JEREMIAS 50
50
Mga Tagna nahanungud sa Babilonia
1Ang polong nga ginpamolong sang Ginoo nahanungud sa Babilonia,#Isa. 1:13–14:23; 47:1-15. nahanungud sa duta sang mga Caldeanhon, paagi kay Jeremias nga manalagna:
2“Ipahayag ninyo sa tunga sang mga pungsud kag ibantala,
magbayaw sing hayahay kag ibantala,
dili pagtagoon, kondi isiling:
‘Nakuha ang Babilonia,
ginpakahuy-an si Bel,
naguba si Merodac.
Ginpakahuy-an ang iya mga larawan,
ang iya mga diosdios naguba.’
3“Kay nagtaklad batok sa iya ang pungsud gikan sa aminhan, nga magapamingaw sang iya duta, kag wala na sing magapuyo sa iya; nagpalagyo sila kag wala na sila tingub ang tawo kag sapat.
4“Sa sadto nga mga adlaw kag sa sadto nga tion, nagasiling ang Ginoo, magaabut ang katawohan sang Israel kag ang katawohan sang Juda sing tingub, nga nagahibi sa nagalakat sila sa ila dalanon; kag magapangita sila sa Ginoo nga ila Dios. 5Magapamangkot sila nahanungud sang Sion, nga natuhoy didto ang ila mga nawung, nga nagasiling, “Kari kamo, kag magsimpon kamo sa Ginoo sa katipan nga dayon nga indi malimtan.’
6“Ang akon katawohan nadula nga mga carnero; ang ila mga manugpahalab nagpatalang sa ila; ginbuhian nila sila sa kabukiran; naglakat sila sa bukid pa bakolod, nalimtan nila ang ila duug nga palahuwayan. 7Ang tanan nga nakakita sa ila naglamon sa ila, kag nagsiling ang ila mga kasumpung, ‘Indi kami malinapason, bangud nga nagpakasala sila batok sa Ginoo, ang puluy-an sang pagkamatarung, ang Ginoo, ang paglaum sang ila mga ginikanan.’
8“Palagyo kamo gikan sa tunga sang Babilonia,#Bug. 18:4. kag gowa kamo sa duta sang mga Caldeanhon, kag manginsubong sang mga kanding nga lalaki sa atubangan sang mga panong. 9Kay yari karon, pukawon ko kag pakarion batok sa Babilonia ang isa ka hut-ong sang dalagku nga mga pungsud, gikan sa duta nga naaminhan; kag magapaagisud sila sa inaway batok sa iya; gikan didto kuhaon sia. Ang ila mga baslay manginsubong sang ila sang gamhanan nga tawo nga sampaton nga wala gid sing magabalik sa wala sing pulus. 10Ang Caldea mangin-inagaw; ang tanan nga nagaagaw sa iya mabusug, nagasiling ang Ginoo.
11“Bangud nga masadya kamo, bangud nga nagakalipay kamo,
O kamo nga nagaati sang akon panublion,
bangud nga nagauyag ka subong sang bakiya nga nagalinas sang uyas,
kag nagahirihiri subong sang makusug nga kabayo,
12ang inyo iloy pakahuy-an sing bug-os,
ang nag-anak sa inyo malibogan.
Yari karon, sia mangin-olihi gid sang mga pungsud,
isa ka kamingawan nga mamala kag desierto.
13Bangud sang kasingkal sang Ginoo indi sia pagpuy-an,
kondi magamingaw sia sing bug-os;
ang tagsatagsa man nga magaagi sa Babilonia mabulong,
kag magapanagutsut sa tanan niya nga kalalat-an.
14Pahamtang kamo sing paagisud batok sa Babilonia sa palibut,
tanan kamo nga nagabingat sang pana;
panaa sia, dili maghawid sing mga baslay,
kay nakasala sia batok sa Ginoo.
15Magsinggit batok sa iya sa palibut,
nagpasakup sia;
nagakapukan ang iya mga pamakud,
nagakawasak ang iya mga kuta.
