JUAN 11

Ang Pagkapatay ni Lazaro

1Karon may tawo nga nagmasakit, si Lazaro sa Betania, sa minoro ni Maria kag sang iya utud nga si Marta.#Luc. 10:38-39. 2Amo yadtong Maria nga naghaplas sa Ginoo sing ihalaplas kag nagpahid sang iya mga tiil sang iya bohok,#Juan 12:3. nga ang iya utud si Lazaro nagmasakit. 3Gani ang mga utud nga babayi nagpasogo sa iya, nga nagasiling, “Ginoo, ang imo ginahigugma nagamasakit.” 4Apang sang pagkabati ni Jesus sini nagsiling sia, “Ining masakit indi ikamatay; kondi ini tungud sa himaya sang Dios, agud nga ang Anak sang Dios mahimaya paagi sini.”

5Karon ginhigugma ni Jesus si Marta kag ang iya utud nga babayi kag si Lazaro. 6Gani sang pagkabati niya nga sia nagmasakit, nagpabilin sia sing duha pa ka adlaw sa duug diin sia. 7Niyan sa tapus sini nagsiling sia sa mga gintoton-an, “Makadto kita liwat sa Judea.” 8Ang mga gintoton-an nagsiling sa iya, “Rabbi, bag-o pa lamang ang mga Judio magtinguha sa pagbato sa imo, kag makadto ka liwat didto?” 9Si Jesus nagsabat, “Indi bala napulog duha ka takna sa isa ka adlaw? Kon ang tawo nagalakat sa adlaw, wala sia nagakasandad, bangud nga makakita sia sang kapawa sining kalibutan. 10Apang kon ang tawo nagalakat sa kagab-ihon, nagakasandad sia, bangud nga ang kapawa wala sa iya.” 11Ini ginpamolong niya, kag niyan nagsiling sia sa ila, “Ang aton abyan nga si Lazaro natologan, apang makadto ako agud nga mapukaw sia sa katologon.” 12Ang mga gintoton-an nagsiling sa iya, “Ginoo, kon sia natologan, maumpawan sia.” 13Karon si Jesus naghambal sang iya kamatayon, apang sila naghunahuna nga naghambal sia sang pagpahuway sa katologon. 14Niyan si Jesus nagsiling sa ila sing maathag, “Si Lazaro napatay; 15kag nagakalipay ako bangud sa inyo nga wala ako didto, sa katuyoan nga magtoo kamo. Apang makadto kita sa iya.” 16Si Tomas, nga ginatawag Didimo, nagsiling sa iya mga masigkagintoton-an, “Makadto man kita, agud nga mangin-matay kita upud sa iya.”

Ang Pagkabanhaw kag ang Kabuhi

17Karon sang pag-abut ni Jesus, nakita niya nga si Lazaro apat na ka adlaw sa lulubngan. 18Ang Betania malapit sa Jerusalem, mga tatlo ka kilometro kalayo, 19kag madamu sang Judio ang nagkadto sa paglipay kay Marta kag kay Maria nahanungud sa ila utud. 20Sang pagkabati ni Marta nga si Jesus nagapakari, nagkadto sia sa pagsugata sa iya, apang si Maria naglingkod pa sa balay. 21Si Marta nagsiling kay Jesus, “Ginoo, kon yari ka, wala kuntani mapatay ang akon utud. 22Kag bisan karon nakahibalo ako nga bisan ano ang pangayoon mo sa Dios, ihatag sang Dios sa imo.” 23Si Jesus nagsiling sa iya, “Ang imo utud mabanhaw.” 24Si Marta nagsiling sa iya, “Nakahibalo ako nga mabanhaw sia sa pagkabanhaw sa katapusan nga adlaw.” 25Si Jesus nagsiling sa iya, “Ako ang pagkabanhaw kag ang kabuhi; ang nagatoo sa akon, bisan mapatay sia, apang magakabuhi, 26kag ang bisan sin-o nga nagakabuhi kag nagatoo sa akon indi na gid mapatay. Nagatoo ka bala sini?” 27Nagsiling sia sa iya, “Hoo, Ginoo; nagatoo ako nga ikaw ang Cristo, ang Anak sang Dios, sia nga nagakari sa kalibutan.”

