GENESIS 46

Si Jacob kag ang Iya Panimalay sa Egipto

1Gani nagpanlakatan si Israel upud sang tanan nga iya, kag nag-abut sa Beer-seba, kag nagdolot sing mga halad sa Dios sang iya amay nga si Isaac. 2Kag ang Dios nagpamolong ka Israel sa mga palanan-awon sa kagab-ihon, kag nagsiling, “Jacob, Jacob.” Kag nagsiling sia, “Yari ako.” 3Niyan ang Dios nagsiling, “Ako ang Dios, ang Dios sang imo amay; dili ka magkahadluk sa pagdulhog sa Egipto; kay himoon ko ikaw didto nga dakung pungsud. 4Ako magadulhog upud sa imo sa Egipto, kag pabalikon ko man ikaw; kag ang kamut ni Jose magapapiyong sang imo mga mata.” 5Niyan nagtaliwan si Jacob sa Beer-seba; kag gindala sang mga anak ni Israel ang ila amay nga si Jacob, ang ila mga magamay, kag ang ila mga asawa, sa mga karo nga napadala ni Faraon sa pagdala sa iya. 6Ginkuha man nila ang ila kahayupan kag ang ila pagkabutang, nga nakuha nila sa duta sang Canaan, kag nag-abut sa Egipto,#Binu. 7:15. si Jacob kag ang tanan niya nga kaliwat upud sa iya, 7ang iya mga anak nga lalaki, kag ang iya mga apo nga lalaki upud sa iya, ang iya mga anak nga babayi, kag ang iya mga apo nga babayi; kag ang tanan niya nga kaliwat gindala niya upud sa iya sa Egipto.

8Karon ini sila amo ang mga ngalan sang kabataan ni Israel, nga nag-abut sa Egipto, si Jacob kag ang iya mga anak nga lalaki. Si Ruben, panganay ni Jacob, 9kag ang mga lalaking anak ni Ruben: si Hanoc, si Palu, si Hezron, kag si Carmi. 10Ang mga lalaking anak ni Simeon: si Jemuel, si Jamin, si Ohad, si Jaquin, si Zohar, kag si Saul, ang anak sang Canaanhon nga babayi. 11Ang mga lalaking anak ni Levi: si Gerson, si Cohat, kag si Merari. 12Ang mga lalaking anak ni Juda: si Er, si Onan, si Sela, si Perez, kag si Zera (apang si Er kag si Onan napatay sa duta sang Canaan); kag ang mga lalaking anak ni Perez amo si Hezon kag si Hamul. 13Ang mga lalaking anak ni Isacar: si Tola, si Puva, si Job, kag si Simron. 14Ang mga lalaking anak ni Zabulon: si Sered, si Elon, kag si Jaleel 15(ini sila amo ang mga lalaking anak ni Lea, nga gin-anak niya kay Jacob sa Padan-aram, pati si Dina nga iya anak nga babayi; katloan kag tatlo tanan ang iya mga anak nga lalaki kag ang iya mga anak nga babayi). 16Ang mga lalaking anak ni Gad: si Zifion, si Hagi, si Suni, si Ezbon, si Eri, si Arodi, kag si Areli. 17Ang mga lalaking anak ni Aser: si Imna, si Isva, si Isvi, si Beria, upud kay Sera nga ila utud nga babayi. Kag ang mga lalaking anak ni Beria: si Heber kag si Malquiel 18(ini sila amo ang mga lalaking anak ni Zilpa, nga ginhatag ni Laban kay Lea nga iya anak nga babayi; kag ini sila gin-anak niya kay Jacob—napulog anum ka tawo). 19Ang mga lalaking anak ni Raquel, asawa ni Jacob: si Jose kag si Benjamin. 20Kag natawo kay Jose sa duta sang Egipto si Manases kag si Efraim, ang mga gin-anak sa iya ni Asenat, ang anak ni Potifera nga sacerdote sa On.#Gen. 41:50-52. 21Kag ang mga lalaking anak ni Benjamin: si Bela, si Bequer, si Asbel, si Gera, si Naaman, si Ehi, si Ros, si Mupim, si Hupim, kag si Ard 22(ini sila amo ang mga lalaking anak ni Raquel, nga natawo kay Jacob—napulog apat tanan ka tawo). 23Ang mga lalaking anak ni Dan: si Husim. 24Ang mga lalaking anak ni Neftali: si Jazeel, si Guni, si Jezer, kag si Silem 25(ini sila amo ang mga lalaking anak ni Bilha, nga ginhatag ni Laban kay Raquel nga iya babaying anak, kag ini sila gin-anak niya kay Jacob—pito tanan ka tawo). 26Ang tanan nga tawo nga nag-abut upud ni Jacob sa Egipto, nga iya kaugalingon nga kaliwat, walay labut ang mga asawa sang mga lalaking anak ni Jacob, kan-uman kag anum tanan ka tawo; 27kag ang mga lalaking anak ni Jose, nga natawo sa iya sa Egipto, duha; ang tanan nga tawo sa panimalay ni Jacob, nga nag-abut sa Egipto, kapitoan.#Binu. 7:14.

28Ginpadala ni Jacob si Juda sa una niya kay Jose, sa pagtudlo sang dalan sa una niya pa Gosen; kag nag-abut sila sa duta sang Gosen. 29Niyan si Jose nagtakud sang iya kangga kag nagtaklad sa pagbaton kay Israel nga iya amay sa Gosen; kag nagpakilala sia sa iya, kag naghakus sa iya liog, kag naghibi sing malawig sa iya liog. 30Si Israel nagsiling kay Jose, “Karon tuguti ako nga mapatay, kay nakita ko ang imo nawung nga buhi pa ikaw.” 31Si Jose nagsiling sa iya mga utud kag sa panimalay sang iya amay, “Magataklad ako kag magasugid kay Faraon, kag magasiling sa iya, ‘Ang akon mga utud kag ang panimalay sang akon amay, nga didto sa duta sang Canaan, nag-abut sa akon; 32kag ang mga lalaki manugpahalab, kay mga manugbantay sila sang kahayupan; kag gindala nila ang ila mga panong, kag ang ila kabakahan, kag ang tanan nga ila.’ 33Kon si Faraon magtawag sa inyo, kag magsiling, ‘Ano bala ang inyo pangita?’ 34magasiling kamo, ‘Ang imo mga alagad mga manugbantay sang kahayupan kutub sang amon pagkapamatan-on tubtub karon, tingub kami kag ang amon mga ginikanan,’ agud nga kamo magpuyo sa duta sang Gosen; kay kangil-aran sa mga Egiptohanon ang mga manugpahalab.”

Currently Selected:

GENESIS 46: ABHIL82

Highlight

Copy