HUKOM 20
20
Ang Inaway batok sa mga Benjaminhon
1Niyan naggowa ang tanan nga katawohan sang Israel, kag ang katilingban sang Israel nagtipon subong sang isa ka tawo, kutub sa Dan tubtub sa Beer-seba, pati ang duta sang Galaad, sa Ginoo sa Mizpa. 2Kag ang mga pangolo sang bug-os nga katawohan, sang tanan nga kabikahan sang Israel, nag-atubang sila sa pagtipon sang mga tawo sang Dios, apat ka gatus ka libo ka lalaki nga nagalakat nga naggabut sing espada. 3(Karon ang mga anak sang Benjamin nakabati nga ang katawohan sang Israel nagtaklad sa Mizpa.) Kag nagsiling ang katawohan sang Israel, “Sugiri kami, paano bala ang pagkahanabu sining pagkamalaut?” 4Kag nagsabat ang Levinhon, ang bana sang babayi nga ginpatay, kag nagsiling, “Ako nag-abut sa Gabaa, nga sakup sang Benjamin, ako kag ang akon babayi, sa pagdayon. 5Kag ang mga lalaki sang Gabaa nagtindug batok sa akon, kag naglibut sa akon sa balay sa kagab-ihon; naghunahuna sila sa pagpatay sa akon, kag ang akon babayi ginlugus nila, kag napatay sia. 6Kag gindala ko ang akon babayi kag ginhiwahiwa sia, kag ginpadala sia sa bug-os nga duta sang panublion sang Israel; kay nakahimo sila sing hinigal kag kabuangan sa Israel. 7Yari karon, kamo nga katawohan sang Israel, tanan sa inyo, ihatag ninyo diri ang inyo laygay kag kasugtanan.”
8Kag ang tanan nga katawohan nagtindug subong sang isa ka tawo, nga nagasiling, “Wala sing bisan sin-o sa amon nga magkadto sa iya layanglayang, kag wala sing bisan sin-o sa amon nga magpauli sa iya balay. 9Apang karon amo ini ang butang nga himoon namon sa Gabaa: magataklad kami batok sa iya paagi sa papalad, 10kag magakuha kami sing napulo ka tawo sa isa ka gatus sa bug-os sang tanan nga kabikahan sang Israel, kag isa ka gatus sa isa ka libo, kag isa ka libo gikan sa isa ka laksa, sa pagkuha sing mga kalan-on nga sa katawohan, agud nga mahimo nila kon mag-abut sila sa Gabaa sang Benjamin, ang sono sa tanan nga kabuangan nga ginhimo nila sa Israel.” 11Gani ang tanan nga mga lalaki sang Israel nagtipon batok sa banwa, nga naghiusa sing tingub subong sang isa ka tawo.
12Kag ang mga kabikahan sang Israel nagpadala sing mga lalaki sa bug-os nga kabikahan ni Benjamin, nga nagasiling, “Ano bala ini nga pagkamalaut nga nahanabu sa tunga ninyo? 13Busa karon itugyan ninyo ang mga lalaki, ang mga huroshuros nga yara sa Gabaa, agud nga mapatay namon sila, kag masikway ang malaut gikan sa Israel.” Apang ang Benjamin indi buut magpamati sa tingug sang ila mga utud, ang katawohan sang Israel. 14Kag ang mga anak sang Benjamin nagtipon sila sing tingub sa Gabaa gikan sa mga banwa, sa paggowa sa pagpakig-away sa katawohan sang Israel. 15Kag ang mga anak sang Benjamin gikan sa kabanwaanan naisipan sadto nga adlaw nga duha ka pulo kag anum ka libo ka lalaki nga naggabut sing espada, luwas sang pumuluyo sang Gabaa, nga naisipan nga pito ka gatus ka lalaki nga pinili. 16Sa tunga sini nga bug-os nga katawohan may pito ka gatus ka lalaki nga pinili nga walis; ang tagsatagsa makalabyog sing mga bato sa malabohok, kag wala paglisa. 17Kag ang mga tawo sang Israel, luwas sang Benjamin, naisipan nga apat ka gatus ka libo ka lalaki nga naggabut sing espada; ini sila tanan lalaki nga hangaway.