Kay pagtimalus ini sang Ginoo:
timalusi sia,
himoa sa iya subong sang ginhimo niya.
16Utda sa Babilonia ang manugsab-ug,
kag ang nagakaput sang galab sa tion sang ani;
sa kahadluk sang espada nga nagapigus,
ang tagsatagsa magbalik sa iya katawohan,
kag ang tagsatagsa magpalagyo sa iya kaugalingon nga duta.
17“Ang Israel ginaayam nga carnero nga natabog sang mga leon. Sa nahauna ginlamon sia sang hari sang Asiria, kag karon sa katapusan si Nabucodonosor nga hari sang Babilonia nagboong sang iya mga tul-an. 18Busa, amo ini ang ginasiling sang Ginoo sang mga kasoldadosan, ang Dios sang Israel: Yari karon, silotan ko ang hari sang Babilonia kag ang iya duta, subong nga ginsilotan ko ang hari sang Asiria. 19Ibalik ko ang Israel sa iya halalban, kag magahalab sia sa Carmelo kag Basan, kag mabusug ang iya kalag sa kabakoloran sang Efraim kag sa Galaad. 20Sa sadto nga mga adlaw kag sa sadto nga tion, nagasiling ang Ginoo, ang kalautan sang Israel pangitaon, kag wala na; kag ang mga sala sang Juda, kag indi sila makita; kay patawaron ko ang akon mga ginabilin nga salin.
21“Taklad ka batok sa duta sang Merataim, bisan batok sini,
kag batok sa mga pumuluyo sang Pekod.
Patya kag laglaga sing bug-os sa olihi nila,
nagasiling ang Ginoo,
kag himoa sono sa tanan nga akon ginsogo sa imo.
22Ang kagahud sang inaway yara sa duta,
kag sang daku nga kalaglagan!
23Daw ano nga nabali kag napihak
ang palo sang bug-os nga duta!
Daw ano nga nanginmamingaw ang Babilonia
sa tunga sang mga pungsud!
24Ginsid-an ko ikaw kag nadakup ka man, O Babilonia,
kag wala ka makapangaman;
nakita ka kag nadakup man,
bangud nga nagpakigsuay ka sa Ginoo.
25Ginbuksan sang Ginoo ang iya bulutangan sang hinganiban,
kag nagpagowa sang mga hinganiban sang iya kaalipungut,
kay ang Ginoong Dios sang mga kasoldadosan may buluhaton nga himoon
sa duta sang mga Caldeanhon.
26Kari kamo batok sa iya kutub sa malayo gid nga dulunan;
buksi ang iya mga damisag;
tumpoka sia subong sa tumpi, kag laglaga sia sing bug-os;
dili pagbilini ang bisan ano niya.
27Ihawa ang tanan niya nga tinday nga baka nga lalaki,
padulhoga sila sa ihawan.
Kailo sila, kay nag-abut ang ila mga adlaw,
ang tion sang pagsilot sa ila.
28“Ang tingug sang mga nagapalagyo kag nagalikaw gikan sa duta sang Babilonia, sa pagpahayag sa Sion sang pagtimalus sang Ginoo nga aton Dios, sang pagtimalus sang iya templo.
29“Tawga sing tingub batok sa Babilonia ang mga manugpana, ang tanan nga nagabingat sang pana. Pahamtang ka sing dologan batok sa iya sa palibut; dili pagpalikawon ang bisan sin-o sa iya. Tumbasi sia sono sa iya binuhatan,#Bug. 18:6. himoa sa iya sono sa tanan nga nahimo niya; kay nanginbugalon sia batok sa Ginoo, batok sa Balaan sang Israel. 30Busa ang iya mga pamatan-on nga lalaki mapukan sa iya mga dalan, kag ang tanan niya nga mga tawo sa inaway pahipuson sa sadto nga adlaw, nagasiling ang Ginoo.
31“Yari karon, ako batok sa imo, O ikaw nga bugalon,
nagasiling ang Ginoong Dios sang mga kasoldadosan;
kay nag-abut na ang imo adlaw,
ang tion nga silotan ko ikaw.
