JEREMIAS 10
10
Dimatuud nga mga Dios kag ang Dios nga Matuud
1Pamatii ninyo ang polong nga ginapamolong sang Ginoo sa inyo, O panimalay sang Israel. 2Amo ini ang ginasiling sang Ginoo:
“Dili kamo magtoon sang dalanon sang mga pungsud,
kag dili kamo magkahangawa sa mga tanda sang langit
kay ang mga pungsud nahangawa sa ila,
3kay ang mga palatukuran sang mga katawohan kadayawan.
Kahoy lamang ini nga ginpulud sa talon,
buhat sang mga kamut sang panday nga may wasay.
4Ginapunihan nila sing pilak kag bulawan;
ginapalig-on nila ini sa mga lansang kag sa mga palo
agud nga indi mationg.
5Kaangay ang ila nga diosdios sang palma nga tinorno,
kag wala nagahambal;
kinahanglan nga dalhon sila, kay indi sila makalakat.
Dili kamo mahadluk sa ila,
kay indi sila makahimo sing malaut,
kag wala man sa ila ang paghimo sing maayo.”
6Wala gid sing kaangay sa imo, O Ginoo;
daku ka, kag daku ang imo ngalan sa kagamhanan.
7Sin-o bala ang indi mahadluk imo, O Hari sang mga pungsud?#Bug. 15:4.
Kay ini naigo sa imo;
sa bagay nga sa tanan nga maalam nga tawo sang mga pungsud
kag sa tanan nilang harianon nga ginsakpan
wala gid sing kaangay sa imo.
8Apang sila sing tingub sapatsapaton kag buangbuang;
ang pagtudlo sang mga diosdios kahoy lamang.
9May pilak nga pinapa sa pinanid nga ginadala gikan sa Tarsis,
kag bulawan sa Ufaz.
Buhat sang manugpahito kag sang mga kamut sang manugsalsal sang bulawan;
asul kag purpura sa ila panapton;
sila tanan buhat sang sampaton nga mga tawo.
10Apang ang Ginoo amo ang Dios nga matuud;
sia amo ang Dios nga buhi, kag Hari nga nagapadayon.
Sa iya kasingkal nagakurug ang duta,
kag ang mga pungsud indi sarang makapabilin sa iya kaalipungut.
11Amo ini ang isiling ninyo sa ila: “Ang mga dios nga wala maghimo sang kalangitan kag sang duta mawala sa duta kag sa idalum sang kalangitan.”
12Sia naghimo sang duta paagi sa iya gahum,
sia nagpalig-on sang kalibutan paagi sa iya kaalam,
kag naghumlad sang kalangitan paagi sa iya paghangup.
13Sang nagamitlang sia sang iya tingug may kagahud sang mga tubig sa mga langit,
kag ginapatub-ok niya ang mga alisngaw gikan sa mga ukbung sang duta.
Nagahimo sia sang mga kilat nga sa ulan,
kag ginapagowa ang hangin gikan sa iya mga bahandian.
14Ang tagsa ka tawo nanginsapatsapaton kag wala sing ihibalo;
ang tagsa ka manugsalsal sang pilak ginapakahuy-an sang iya larawan nga tinigban;
kay ang iya larawan nga tinunaw dimatuud,
kag walay ginhawa sa ila.
15Sila kadayawan, binuhatan sang pagtalang;
sa tion sang pagsilot sa ila mawala sila.
16Indi kaangay sang sa ila sini ang bahin ni Jacob,
kay sia amo ang una sang tanan nga butang,
kag ang Israel amo ang kabikahan sang iya panublion;
ang Ginoo sang mga kasoldadosan amo ang iya ngalan.
Yamo nahanungud sa Pagkamingaw sang Juda
17Tipona ang imo mga galamiton gikan sa duta,
O ikaw nga nagapabilin sa kibon!
18Kay amo ini ang ginasiling sang Ginoo:
“Yari karon, ilabyug ko ang mga pumuluyo sang duta
sa sini nga tion,
kag pakalisdon sila,
agud nga mabatyagan nila.”
19Kailo ako bangud sang akon samad!
Ang akon pilas matama.
Apang nagsiling ako, “Sa pagkamatuud balatian ko ini,
kag dapat ko antuson.”
20Ang akon layanglayang nalaglag,
kag nabugto ang tanan ko nga banting;
ang akon mga anak nagpalayo sa akon,
kag wala na sila;
wala na sing mahumlad liwat sang akon layanglayang,
kag mabitay sang akon mga kumbung.
21Kay ang mga manugpahalab nanginsapatsapaton,
kag wala magpamangkot sa Ginoo;
busa wala sila mag-uswag,
kag ang tanan nila nga panong nag-aplaag.
22Ang tingug sang mga balita! Yari karon, nagaabut!—
ang daku nga kagubut gikan sa duta sang aminhan
sa pagpamingaw sang kabanwaanan ni Juda,
puluy-an sang mga chacal.
23O Ginoo, nahibaloan ko nga ang dalanon sang tawo wala sa iya kaugalingon,
wala sa tawo nga nagalakat sa pagmando sang iya mga tikang.
24O Ginoo, tudloi ako, apang sa talaksan;
indi sa imo kaakig, basi nga dalhon mo ako sa pagkawala.
25Iula ang imo kasingkal sa mga pungsud nga wala makakilala sa imo,
kag sa mga panimalay nga wala magpanawag sa imo ngalan;
kay ginlamon nila si Jacob;
ginlamon nila sia kag gin-ubus sia,
kag ginwagwag ang iya puluy-an.
Currently Selected:
JEREMIAS 10: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
