HABACUC 1
1
Si Habacuc Nagayamo nahanungud sa Pagkadimatarung
1Ang lulan nga nakita ni Habacuc nga manalagna.
2O Ginoo, tubtub pa bala san-o ang pagtuaw ko,
kag indi ka magpamati?
Nagatuaw ako sa imo “Panglugus!”
kag indi ka magluwas?
3Ngaa bala nga ginapakitaan mo ako sing kalautan
kag ginapatolok sa pagkabalingag?
Ang kalaglagan kag ang panglugus yara sa atubangan nakon;
may kaawayon kag nagaabut ang kasuayon.
4Busa ang kasogoan hagoka
kag ang katarungan wala gid nagagowa.
Kay ang malauton nagalikup sang matarung,
busa ang katarungan nagagowa nga pinatiko.
Ang mga Caldeanhon Magasilot sang Juda
5Tolok kamo sa mga pungsud, kag magtan-aw;
magkatingala sing lakas.
Kay nagahimo ako sing buluhaton sa inyo mga adlaw
nga indi ninyo pagpatihan bisan isugid sa inyo.#Binu. 13:41.
6Kay yari karon, ginabangon ko ang mga Caldeanhon,#2 Hari 24:2.
ina nga pungsud nga mapintas kag madalas,
nga nagalatas sa kasangkaran sang duta,
sa pag-angkon sing puluy-an nga mga duug nga indi ila.
7Makakulugmat sila kag makakululba;
ang ila paghukom kag ang ila pagkahalangdon nagagikan sa ila kaugalingon.
8Ang ila mga kabayo man madasig pa sa mga leopardo,
mapintas pa sa mga lobo sa kahaponon;
ang ila mga manugkabayo nagasolong sing matinaastaason.
Hoo, ang ila mga manugkabayo nagaabut gikan sa malayo;
nagalupad sila subong sang aguila nga nagadalidali sa paghalunhon.
9Tanan sila nagaabut sa pagpanglugus;
ang tanan nila nga nawung nagaatubang sa unhan.
Nagatipon sila sing mga bihag subong sang balas.
10Sia nagayubit sa mga hari,
kag ang mga principe ululigyaton sa iya.
Ginauligyat niya ang tagsa ka pamakud,
kay nagatumpok sia sang yab-ok kag ginaagaw ini.
11Niyan magataliwan sia subong sang hangin kag magaligad,
manginmalinapason sia, nga ang gahum niya amo ang iya dios!
Ang Panuay ni Habacuc
12Indi ka bala kutub sa walay katubtuban,
O Ginoo nga akon Dios, ang akon Balaan?
Indi kami mapatay.
O Ginoo, ginpat-ud mo sia nga sa paghukom;
kag ikaw, O Igang, nagtukud sa iya nga sa pagtudlo.
13Ikaw nga putli pa sing mga mata sang sa magtolok sa malaut
kag indi makatolok sa pagkabalingag,
ngaa bala nagatolok ka sa maluibon,
kag nagahipus ka kon ang malauton maghalunhon
sang tawo nga matarung pa sa iya?
14Kay ikaw nagahimo sang mga tawo subong sang mga isda sang dagat,
subong sang mga butang nga nagasaug nga wala sing manugdumala sa ila.
15Ginakuha niya sila tanan sang taga,
ginadakup niya sila sa iya sihod,
ginatipon sila sa iya chinchorro;
busa nagakalipay sila kag nagakasadya.
16Busa nagahalad sia sa iya sihod
kag nagasonog sing incienso sa iya chinchorro;
bangud nga sa ila ginpatambok ang iya pahat,
kag ginpabugana ang iya pagkaon.
17Busa ulaan bala niya ang iya sihod,
kag indi magpaiway sa pagpatay sang mga pungsud sing dalayon?
Currently Selected:
HABACUC 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
