto kita karon sa Betlehem kag tan-awon ta ining butang nga nahanabu, nga ginpahayag sang Ginoo sa aton.” 16Kag nagkadto sila sing dalidali, kag nakita nila si Maria kag si Jose, kag ang bata nga nakulan sa pasungan. 17Kag sang nakita nila ini ginpahibalo nila ang pinamolong sa ila nahanungud sining bata; 18kag ang tanan nga nakabati sini natingala sang ginpamolong sa ila sang mga manugpahalab sang carnero. 19Apang gintipigan ni Maria ining tanan nga polong, nga nagabinagbinag sini sa iya tagiposoon. 20Kag nagbalik ang mga manugpahalab sang carnero, nga nagahimaya kag nagadayaw sa Dios bangud sang tanan nga nabatian kag nakita nila, subong sang ginpamolong sa ila.

Si Jesus Ginahalad sa Templo

21Kag sang natapus ang walo ka adlaw, sang gincircuncidar#Lev. 12:3. sia ginhingalanan sia Jesus, ang ngalan nga ginhatag sa iya sang manugtunda#Luc. 1:31. sa wala pa sia mapanamkon sa tiyan.

22Kag sang natuman ang mga adlaw sang ila pagpaninlo sono sa kasogoan ni Moises, gindala nila ang bata sa Jerusalem nga ihalad sia sa Ginoo 23(sono sa nasulat sa kasogoan sang Ginoo, “Ang tagsa ka panganay nga lalaki tawgon nga balaan sa Ginoo”#Ex. 13:2, 12.) 24kag sa pagdolot sing halad sono sa nasiling sa kasogoan sang Ginoo, “duha ka tukmo, ukon duha ka kuyabog nga salampati.#Lev. 12:6-8.” 25Karon may tawo sa Jerusalem, nga ang iya ngalan si Simeon, kag ining tawo matarung kag mainampoon, nga nagahulat sang paglipay sang Israel, kag ang Espiritu Santo yara sa iya. 26Kag ginbugna sa iya sang Espiritu Santo nga indi sia makaagum sing kamatayon sa wala pa niya makita ang Cristo sang Ginoo. 27Kag gindaldal sia sang Espiritu pakadto sa templo; kag sang napasulud sang mga ginikanan ang bata nga si Jesus, agud nga mahimo nila nahanungud sa iya ang sono sa kinabatasan sang kasogoan, 28niyan ginbaton sia ni Simeon sa iya mga butkon kag gindayaw ang Dios kag nagsiling,

29“Ginoo, pataliwana karon sa paghidait ang imo ulipon,

sono sa imo polong;

30kay ang akon mga mata nakakita sang imo kaluwasan

31nga gin-aman mo sa atubangan sang tanan nga katawohan,

32isa ka kapawa nga bugna sa mga Gentil,#Isa. 42:6; 49:6.

kag himaya sa imo katawohan nga Israel.”

33Kag ang iya amay kag iloy natingala sang ginpamolong nahanungud sa iya; 34kag ginpakamaayo sila ni Simeon kag nagsiling kay Maria nga iloy niya,

“Yari karon, ining bata ginabutang nga kahigayonan sa pagkapukan kag pagbangon sang kadam-an sa Israel,

kag tanda nga suayon

35(kag isa ka espada magalapus sa imo kaugalingon nga kalag),

agud nga ang mga hunahuna sang madamung tagiposoon mapadayag.”

36Kag may manalagna nga babayi, si Ana, anak ni Fanuel, sa kabikahan ni Aser; sia tigulang na, nga nagpangabuhi kaupud sang iya bana sing pito ka tuig kutub sang iya pagkaulay, 37kag balo sia tubtub sa kawaloan kag apat ka tuig. Wala sia magbiya sa templo, nga nagasimba nga nagapuasa kag nagapangamuyo sa adlaw kag gab-i. 38Kag sang nagpalapit sa sadto gid nga takna nagpasalamat sia sa Dios, kag naghambal nahanungud sa bata sa tanan nga nagahulat sang pagtubus sang Jerusalem.

Ang Pagbalik sa Nazaret

(Mat. 2:19-23)

39Kag sang natuman nila ang tanan nga butang sono sa kasogoan sang Ginoo, nagpauli sila sa Galilea, sa ila kaugalingon nga banwa, Nazaret. 40Kag ang bata nagtubo kag nagbakud, nga napun-an sang kaalam; kag ang bugay sang Dios yara sa iya.

Ang Bata nga si Jesus sa Templo

41Karon ang iya mga ginikanan nagkadto tuigtuig sa Jerusalem sa piesta sang Pascua.#Ex. 12:1-27; Deut. 16:1-8. 42Kag sang napulog duha ka tuig sia, nagkadto sila sono sa kinabatasan sang piesta; 43kag sang natapus ang piesta, sang nagabalik sila, ang bata nga si Jesus nagpabilin sa Jerusalem. Ang iya ginikanan wala makahibalo sini, 44apang sang nagahunahuna nga yara sia sa kaupdanan naglakat sila sing isa ka adlaw nga lalakton, kag ginpangita nila sia sa ila kahimataan kag kilala; 45kag sang wala nila sia makita, nagbalik sila sa Jerusalem, nga nagapangita sa iya. 46Sa tapus ang tatlo ka adlaw nakita nila sia sa templo, nga nagalingkod sa tunga sang mga manunudlo, nga nagapamati sa ila kag nagapamangkot sa ila; 47kag ang tanan nga nakabati sa iya naorongan sa iya paghangup kag sa iya mga sabat. 48Kag sang nakita nila sia natingala sila; kag ang iya iloy nagsiling sa iya, “Anak, ngaa bala naghimo ka sa amon sing subong? Yari karon, ang imo amay kag ako nagpangita sa imo nga nagakasubu.” 49Kag nagsabat sia sa ila, “Ngaa bala nga nagpangita kamo sa akon? Wala bala kamo makahibalo nga kinahanglan nga yara ako sa balay sang akon Amay?” 50Kag wala sila makahangup sang polong nga ginhambal niya sa ila. 51Kag nagdolhog sia upud sa ila kag nag-abut sa Nazaret, kag nagmatinumanon sa ila; kag ang iya iloy nagtipig sini tanan nga butang sa iya tagiposoon.

52Kag si Jesus nagdugang sa kaalam kag sa kataason,#2:52 Ukon panuigon. kag nahamut-an sang Dios kag sang mga tawo.#1 Sam. 2:26; Hulu. 3:4.

Currently Selected:

LUCAS 2: ABHIL82

Highlight

Copy