LUCAS 17

Mga Pagsulay sa Pagpakasala

(Mat. 18:5-9, 21-22; Mar. 9:42-50)

1Kag nagsiling sia sa iya mga gintoton-an, “Indi mahimo kondi mag-abut gid ang mga kabangdanan sa kasandad; apang kailo sia nga paagi sa iya nagaabut sila! 2Maayo pa sa iya kon bitayan sa iya liog sing bato nga galingan kag itagbong sia sa dagat, sang sa magpasandad sia sang isa sining mga magamay. 3Andam kamo sa inyo kaugalingon; kon ang imo utud makasala, sabdonga sia, kag kon maghinulsul sia, patawara sia; 4kag kon makasala sia sa imo sing makapito sa isa ka adlaw, kag makapito magbalik sa imo, nga nagasiling, ‘Nagahinulsul ako,’ patawara sia.”

Dugangi ang Amon Pagtoo

5Ang mga pinadala nagsiling sa Ginoo, “Dugangi ang amon pagtoo!” 6Kag ang Ginoo nagsiling, “Kon kamo may pagtoo subong sang lamigas sang binhi nga mostaza, makasiling kamo sa sining sicamino, ‘Magabut ka, kag matanum ka sa dagat,’ kag magatuman ini sa inyo.

Ang Katungdanan sang Sologoon

7“Sin-o bala sa inyo, nga may ulipon nga nagaarado ukon nagabantay sang carnero, nga magasiling sa iya sang naka-abut sia gikan sa uma, ‘Kari ka sa gilayon kag maglingkod sa pagkaon’? 8Indi bala hinonoo magasiling sia sa iya, ‘Ihanda ang panihapon ko, kag mag-ilis ka kag mag-alagad sa akon, tubtub nga makakaon ako kag makainum; kag sa tapus sini magkaon ka kag mag-inum’? 9Nagapasalamat bala sia sa ulipon bangud nga naghimo sia sang ginsogo? 10Subong man kamo, sang nahimo ninyo ang tanan nga ginsogo sa inyo, magsiling kamo, ‘Mga ulipon kami nga walay pulus; ginhimo lamang namon ang amon katungdanan.’”

Napulo ka Aroon Ginaayo

11Sang nagapakadto sila sa Jerusalem nagaagi sia sa dulunan sang Samaria kag Galilea. 12Kag sang nagsulud sia sa isa ka minoro, may nagsugata sa iya nga napulo ka tawo nga aroon, nga nagtindug sa malayo 13kag gintib-ong nila ang ila mga tingug kag nagsiling, “Jesus, Magtotoon, kalooyi kami.” 14Sang nakita niya sila nagsiling sia sa ila, “Lakat kag ipakita ang inyo mga kaugalingon sa mga sacerdote.”#Lev. 14:1-32. Kag sang nagalakat sila nag-ayo sila. 15Niyan ang isa sa ila, sang nakita niya nga nag-ayo sia, nagbalik, nga nagahimaya sa Dios sa mabaskug nga tingug; 16kag naghapa sia sa tiilan ni Jesus, nga nagapasalamat sa iya. Karon sia Samariahanon. 17Niyan si Jesus nagsabat, “Indi bala ang napulo gin-ayo? Apang diin ang siam? 18Wala na gid bala sing nagbalik sa paghatag sing himaya sa Dios luwas sining dumoloong?” 19Kag nagsiling sia sa iya, “Tindug kag lakat ka; ang imo pagtoo nag-ayo sa imo.”

Ang Pag-abut sang Ginharian

20Sang ginpamangkot sia sang mga Fariseo kon san-o magaabut ang ginharian sang Dios, nagsabat sia sa ila, “Ang ginharian sang Dios wala nagaabut nga may mga tanda nga panilagan; 21kag indi sila magasiling, ‘Yari diri!’ ukon ‘Yadto didto!’ kay yar karon, ang ginharian sang Dios yara sa inyo.”

Subong sa Kaadlawan ni Noe kag ni Lot

(Mat. 24:23-28, 36-41; Mar. 13:21-23)

22Kag nagsiling sia sa mga gintoton-an, “Magaabut ang mga adlaw nga magahandum kamo sa pagtan-aw sa isa sang mga adlaw sang Anak sang tawo, kag indi ninyo makita ini. 23Kag magasiling sila sa inyo, ‘Yadto didto!’ ukon ‘Yari diri!’ Dili kamo maghalin, ukon magsonod sa ila. 24Kay subong sang kilat nga nagaidlab kag nagapasanag sang kahawaan kutub sa isa ka bahin tubtub sa isa, mangin-amo man ang Anak sang tawo sa iya adlaw. 25Apang dapat sia anay mag-antus sing madamung butang kag isikway sining kaliwatan. 26Subong sang nahanabu sa mga adlaw ni Noe,#Gen. 6:5-8. mangin-amo man sa mga adlaw sang Anak sang tawo. 27Nagkalaon sila, nag-ilinum sila, nagpangasawa sila, ginpabanhan sila, tubtub sa adlaw nga si Noe nagsulud sa arca, kag nag-abut ang anaw kag naglaglag sa ila tanan.#Gen. 7:6-24. 28Subong man sang nahanabu sa mga adlaw ni Lot#Gen. 18:20–19:25.—nagkalaon sila, nag-ilinum sila, nagpamakal sila, nagpamaligya sila, nagpananum sila, nagpatindug sila, 29apang sa adlaw nga naggowa si Lot sa Sodoma nag-ulan sing kalayo kag azufre gikan sa langit kag naglaglag sa ila tanan— 30mangin-amo man ini sa adlaw nga ipahayag ang Anak sang tawo. 31Sa sadtong adlaw, ang yara sa atop, kag ang iya mga galamiton sa sulud sang balay, dili magpanaug sa pagkuha sa ila; kag ang yara sa latagon man dili magpauli. 32Dumduma ang asawa ni Lot.#Gen. 19:26. 33Ang bisan sin-o nga magtinguha sa pag-agum sang iya kabuhi magadula sini, apang ang bisan sin-o nga magdula sang iya kabuhi magatipig sini.#Mat. 10:39; 16:25; Mar. 8:35; Luc. 9:24; Juan 12:25. 34Nagasiling ako sa inyo, sa sadtong gab-i may duha ka tawo sa isa ka higdaan; ang isa kuhaon kag ang isa bayaan. 35May duha ka babayi nga nagagaling sing tingub; ang isa kuhaon kag ang isa bayaan. 36[May duha ka tawo sa latagon; ang isa kuhaon, kag ang isa bayaan.]” 37Kag sila nagsabat sa iya, “Diin bala, Ginoo?” Nagsiling sia sa ila, “Kon diin ang lawas nga patay, didto man magtipon ang mga aguila.”

Currently Selected:

LUCAS 17: ABHIL82

Highlight

Copy