Si Jesus Nagahibi bangud sa Pagkapatay ni Lazaro

28Sang nakasiling sia sini, naglakat sia kag gintawag si Maria nga iya utud, nga nagasiling sing mahinay, “Ang Manunudlo yari diri kag nagatawag sa imo.” 29Kag sang pagkabati niya, nagtindug sia sing dalidali kag nagkadto sa iya. 30Karon si Jesus wala pa makasulud sa minoro, kondi didto pa sa duug diin nasugata sia ni Marta. 31Ang mga Judio nga kaupud niya sa balay, nga nagalipay sa iya, sang nakita nila si Maria nga nagtindug sing dalidali kag naggowa nagsonod sa iya, nga nagahunahuna nga makadto sia sa lulubngan sa paghaya didto. 32Niyan si Maria, sang pag-abut niya diin si Jesus kag nakita sia, nagyaub sa iya tiilan, nga nagasiling sa iya, “Ginoo, kon yari ka, wala kuntani mapatay ang akon utud.” 33Sang nakita ni Jesus sia nga nagahaya, kag ang mga Judio nga nag-upud sa iya nga nagahaya man, natandug sia sing tuduk sa espiritu kag nalisang; 34kag sia nagsiling, “Diin ninyo nabutang sia?” Nagsabat sila sa iya, “Ginoo, kari kag tan-awa.” 35Si Jesus naghibi. 36Gani ang mga Judio nagsiling, “Tan-awa daw ano ang paghigugma niya sa iya!” 37Apang ang iban sa ila nagsiling, “Indi bala sia nga nagpamuklat sang mga mata sang bulag makabuut nga ining tawo dimapatay?”

Si Lazaro Ginabanhaw

38Niyan si Jesus, nga natandug liwat sing tuduk, nagkadto sa lulubngan; ini isa ka lungib, kag ang isa ka bato nagtakup sini. 39Si Jesus nagsiling, “Kuhaa ninyo ang bato.” Si Marta, nga utud sang napatay, nagsiling sa iya, “Ginoo, sa sining tion mabaho na sia, kay apat na sia ka adlaw nga napatay.” 40Si Jesus nagsiling sa iya, “Wala bala ako magsiling sa imo nga kon magtoo ka makakita ka sang himaya sang Dios?” 41Gani ginkuha nila ang bato. Kag si Jesus nagbayaw sang iya mga mata kag nagsiling, “Amay, nagapasalamat ako sa imo nga ginpamatian mo ako. 42Nakahibalo ako nga ginapamatian mo ako sa gihapon, apang bangud sang katawohan nga nagatindug sa palibut ginsiling ko ini, agud nga magtoo sila nga ginpadala mo ako.” 43Sang nakapamolong sia sini, nagsinggit sia sa mabaskug nga tingug, “Lazaro, gowa ka.” 44Ang tawong patay naggowa, nga nasamburan sa mga kamut kag mga tiil sang mga isalambud nga sa lubung, kag ang iya nawung naputus sing panyo. Si Jesus nagsiling sa ila, “Hubari sia, kag palakta.”

Ang Himbon batok kay Jesus

(Mat. 26:1-5; Mar. 14:1-2; Luc. 22:1-2)

45Busa ang madamu sang mga Judio nga nagkadto upud kay Maria kag nakakita sang ginhimo niya, nagtoo sa iya; 46apang ang iban sa ila nagkadto sa mga Fariseo kag nagsugid sa ila sang nahimo ni Jesus. 47Gani ang puno nga mga sacerdote kag ang mga Fariseo nagtawag sang corte, kag nagsiling, “Ano bala ang aton himoon? Kay ining tawo nagahimo sing madamung tanda. 48Kon aton pabayaan sia, ang tanan magatoo sa iya, kag ang mga Romanhon magakari kag magalaglag sang aton duug kag aton pungsud.” 49Apang ang isa sa ila, si Caifas, nga pinakamataas nga sacerdote sadtong tuig, nagsiling sa ila, “Wala gid kamo sing nahibal-an; 50wala kamo makahangup nga sa kaayohan ninyo dapat mapatay ang isa ka tawo tungud sa katawohan, kag nga indi mawala ang bug-os nga pungsud.” 51Ini wala niya ginsiling sing kinaugalingon, apang kay pinakamataas nga sacerdote sia sadtong tuig gintagna niya nga si Jesus mapatay tungud sa pungsud, 52kag indi tungud sa pungsud lamang, kondi agud nga iya man matipon sa isa ang mga anak sang Dios nga naaplaag. 53Gani kutub sadtong adlaw nagsinapul sila kon paano ang pagpatay nila sa iya.

54Busa si Jesus wala na maglagaw sing dayag sa tunga sang mga Judio, kondi naghalin sia pakadto sa duta nga malapit sa kamingawan, sa banwa nga gintawag Efraim; kag didto nagpabilin sia upud sang iya mga gintoton-an.

55Karon ang Pascua sang mga Judio malapit na, kag madamu ang nagtaklad gikan sa kaumhan pa Jerusalem sa wala pa ang Pascua, sa pagpaninlo sang ila kaugalingon. 56Nagpangita sila kay Jesus kag nagsinilingay sang nagatindug sila sa templo, “Ano bala sa hunahuna ninyo? Nga indi sia magkari sa piesta?” 57Karon ang puno nga mga sacerdote kag ang mga Fariseo nagsogo nga kon may tawo nga makahibalo kon diin sia, magpahibalo sia sa ila, agud nga madakup nila si Jesus.

Currently Selected:

JUAN 11: ABHIL82

Highlight

Copy