32Ang bugalon makasandad kag mapukan,
nga wala gid sing magapatindug sa iya,
kag magapadabdab ako sing kalayo sa iya kabanwaanan,
kag magalamon sang tanan sa palibut niya.
33“Amo ini ang ginasiling sang Ginoo sang mga kasoldadosan: Ang katawohan sang Israel kag ang katawohan sang Juda ginpigus sing tingub; ang tanan nga nagbihag sa ila nagpugung sa ila sing malig-on, nagdumili sila nga buhian sila. 34Ang ila Manunubus makusug; ang Ginoo sang mga kasoldadosan amo ang iya ngalan. Magaapin sia sing bug-os sang kasaba nila, agud nga makahatag sia sing pahuway sa duta, apang matublag ang mga pumuluyo sa Babilonia.
35“Ang espada yara sa mga Caldeanhon, nagasiling ang Ginoo,
kag sa mga pumuluyo sang Babilonia,
kag sa iya mga principe kag sa iya mga mangin-alamon!
36Ang espada yara sa mga hagakan,
kag manginbuangbuang sila!
Ang espada yara sa iya mga tawo nga gamhanan,
kag mahangawa sila!
37Ang espada yara sa ila mga kabayo kag sa ila mga kangga,
kag sa bug-os nga katawohan nga nagsalakut nga yara sa tunga niya,
kag manginsubong sila sang mga babayi!
Ang espada yara sa iya mga bahandi,
kag kawaton sila!
38Ang kamala yara sa iya mga tubig, kag magamala sila!
Kay duta ini sang mga larawan nga tinigban,
kag nagasalimuang sila sa mga diosdios.
39“Busa didto magapuyo ang mga sapat nga talonon sang mga desierto upud ang mga lobo,#Bug. 18:2. kag magapuyo didto ang mga avestruz; indi na ini pagpuy-an sing dayon, kag indi na pagpuy-an gikan sa kaliwatan pa kaliwatan. 40Subong sang pagguba sang Dios sang Sodoma kag Gomorra kag sang ila kasilingan nga kabanwaanan,#Gen. 19:24-25. nagasiling ang Ginoo, gani walay tawo nga magapuyo didto, kag walay anak sang tawo nga magapanlugayaw didto.
41“Yari karon, nagaabut ang isa ka katawohan gikan sa aminhan;
ang dakung pungsud kag madamung hari
pukawon gikan sa naukbung gid nga mga bahin sang duta.
42Nagakaput sila sa pana kag bangkaw;
mapintas sila, kag walay kalooy.
Ang ila tingug nagadaguhub kaangay sang dagat;
nagasakay sila sa mga kabayo,
nga ang tagsatagsa nagapaagisud subong sang tawo sa inaway
batok sa imo, O babaying anak sang Babilonia!
43“Ang hari sang Babilonia nakabati sang mga balita nahanungud sa ila,
kag nagluya ang iya mga kamut;
ang kagha nagdakup sa iya,
ang mga kasakit subong sang babaying ginasakitan.
44“Yari karon, kaangay sang leon nga nagatakas gikan sa habok sang Jordan batok sa mabakud nga puluy-an, sa hinali padalaganon ko sila gikan didto; kag ang mapilian itangdo ko sa ibabaw sini. Kay sin-o bala ang kaangay sa akon? Sin-o bala ang magatangdo sa akon sing tion man? Sin-o bala ang manugpahalab nga makatindug sa akon atubangan? 45Busa pamatii ninyo ang laygay sang Ginoo nga ginhimo niya batok sa Babilonia, kag ang iya mga katuyoan nga gintuyo niya batok sa duta sang mga Caldeanhon: Sa pagkamatuud sagnuyon ang mga magamay sang ila panong; sa pagkamatuud pamingawon ang ila mga puluy-an sa ila. 46Sa kagahud sang pag-agaw sang Babilonia ang duta nagakurug, kag ang singgit mabatian sa mga pungsud.”
Currently Selected:
JEREMIAS 50: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
