JUAN 9

Si Jesus Nagaayo sang Tawo nga Bulag Kutub sa Pagkatawo

1Sang iya paglabay, nakita niya ang tawo nga bulag kutub sa pagkatawo. 2Kag ang iya mga gintoton-an nagpamangkot sa iya, “Rabbi, sin-o bala ang nakasala, ining tawo ukon ang iya mga ginikanan, nga natawo sia nga bulag?” 3Si Jesus nagsabat, “Ini nga tawo wala makasala, ukon ang iya mga ginikanan, kondi agud nga ang mga buhat sang Dios mapahayag sa iya. 4Kinahanglan kita magpangabudlay sa mga buluhaton sang nagpadala sa akon, sa adlaw pa; nagaabut ang gab-i, nga walay tawo nga makapangabudlay. 5Sa yari ako sa kalibutan, ako ang kapawa sa kalibutan.#Mat. 5:14; Juan 8:12.” 6Sang nakapamolong sia sini, nagdupla sia sa duta kag naghimo sing lunang sa dupla kag ginhamlitan niya sang lunang ang mga mata sang tawo, 7nga nagasiling sa iya, “Kadto, panghugas sa ponong sang Siloe” (kon sayoron Ginpadala). Gani nagkadto sia kag nanghugas kag nagbalik nga makakita. 8Ang mga kasilingan kag ang mga nakakita sa iya anay nga manugpakilimos sia, nagsiling, “Indi bala ini amo ang naglingkod kag nagpakilimos?” 9Ang iban nagsiling, “Amo sia”; ang iban nagsiling, “Indi, kondi sia kaangay sa iya.” Sia nagsiling, “Ako sia.” 10Nagsiling sila sa iya, “Niyan paano bala ang pagpamuklat sang imo mga mata?” 11Nagsabat sia, “Ang tawo nga ginatawag si Jesus naghimo sing lunang kag ginhamlitan niya ang akon mga mata kag nagsiling sa akon, ‘Kadto ka sa Siloe kag magpanghugas’; gani nagkadto ako kag nanghugas kag nakabaton ako sing itololok.” 12Nagsiling sila sa iya, “Diin sia bala?” Nagsiling sia, “Wala ako makahibalo.”

Ang mga Fariseo Nagapamangkot sa Tawong Gin-ayo

13Gindala nila sa mga Fariseo sia nga bulag anay. 14Karon adlaw nga inugpahuway sadto sang paghimo ni Jesus sang lunang kag pagpamuklat sang iya mga mata. 15Nagpamangkot liwat sa iya ang mga Fariseo kon paano nga nakabaton sia sang iya itololok, kag nagsiling sia sa ila, “Ginbutangan niya sing lunang ang akon mga mata, kag nanghugas ako, kag nakakita ako.” 16Ang iban sang mga Fariseo nagsiling, “Ining tawo indi nagikan sa Dios, bangud nga wala sia nagabantay sang adlaw nga inugpahuway.” Apang ang iban nagsiling, “Paano bala nga makahimo ang isa ka tawo nga makasasala sang kasubong nga mga tanda?” May pagbinahinbahin sa ila. 17Gani nagsiling sila liwat sa bulag, “Ano bala ang isiling mo nahanungud sa iya, sanglit ginpamuklat niya ang imo mga mata?” Nagsiling sia, “Manalagna sia.”

18Ang mga Judio wala magtoo nga sia anay bulag kag nakabaton sang itololok, tubtub nga gintawag nila ang mga ginikanan sang nakabaton sing itololok, 19kag nagpamangkot sa ila, “Amo bala ini ang inyo anak, nga ginasiling ninyo nga natawo nga bulag? Paano niyan nga sia karon makakita?” 20Ang iya mga ginikanan nagsabat, “Kami nakahibalo nga ini anak namon, kag nga natawo sia nga bulag; 21apang kon paano nga sia karon nakakita wala kami makahibalo, ukon sin-o ang nagpamuklat sang iya mga mata wala kami makahibalo. Pamangkota sia; sia may edad na, magahambal sia nahanungud sa iya kaugalingon.” 22Ini ginsiling sang iya mga ginikanan kay nahadluk sila sa mga Judio, kay ang mga Judio naghilisugut na nga kon may tawo nga magtu-ad nga sia Cristo, isikway sia sa sinagoga. 23Busa ang iya mga ginikanan nagsiling, “Sia may edad na, pamangkota sia.”

24Gani gintawag nila sa ikaduha ang tawo nga bulag sadto, kag nagsiling sa iya, “Maghatag ka sing himaya sa Dios; nakahibalo kami nga ining tawo makasasala.” 25Nagsabat sia, “Kon sia makasasala, wala ako makahibalo; isa ka butang ang nahibaloan ko, nga sadto bulag ako, karon makakita ako.” 26Nagsiling sila sa iya, “Ano bala ang ginhimo niya sa imo? Paano bala ang pagpamuklat niya sang imo mga mata?” 27Nagsabat sia sa ila, “Nasugid ko na sa inyo, kag wala kamo magpamati. Ngaa bala buut kamo mamati liwat? Buut bala kamo man mangin-gintoton-an niya?” 28Kag nagpasipala sila sa iya, nga nagasiling, “Ikaw gintoton-an niya, apang kami mga gintoton-an ni Moises. 29Nakahibalo kami nga ang Dios nagpakighambal kay Moises, apang nahanungud sining tawo, kami wala makahibalo kon tagadiin sia.” 30Ang tawo nagsabat, “Kalatingalahan ini! Wala ninyo mahibaloi kon tagadiin sia, apang sia nagpamuklat sang akon mga mata. 31Kita nakahibalo nga ang Dios wala nagapamati sa mga makasasala, apang kon ang bisan sin-o manugsimba sa Dios kag nagahimo sang iya kabubut-on, sia ginapamatian sang Dios. 32Kutub sa pagsugud sang kalibutan wala pa gid mabatii nga may isa nga nagpamuklat sang mga mata sang tawo nga natawo nga bulag. 33Kon ining tawo indi nagikan sa Dios, indi sia makahimo sing bisan ano.” 34Nagsabat sila sa iya, “Ikaw natawo sing bug-os sa sala, kag tudloan mo bala kami?” Kag ginsobol nila sia.

Ang Pagkabulag nga Espirituhanon

35Si Jesus nakabati nga nasobol nila sia, kag sang nakita niya sia nagsiling sia, “Nagatoo ka bala sa Anak sang Dios?” 36Nagsabat sia, “Kag sin-o bala sia, ginoo, agud nga magtoo ako sa iya?” 37Si Jesus nagsiling sa iya, “Nakita mo sia, kag amo sia ang nagapakighambal sa imo.” 38Nagsiling sia, “Ginoo, nagatoo ako”; kag nagsimba sia sa iya. 39Si Jesus nagsiling, “Ako nagkari sa sining kalibutan sa paghukom, agud nga ang mga indi makakita makakita, kag ang mga makakita manginbulag.” 40Ang mga Fariseo nga upud niya nakabati sini, kag nagsiling sa iya, “Bulag man bala kami?” 41Si Jesus nagsiling sa ila, “Kon kamo bulag, wala kamo kuntani sing sala; apang karon nga nagasiling kamo, ‘Makakita kami,’ ang inyo sala nagapabilin.

Currently Selected:

JUAN 9: ABHIL82

Highlight

Copy