JUAN 5

Ang Pag-ayo sa Ponong

1Sa tapus sini may piesta sang mga Judio, kag si Jesus nagkadto sa Jerusalem.

2Karon sa Jerusalem sa tupad sang gawang sang mga carnero may ponong, nga ginatawag sa Hebreo Betesda, nga may lima ka portico. 3Sa ila sini nagahamyang ang kadam-an sang mga masakiton, mga bulag, mga piang, mga paralitiko [nga nagahulat sang pagtublag sang tubig; 4kay ang isa ka manugtunda sang Ginoo nagkunsad sing tinion sa ponong, kag nagtublag sang tubig; ang bisan sin-o nga nahauna maglusung sa tapus matublag ang tubig nag-ayo sa bisan ano nga balatian niya.] 5May isa ka tawo didto, nga katloan kag walo na ka tuig sa iya masakit. 6Sang nakita sia ni Jesus nga nagahamyang kag nakahibalo nga madugay na sia sa sinang kahimtangan, nagsiling sia sa iya, “Buut ka bala mag-ayo?” 7Ang masakiton nga tawo nagsabat sa iya, “Ginoo, wala ako sing tawo nga magabutang sa akon sa ponong kon matublag ang tubig, kag sang nagapakadto ako ang isa nagalusung sing una sa akon.” 8Si Jesus nagsiling sa iya, “Tindug ka, dalha ang imo higdaan, kag maglakat.” 9Kag sa gilayon nag-ayo ang tawo, kag nagdala sang iya higdaan kag naglakat.

Karon adlaw nga inugpahuway yadto. 10Gani ang mga Judio nagsiling sa nag-ayo, “Adlaw karon nga inugpahuway, kag indi tugut sa imo ang pagdala sang imo higdaan.”#Neh. 13:19; Jer. 17:21. 11Apang nagsabat sia sa ila, “Ang nag-ayo sa akon nagsiling sa akon, ‘Dalha ang imo higdaan, kag maglakat.’” 12Ginpamangkot nila sia, “Sin-o bala ang tawo nga nagsiling sa imo, ‘Dalha ang imo higdaan, kag maglakat’?” 13Karon ang gin-ayo wala makahibalo kon sin-o yadto, kay si Jesus naghalin, bangud sang kadam-an sa duug. 14Sang olihi nakita sia ni Jesus sa templo, kag nagsiling sa iya, “Yari karon, ikaw nag-ayo! Dili ka na magpakasala, basi mahanabu sa imo ang malain pa nga butang.” 15Ang tawo naglakat kag nagsugid sa mga Judio nga si Jesus amo ang nag-ayo sa iya. 16Kag sa sining kabangdanan ang mga Judio naghingabut kay Jesus, bangud nga naghimo sia sini sa adlaw nga inugpahuway. 17Apang si Jesus nagsabat sa ila, “Ang akon Amay nagapangabudlay tubtub karon, kag nagapangabudlay ako.” 18Sa sining kabangdanan ang mga Judio nagtinguha sing labi pa gid sa pagpatay sa iya, bangud nga indi lamang nga ginlapas niya ang adlaw nga inugpahuway kondi man nga nagtawag sia sa Dios nga iya gid Amay, nga nagapakigtupung sia sa Dios.

Ang Pagbulut-an sang Anak

19Si Jesus nagsiling sa ila, “Sa pagkamatuud, sa pagkamatuud, nagasiling ako sa inyo, ang Anak indi makahimo sing bisan ano sa iya kaugalingon, kondi lamang ang nakita niya nga ginahimo sang Amay; kay ang bisan ano nga ginahimo niya, ini ginahimo man sang Anak sa amo nga bagay. 20Kay ang Amay nagahigugma sa Anak, kag nagapakita sa iya sang tanan nga iya ginahimo; kag dalagku pa sining mga buhat ipakita niya sa iya, agud nga kamo matingala. 21Kay subong nga ang Amay nagabangon sang mga minatay kag nagahatag sa ila sing kabuhi, sa amo nga bagay ang Anak man nagahatag sing kabuhi sa kay sin-o nga buut niya. 22Ang Amay wala nagahukom sa bisan kay sin-o nga tawo, kondi natugyan niya sa Anak ang bug-os nga paghukom, 23agud nga ang tanan magtahud sa Anak, subong sang pagtahud nila sa Amay. Ang wala nagatahud sa Anak wala nagatahud sa Amay nga nagpadala sa iya. 24Sa pagkamatuud, sa pagkamatuud, nagasiling ako sa inyo, ang nagapamati sang akon polong kag nagatoo sa nagpadala sa akon, may kabuhi nga walay katapusan; indi sia paghukman, kondi naglaton gikan sa kamatayon pa kabuhi.

