JOEL 3
3
Ang Paghukom sang Ginoo sa mga Pungsud
1“Kay yari karon, sa sadtong mga adlaw kag sa sadtong tion, kon pahaulian ko ang kabihagan sang Juda kag Jerusalem, 2tiponon ko ang tanan nga pungsud kag padulhogon sila sa nalupyakan ni Josafat, kag magahikot ako sing paghukom sa ila didto, tungud sa akon katawohan kag tungud sa akon panublion nga Israel, nga ginpaaplaag nila sa tunga sang mga pungsud, kag ginbahinbahin nila ang akon duta, 3kag ginpapalaran ang akon katawohan, kag ginbaylo ang bata nga lalaki sa isa ka makihilawason, kag ginbaligya ang bata nga babayi tungud sa alak, agud nga makainum sila.
4“Ano bala kamo sa akon, O Tiro kag Sidon,#Isa. 23:1-18; Ezeq. 26:1–28:26; Amos 1:9-10; Zac. 9:2-4; Mat. 11:21-22; Luc. 10:13-14. kag tanan nga ginsakpan sang Filistia?#Isa. 14:29-31; Jer. 47:1-7; Ezeq. 25:15-17; Amos 1:6-8; Sof. 2:4-7; Zac. 9:5-7. Hatagan bala ninyo ako sing tumbas? Kon tumbasan ninyo ako, sa madasig kag sa madali ibalik ko ang inyo tumbas sa inyo olo. 5Sanglit nakuha ninyo ang akon pilak kag ang akon bulawan, kag gindala sa inyo mga templo ang akon matahum nga bilidhon nga mga butang. 6Ginbaligya ninyo ang katawohan sang Juda kag sang Jerusalem sa mga Greciahanon, agud nga mapapalayo ninyo sila sa ila dulunan. 7Yari karon puhagon ko sila sa duug diin ginbaligya ninyo sila, kag ibalik ko ang inyo tumbas sa inyo olo. 8Ibaligya ko ang inyo mga anak nga lalaki kag ang inyo mga anak nga babayi sa kamut sang mga anak sang Juda, kag ibaligya sila sa mga tawo sang Saba, sa pungsud nga malayo; kay ang Ginoo nagpamolong sini.”
9Ibantala ninyo ini sa mga pungsud
Mag-aman sing inaway,
puhaga ang mga tawo nga gamhanan.
Papalapita ang mga tawo sang inaway,
pataklara sila.
10Salsala nga mga espada ang inyo mga punta sang arado,
kag mga bangkaw ang inyo mga inughagbas;#Isa. 2:4; Miq. 4:3.
magsiling ang maluya, “Mabakud ako.”
11Dalidali kamo kag magkari,
kamo tanan nga pungsud sa palibut,
tilipon kamo sing tingub.
O Ginoo, padulhoga didto ang imo mga gamhanan.
12Maghulag ang mga pungsud sang ila kaugalingon,
kag magtaklad sa nalupyakan ni Josafat;
kay didto magalingkod ako sa paghukom
sang tanan nga mga pungsud sa palibut.
13Igolo ninyo ang galab,
kay gulang na ang alanyon.#Bug. 14:14-16.
Kari, linas kamo,
kay ang ipitan puno.#Bug. 14:19-20; 19:15.
Nagaalawas ang mga kawa,
kay daku ang pagkamalaut nila.
14Mga kadam-an, mga kadam-an,
sa nalupyakan sang pagtapat!
Kay malapit na ang adlaw sa Ginoo
sa nalupyakan sang pagtapat.
15Ang adlaw kag ang bulan nagadulum,
kag ang kabitoonan nagauntat ang ila pagsilak.
Ang Pagluwas sang Juda
16Kag ang Ginoo magangurub gikan sa Sion,
kag magapatonog sang iya tingug gikan sa Jerusalem,#Amos 1:2.
kag ang mga langit kag ang duta magakurug.
Apang ang Ginoo mangindalangpan sa iya katawohan,
pamakud sa katawohan sang Israel.
17“Gani makilala ninyo nga Ako amo ang Ginoo nga inyo Dios,
nga nagapuyo sa Sion, nga akon bukid nga balaan.
Niyan manginbalaan ang Jerusalem
kag didto wala na sing mga dumoloong nga magaagi sa iya.
18“Kag sa sadtong adlaw
ang kabukiran magapatubud sing matam-is nga alak,
kag ang kabakoloran magapailig sing gatas,
kag ang tanan nga kasapaan sa Juda
magapailig sing mga tubig;
kag magagowa ang tuburan sa balay sang Ginoo
kag magabunyag sang nalupyakan sang Sitim.
19“Ang Egipto manginkamusmusan
kag ang Edom manginnamusmus nga kamingawan,
tungud sang panglugus nga nahimo sa mga anak sang Juda,
bangud nga nagpaagay sila sing dugo nga wala sing sala sa ila duta.
20Apang ang Juda magapabilin sa gihapon,
kag ang Jerusalem sa kaliwatan kag sa kaliwatan.
21Tinloan ko ang ila dugo, nga wala ko pa matinloi,
kay ang Ginoo nagapuyo sa Sion.”
Currently Selected:
JOEL 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
