MGA PANALABITON 5
5
Pangamuyo nga Kalooyan
1Dumduma, O Ginoo, ang nag-abut sa amon;
toloka, kag tan-awa ang amon kahuluy-an!
2Ang amon panublion ginsaylo sa mga tagaluwas,
ang amon mga balay sa mga dumuloong.
3Mga ilo kami, wala sing amay;
ang amon mga iloy subong sang mga balo.
4Paagi sa cuarta gin-inum namon ang amon tubig,
ang amon kahoy ginabaligya sa amon.
5Ang amon mga manuglagas yari sa amon mga liog;
ginalapyo kami, wala kami sing pahuway.
6Gintugyan namon ang kamut sa mga Egiptohanon,
kag sa mga Asiriahanon, nga busgon sing kalan-on.
7Nagpakasala ang amon mga ginikanan, kag wala na;
kag gin-antus namon ang ila mga kalautan.
8Ang mga alagad nagagahum sa amon;
wala gid sing magaluwas sa amon sa ila kamut.
9Nagakuha kami sang amon kalan-on sa katalagman sang amon kabuhi,
bangud sa espada sang kamingawan.
10Ang amon panit maitum kaangay sang pugon
bangud sang nagadabdab nga kainit sang tiggulutum.
11Ginpanglugus nila ang mga babayi sa Sion,
ang mga ulay sa kabanwaanan sang Juda.
12Sa ila mga kamut ginbitay ang mga principe;
wala pagtahora ang mga nawung sang mga tigulang.
13Ang mga pamatan-on nga lalaki nagdala sang galingan;
kag ang kabataan nagadusmo sa idalum sang kahoy.
14Ang mga tigulang wala na sa gawang,
ang mga lalaki nga pamatan-on wala na sa ila lanton.
15Nag-untat ang kalipay sang amon tagiposoon;
ang amon sinaut nabaylo sa paglalaw.
16Naholog ang purungpurung gikan sa amon olo!
kailo kami, kay nakasala kami!
17Tungud sini ang amon tagiposoon napunaw,
tungud sini nga mga butang nagdulum ang amon mga mata,
18tungud sa Bukid sang Sion nga mamingaw;
ginalaktan ini sang mga ido nga talonon.
19Ikaw, O Ginoo, nagapabilin sa gihapon;
ang imo trono kutub sa kaliwatan tubtub sa kaliwatan.
20Ngaa bala nga nalipatan mo kami sa gihapon,
kag ginabayaan mo kami sa malawig nga tion?
21Pabalika kami sa imo, O Ginoo, kag mapabalik kami!
Bag-oha ang amon mga adlaw subong sang dumaan!
22Apang ginsikway mo bala kami sing bug-os?
Nasingkal gid bala ikaw sa amon?
Currently Selected:
MGA PANALABITON 5: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
