JEREMIAS 19
19
Ang Tanda nga Boong nga Suludlan sang Maninihon
1Amo ini ang ginsiling sang Ginoo, “Lakat, bakal sing duta nga tibud sang maninihon, kag dala sang mga tigulang sang katawohan kag sang mga tigulang sang mga sacerdote, 2kag maggowa pakadto sa nalupyakan sang anak ni Hinom#2 Hari 23:10; Jer. 7:30-32; 32:34-35. nga yara sa salamputan sang Gawang nga Harsit, kag ibantala didto ang mga polong nga akon isugid sa imo. 3Isiling mo, ‘Pamatii ninyo ang polong sang Ginoo, O mga hari sang Juda kag mga pumuluyo sang Jerusalem. Amo ini ang ginasiling sang Ginoo sang mga kasoldadosan, ang Dios sang Israel, Yari karon, dalhon ko ang malaut sa sining duug nga ang bisan sin-o nga makabati ang iya mga dulunggan tinglan. 4Bangud nga ginbayaan nila ako, kag ginpasipalahan ining duug sa pagsonog sing incienso sa sini sa iban nga mga dios nga wala nila makilala sila kag ang ila mga ginikanan kag ang mga hari sang Juda; kag nagpuno sining duug sang dugo sang mga walay sala, 5kag nagpatindug sing mataas nga duug kay Baal sa pagsonog sa kalayo sang ila mga anak nga lalaki nga mga halad-nga-sinonog kay Baal,#Lev. 18:21. nga wala ko pag-isogo ukon pag-ihambal ini, ukon nag-abut ini sa akon painoino; 6busa, yari karon, nagaabut ang mga adlaw, nagasiling ang Ginoo, nga ining duug indi na pagtawgon nga Topet, ukon ang Nalupyakan sang anak ni Hinom, kondi ang Nalupyakan sang Palatyan. 7Kag ipakawalay pulus ko ang laygay sang Juda kag sang Jerusalem sa sining duug, kag ipapukan ko sila sa espada sa atubangan sang ila mga kaaway, kag sa kamut sang mga nagatinguha sang ila mga kabuhi. Ihatag ko ang ila mga bangkay nga kalan-on sa kapispisan sang mga langit kag sa kasapatan sang duta. 8Kag himoon ko ini nga banwa nga kabulungan, kag panagutsutan; ang tagsatagsa nga nagaagi sa iya mabulung kag managutsut bangud sang tanan niyang mga kalalat-an. 9Kag ipakaon ko sa ila ang unud sang ila mga anak nga lalaki kag ang unud sang ila mga anak nga babayi, kag sila magakaon ang tagsatagsa sang unud sang iya isigkatawo sa pagkibon kag sa kalisdanan, nga ipakalisud sa ila sang ila mga kaaway kag sang mga nagatinguha sang ila kabuhi.’
10“Niyan boongon mo ang tibud sa itololok sang mga tawo nga nagaupud sa imo, 11kag magsiling sa ila, ‘Amo ini ang ginasiling sang Ginoo sang mga kasoldadosan: Sa amo gid boongon ko ining katawohan kag ining banwa, subong sang isa nga nagaboong sang suludlan sang maninihon, nga indi na mauli nga bilog. Ang mga tawo magalubung sa Topet bangud nga walay iban nga duug nga malubngan. 12Amo ini ang himoon ko sa sining duug, nagasiling ang Ginoo, kag sa iya pumuluyo, sa paghimo sini nga banwa subong sang Topet. 13Ang mga balay sang Jerusalem kag ang mga balay sang mga hari sang Juda nga nadagtaan manginsubong sang duug sang Topet—ang tanan nga balay nga sa ibabaw sang ila mga atop nagsonog sila sing incienso sa bug-os nga kadam-an sang langit, kag nag-ula sing mga halad-nga-ilimnon sa iban nga mga dios.’”
14Niyan nag-abut si Jeremias gikan sa Topet, diin ginpadala sia sang Ginoo sa pagtagna, kag nagtindug sia sa luwang sang balay sang Ginoo, kag nagsiling sa bug-os nga katawohan: 15“Amo ini ang ginasiling sang Ginoo sang mga kasoldadosan, ang Dios sang Israel, Yari karon, dalhon ko sa sining banwa kag sa tanan niyang kabanwaanan ang bug-os nga malaut nga ginmitlang ko batok sini, bangud nga nagtingkoyan sila, agud nga indi sila magpamati sang akon mga polong.”
Currently Selected:
JEREMIAS 19: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
