HUKOM 12
12
1Nagtilipon sing tingub ang mga lalaki sang Efraim, kag nag-alagi nayon sa Aminhan kag nagsiling sila kay Jefte, “Ngaa bala nga naglatas ka sa pagpakig-away sa mga anak ni Amon, kag wala magtawag sa amon sa paglakat upud sa imo? Sonogon namon sa kalayo ang imo balay sa ibabaw nimo.” 2Kag si Jefte nagsiling sa ila, “Ako kag ang akon katawohan yara sa dakung pagpakigsumpung sa mga anak ni Amon; kag sang nagtawag ako sa inyo, wala ako ninyo pagluwasa sa ila kamut. 3Kag sang nakita ko nga wala ako ninyo pagluwasa, ginpasimpalaran ko ang akon kabuhi, kag naglatas batok sa mga anak ni Amon, kag gintugyan sila sang Ginoo sa akon kamut; ngaa bala niyan nagtaklad kamo sa akon sining adlaw, sa pagpakig-away sa akon?” 4Niyan gintipon sing tingub ni Jefte ang tanan nga lalaki sang Galaad kag nagpakig-away sa Efraim; kag ang mga lalaki sang Galaad nagdaug sang Efraim, bangud nga nagsiling sila, “Kamo nga mga Galaadnon, mga laaslaas sang Efraim, sa tunga sang Efraim kag sa tunga sang Manases.” 5Kag gin-agaw sang mga Galaadnon ang mga obogan sang Jordan batok sa mga Efraimnon. Kag kon ang bisan sin-o sang mga laaslaas sang Efraim magsiling, “Pataboka ako,” ang mga lalaki sang Galaad nagsiling sa iya, “Efraimnon bala ikaw?” Kon magsiling sia, “Indi,” 6nagsiling sila sa iya, “Karon siling ka Shibolet,” kag nagsiling sia “Sibolet,” kay indi sia makahimo magmitlang sini sing nagakaigo; niyan gindakup nila sia kag ginpatay sa mga obogan sang Jordan. Kag may napukan sadtong tion sang Efraim nga kap-atan kag duha ka libo.
7Si Jefte naghukom sang Israel sing anum ka tuig. Niyan napatay si Jefte nga Galaadnon, kag ginlubung sa isa sang mga banwa sang Galaad.
Sanday Ibzan, Elon, kag Abdon Nagahukom sang Israel
8Madason sa iya si Ibzan sang Bet-lehem naghukom sang Israel. 9Sia may katloan ka anak nga lalaki; kag katloan ka anak nga babayi nga ginpadala niya sa luwas, kag gindala niya gikan sa luwas ang katloan ka anak nga babayi nga sa iya mga anak nga lalaki. Kag naghukom sia sa Israel sing pito ka tuig. 10Niyan napatay si Ibzan, kag ginlubung sa Bet-lehem.
11Madason sa iya naghukom sa Israel si Elon nga Zabulonhon; kag naghukom sia sa Israel sing napulo ka tuig. 12Niyan napatay si Elon nga Zabulonhon, kag ginlubung sa Ayalon sa duta sang Zabulon.
13Madason sa iya naghukom sa Israel si Abdon nga anak ni Hilel nga Piratonhon. 14Sia may kap-atan ka anak nga lalaki kag katloan ka apo nga lalaki, nga nagsakay sa kapitoan ka polyino nga asno; kag naghukom sia sa Israel sing walo ka tuig. 15Niyan napatay si Abdon nga anak ni Hilel nga Piratonhon, kag ginlubung sa Piraton sa duta sang Efraim, sa kabakoloran sang mga Amalecnon.
Currently Selected:
HUKOM 12: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