18Ang katawohan sang Israel nagtindug kag nagtaklad pa Bet-el, kag nagpangayo sing laygay sa Dios, “Sin-o bala sa amon ang magtaklad sing una sa pagpakig-away sa mga anak sang Benjamin?” Kag ang Ginoo nagsiling, “Ang Juda ang magauna.”
19Niyan ang katawohan sang Israel nagbangon sing aga pa, kag nagpahamtang sing dologan batok sa Gabaa. 20Kag naggowa ang mga lalaki sang Israel sa pagpakig-away sang Benjamin; kag ang mga lalaki sang Israel nagpahamtang sing paagisud sa inaway batok sa ila sa Gabaa. 21Ang mga anak sang Benjamin naggowa sa Gabaa, kag naglaglag sa duta sang mga Israelnon sa sadto nga adlaw sing duha ka pulo kag duha ka libo ka lalaki. 22Apang ang katawohan, ang mga lalaki sang Israel, nagpangisug sa ila kaugalingon, kag nagpahamtang sing paagisud liwat sa inaway sa duug diin sila nagpahamtang sing paagisud sa nahauna nga adlaw. 23Kag ang katawohan sang Israel nagtaklad kag naghibi sa atubangan sang Ginoo tubtub sa kahaponon; kag nagpamangkot sila sa Ginoo, “Magapalapit bala ako liwat sa pagpakig-away sa mga anak sang Benjamin nga akon utud?” Kag ang Ginoo nagsiling, “Taklad kamo batok sa ila.”
24Gani nagpalapit ang katawohan sang Israel batok sa mga anak sang Benjamin sa ikaduha nga adlaw. 25Kag naggowa ang Benjamin batok sa ila gikan sa Gabaa sa ikaduha nga adlaw, kag naglaglag sa duta sa katawohan sang Israel liwat sing napulo kag walo ka libo ka lalaki; ini sila tanan naggabut sing espada. 26Niyan ang tanan nga katawohan sang Israel, ang tanan nga katawohan, nagtaklad kag nag-abut sa Bet-el kag naghibi; naglingkod didto sa atubangan sang Ginoo, kag nagpuasa sa sadto nga adlaw tubtub sa kahaponon, kag nagdolot sila sing mga halad-nga-sinonog kag mga halad-sa-paghidait sa atubangan sang Ginoo. 27Kag ang katawohan sang Israel nagpamangkot sa Ginoo (kay ang kaban sang katipan sang Dios didto pa sa sadto nga mga adlaw, 28kag si Finees nga anak ni Eleazar, ang anak ni Aaron, nagtindug sa atubangan sini sadto nga mga adlaw), nga nagasiling, “Magataklad pa bala kami liwat sa pagpakig-away sa mga anak sang Benjamin nga amon utud, ukon magauntat kami?” Kag ang Ginoo nagsiling, “Magtaklad; kay buwas itugyan ko sila sa inyo kamut.”
29Gani ang Israel nagbutang sing mga manugpuut batok sa Gabaa palibut. 30Kag ang katawohan sang Israel nagtaklad batok sa mga anak sang Benjamin sa ikatlo nga adlaw, kag nagpahamtang sila sing paagisud batok sa Gabaa, subong sang iban nga mga tion. 31Kag ang mga anak sang Benjamin naggowa batok sa katawohan, kag nagpalayo sila sa banwa; kag nagsugud sila sa pagsamad kag pagpatay sang mga tawo subong sang iban nga mga tion, sa mga dalan, nga ginaagihan sang isa pataklad sa Bet-el kag ang iban pa Gabaa, sa latagon, nga mga katloan ka lalaki sang Israel. 32Kag nagsiling ang mga anak sang Benjamin, “Nagakapukan sila sa atubangan naton, subong sang sa nahauna.” Apang ang mga anak sang Israel nagsiling, “Magpalagyo kita, kag papalayoon sila gikan sa banwa pakadto sa mga dalan.” 33Kag ang tanan nga lalaki sang Israel nagtindug gikan sa ila duug, kag nagpahamtang sila sing paagisud sa Baal-tamar; kag ang mga manugpuut sang Israel naggowa sa ila duug gikan sa Maare-geba. 34Kag nag-abut ang napulo ka libo ka mga lalaki nga pinili sa bug-os nga Israel batok sa Gabaa, kag ang inaway matama; apang ang mga Benjaminhon wala makahibalo nga ang kalaut malapit sa ila. 35Kag ang Ginoo nagsamad sang Benjamin sa atubangan sang Israel; kag ang mga anak sang Israel naglaglag sa Benjamin sadto nga adlaw sing duha ka pulo kag lima ka libo kag isa ka gatus ka lalaki; ini nga tanan sila naggabut sing espada. 36Gani nakita sang mga anak sang Benjamin nga nasamad sila.
