JEREMIAS 16
16
Ang Paghukom sang Ginoo sa Katawohan
1Nag-abut man sa akon ang polong sang Ginoo: 2“Dili ka magpangasawa, ukon mag-anak sing mga lalaki ukon mga babayi sa sini nga duug. 3Kay amo ini ang ginasiling sang Ginoo nahanungud sa mga anak nga lalaki kag sa mga anak nga babayi nga natawo sa sini nga duug, kag nahanungud sa ila mga iloy nga nag-anak sa ila kag nahanungud sa ila mga amay nga nangin-amay nila sa sini nga duta: 4Mapatay sila sa mapait nga kamatayon. Indi sila paghayaan, ukon pag-ipanglubung sila; manginsubong sila sang iput sa kadaygan sang duta. Papason sila sang espada kag sang tiggulutum, kag ang ila mga bangkay manginkalan-on sang kapispisan sang mga langit kag sang kasapatan sang duta.
5“Kay amo ini ang ginasiling sang Ginoo: Dili ka magsulud sa balay sang lalaw, ukon magkadto sa pagpanalabiton, ukon hayaan sila; kay ginkuha ko ang akon paghidait sa sini nga katawohan, nagasiling ang Ginoo, ang akon malig-on nga paghigugma kag mahinoklogon nga mga kalooy. 6Tingub ang mga dalagku kag ang mga magamay mapatay sa sini nga duta; dili sila pag-ilubung, ukon hayaan sila sang mga tawo ukon magpilas sang ila kaugalingon ukon magpabulug tungud sa ila. 7Wala sing magatipiktipik sing tinapay tungud sa ila lalaw, sa paglipay sa ila tungud sa mga patay; kag wala sing mga tawo nga magapainum sa ila sang tagayan sang paglipay tungud sa ila amay ukon tungud sa ila iloy. 8Dili ka magsulud sa balay sang sinalosalo sa paglingkod upud sa ila, sa pagkaon kag sa pag-inum. 9Kay amo ini ang ginasiling sang Ginoo sang mga kasoldadosan, ang Dios sang Israel: Yari karon, pauntaton ko sa sini nga duug, sa atubangan sang inyo mga mata kag sa inyo mga adlaw, ang tingug sang kalipay kag ang tingug sang kinasadya, ang tingug sang nobyo kag ang tingug sang nobya.#Jer. 7:34; 25:10; Bug. 18:23.
10“Kag kon magpahayag ka sa sini nga katawohan sini tanan nga polong, kag magsiling sila sa imo, ‘Ngaa bala nga nagmitlang ang Ginoo sini tanan nga daku nga kalaut batok sa amon? Ukon ano bala ang amon kalautan? Ano bala ang sala namon nga ginhimo namon batok sa Ginoo nga amon Dios?’ 11Niyan magsiling ka sa ila, ‘Bangud nga ang inyo mga ginikanan nagbiya sa akon, nagasiling ang Ginoo, kag nagsonod sa iban nga mga dios kag nag-alagad sa ila kag nagsimba sa ila, kag nagbiya sa akon kag wala magbantay sang akon kasogoan, 12kag kamo naghimo sing malaut labaw pa sa inyo mga ginikanan, kay yari karon, kamo nagalakat ang tagsatagsa sono sa pagkabatinggilan sang iya malaut nga tagiposoon, sa bagay nga wala kamo magpamati sa akon; 13busa ipilak ko kamo gikan sa sini nga duta pakadto sa duta nga kamo ukon ang inyo mga ginikanan wala makakilala, kag didto magaalagad kamo sa iban nga mga dios sa adlaw kag gab-i; kay indi ako magpakita sa inyo sing pagpasulabi.’
14“Busa, yari karon, nagaabut ang mga adlaw, nagasiling ang Ginoo, nga indi na pag-isiling, ‘Sa nagakabuhi ang Ginoo nga nagpataklad sang katawohan sang Israel gikan sa duta sang Egipto,’ 15kondi ‘Sa nagakabuhi ang Ginoo nga nagpataklad sang katawohan sang Israel gikan sa duta sang aminhan kag gikan sa tanan nga mga duta sa diin ginsobol niya sila.’ Kag ibalik ko sila sa ila duta nga ginhatag ko sa ila mga ginikanan.
16“Yari karon, magapatawag ako sing madamu nga mangingisda, nagasiling ang Ginoo, kag pangisdaon nila sila; kag ugaling magapatawag ako sing madamu nga mangangayam, kag ayamon sila nila gikan sa tagsa ka bukid kag sa tagsa ka bakolod, kag sa mga gikab sang mga igang. 17Kay ang akon mga mata yara sa tanan nila nga dalanon; wala sila matago gikan sa akon nawung, kag ang ila kalautan wala mataboni sa akon mga mata. 18Kag sa nahauna tumbasan ko sing pilo ang ila kalautan kag ang ila sala, bangud nga ginhigkoan nila ang akon duta sang mga garuk sang ila makangilil-ad nga mga butang, kag ginpuno ang akon panublion sang ila mga kangil-aran.”
19O Ginoo, akon kusug kag akon kuta,
akon dalangpan sa adlaw sang kapipit-an,
sa imo magaabut ang mga pungsud
gikan sa mga ukbung sang duta kag magasiling:
“Ang amon mga ginikanan nagpanubli sing wala liwan kondi kabutigan,
kadayawan kag mga butang nga sa ila wala sing kapuslanan.
20Magahimo bala ang tawo nga sa iya kaugalingon sing mga dios?
Ang amo indi mga dios!”
21“Busa, yari karon, pakilalahon ko sila, sini nga makaisa pakilalahon ko sila sang akon kamut kag sang akon gahum, kag makilala nila nga ang akon ngalan amo ang Ginoo.”
Currently Selected:
JEREMIAS 16: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