25“Sa pagkamatuud, sa pagkamatuud, nagasiling ako sa inyo, ang takna magaabut, kag karon amo na, nga ang mga patay magapamati sang tingug sang Anak sang Dios, kag ang mga nagapamati magakabuhi. 26Kay subong nga ang Amay may kabuhi sa iya kaugalingon, sa amo nga bagay ginhatag niya sa Anak man nga may kabuhi sa iya kaugalingon, 27kag ginhatagan niya sia sing pagbulut-an sa paghukom, bangud nga sia Anak sang tawo. 28Dili kamo matingala sini; kay ang takna magaabut nga ang tanan nga yara sa mga lulubngan magapamati sang iya tingug 29kag magagowa, ang mga nakahimo sing maayo, sa pagkabanhaw nga sa kabuhi, kag ang mga nakahimo sing malaut, sa pagkabanhaw nga sa paghukom.#Dan. 12:2.

Mga Saksi nahanungud kay Jesus

30“Ako sa akon kaugalingon indi makahimo sing bisan ano; sono sa ginapamatian ko, nagahukom ako; kag ang akon paghukom matarung, bangud nga wala ako nagatinguha sang akon kaugalingon nga kabubut-on kondi sang kabubut-on sang nagpadala sa akon. 31Kon ako nagasaksi sa akon kaugalingon, ang akon panaksi indi matuud; 32may isa nga nagasaksi nahanungud sa akon, kag nahibaloan ko nga ang ginasaksi niya nahanungud sa akon matuud. 33Ginpasogoan ninyo si Juan, kag nagsaksi sia sa kamatooran.#Juan 1:19-27; 3:27-30. 34Ang panaksi nga akon ginabaton indi gikan sa tawo; walay sapayan nagasiling ako sini agud nga kamo maluwas. 35Sia amo ang suga nga nagadabdab kag nagasiga, kag naluyag kamo magkalipay sa malip-ot nga tion sa iya kapawa. 36Apang ang panaksi nga akon daku pa sang iya ni Juan; kay ang mga buluhaton nga ginhatag sa akon sang Amay nga tumanon, ang amo nga mga buluhaton nga akon ginahimo, nagasaksi nahanungud sa akon nga ang Amay nagpadala sa akon. 37Kag ang Amay nga nagpadala sa akon sia ang nagsaksi nahanungud sa akon.#Mat. 3:17; Mar. 1:11; Luc. 3:22. Kamo wala gid makabati sang iya tingug, ukon makakita sang iya bayhon; 38kag ang iya polong wala nagapadayon sa inyo, kay wala kamo magtoo sa ginpadala niya. 39Ginausisa ninyo ang mga kasulatan, bangud nga nagahunahuna kamo nga sa ila may kabuhi kamo nga walay katapusan; kag ini sila amo ang nagasaksi nahanungud sa akon; 40apang indi kamo buut magkari sa akon agud nga may kabuhi kamo. 41Wala ako nagabaton sang himaya gikan sa mga tawo. 42Apang nakilala ko kamo nga wala kamo sang gugma sang Dios sa inyo kaugalingon. 43Ako nagkari sa ngalan sang akon Amay, kag wala kamo nagabaton sa akon; kon iban ang magkari sa iya kaugalingon nga ngalan, sia batonon ninyo. 44Paano bala nga makatoo kamo, nga nagabaton sing himaya sa isa kag isa kag ang himaya nga nagagikan sa isa lamang nga Dios wala ninyo ginapangita? 45Dili kamo maghunahuna nga ako magasumbung sa inyo sa Amay; may isa nga nagasumbung sa inyo, si Moises, nga ginalauman ninyo. 46Kay kon nagtoo kamo kay Moises, magatoo kamo sa akon, kay nagsulat sia nahanungud sa akon. 47Apang kon kamo wala nagatoo sa iya mga sinulat, paano bala ang patoo ninyo sa akon mga polong?”

Currently Selected:

JUAN 5: ABHIL82

Highlight

Copy