Ang mga lalaki sang Israel naghatag sing duug sa Benjamin, bangud nga nagsalig sila sa mga manugpuut nga nabutang nila batok sa Gabaa. 37Kag ang mga manugpuut nagdalidali kag nagdamhag sa Gabaa; ang mga manugpuut naglapta kag ginlaglag nila sa sulab sang espada ang bug-os nga banwa. 38Karon ang tanda nga ginpat-ud sa tunga sang mga lalaki sang Israel kag sang mga manugpuut amo nga kon magpatub-ok sila sing daku nga aso gikan sa banwa 39ang mga lalaki sang Israel mag-isul sa inaway. Karon ang Benjamin nagsugud sa pagsamad kag pagpatay sang mga lalaki sang Israel nga mga katloan ka lalaki; nagsiling sila, “Sa pagkamatuud ginasamad sila sa atubangan naton, subong sang sa nahauna nga inaway.” 40Apang sang nagsugud sa pagtub-ok gikan sa banwa ang panganud nga haligi nga aso, nagbalikid ang mga Benjaminhon sa olihi nila; kag yari karon, ang bug-os nga banwa nagtub-ok sa aso sa langit. 41Niyan nagbalik ang mga lalaki sang Israel, kag ang mga lalaki sang Benjamin nalisang, kay nakita nila nga ang malaut nag-abut sa ila. 42Busa nagtalikod sila sa atubangan sang mga lalaki sang Israel pakadto sa dalanon sang kamingawan; apang ang inaway nagsonod sing mapiot sa ila, kag ang mga naghalin sa mga banwa naglaglag sa ila sa tunga sini. 43Ginlikupan nila ang mga Benjaminhon, ginlagas sila kag gintasak sila sa ila palahuwayan nga duug tubtub sa tampad sang Gabaa nayon sa bulutlakan sang adlaw. 44Napukan sa Benjamin ang napulo kag walo ka libo ka lalaki, tanan sila mga lalaki nga isganan. 45Kag nagtalikod sila kag nagpalagyo nayon sa kamingawan tubtub sa igang sang Rimon; ginsigput sa ila sa mga dalanon ang lima ka libo ka lalaki, kag ginsonod sila sing mapiot tubtub sa Gidom, kag ginsamad sa ila ang duha ka libo ka lalaki. 46Gani ang tanan nga napukan sadto nga adlaw sa mga tawo sang Benjamin duha ka pulo kag lima ka libo ka lalaki nga naggabut sing espada, ini tanan mga tawo nga isganan. 47Apang ang anum ka gatus ka tawo nagtalikod kag nagpalagyo nayon sa kamingawan tubtub sa igang sang Rimon, kag nagpuyo sa igang sang Rimon sing apat ka bulan. 48Kag ang mga lalaki sang Israel nagbalik batok sa mga anak sang Benjamin, kag ginpatay sila sa sulab sang espada, ang bug-os nga banwa kag ang kahayupan kag ang tanan nga nakita nila. Ang tanan nga banwa nga ila naabutan ginsonog sa kalayo.
Currently Selected:
HUKOM 20: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
