GENESIS 44

Ang Tagayan nga Nadula

1Niyan nagsogo si Jose sa tulugyanan sang iya balay, “Pun-a ang mga sako sang mga tawo sing kalan-on, sono sa kadamuon nga madala nila, kag ibutang ang cuarta sang tagsa ka tawo sa baba sang iya sako, 2kag ibutang ang akon tagayan, ang tagayan nga pilak, sa baba sang sako sang kamanghuran, upud ang iya cuarta nga sa uyas.” Kag ginhimo niya sono sa ginpamolong sa iya ni Jose. 3Sang pagpamanagbanag sang kaagahon, ginpalakat ang mga tawo kag ang ila mga asno. 4Sang nakagowa sila apang indi pa malayo sa banwa, nagsiling si Jose sa iya tulugyanan, “Tindug, sonda ang mga tawo; kag kon malambut mo sila, isiling sa ila, ‘Ngaa bala ginbalusan ninyo sing malaut ang maayo? 5Ngaa bala ginkawat ninyo ang akon tagayan nga pilak? Indi bala ini ang ginaimnan sang akon ginoo, kag ini iya ginaban-awan? Nakahimo kamo sing malaut sa paghimo sini.’”

6Sang nalambut niya sila, ginpamolong niya sa ila ining mga polong. 7Nagsiling sila sa iya, “Ngaa bala nagapamolong ang akon ginoo sing subong sining mga polong? Malayo ini sa imo mga alagad nga sila maghimo sang subong nga butang! 8Yari karon, ang cuarta nga nakita namon sa baba sang amon mga sako, ginbalik namon sa imo gikan sa duta sang Canaan; paano niyan bala nga magpangawat kami sa balay sang imo ginoo sing pilak ukon bulawan? 9Bisan sa kay sin-o sang imo mga alagad makita ini, mapatay sia, kag kami man mangin-ulipon sang akon ginoo.” 10Nagsiling sia, “Manginsono ini sa inyo mga polong: sia nga makitaan sini mangin-akon ulipon, kag kamo manginwalay sala.” 11Niyan nagdalidali ang tagsa ka tawo sa pagholog sang iya sako sa duta, kag ginbukad sang tagsatagsa ang iya sako. 12Kag gin-usisa niya, kutub sa kamagulangan kag nagdolog sa kamanghuran; kag ang tagayan nakita sa sako ni Benjamin. 13Niyan ginkusnit nila ang ila mga panapton, kag ginpakolohan sang tagsa ka tawo ang iya asno, kag nagbalik sa banwa.

14Sang si Juda kag ang iya mga utud nag-abut sa balay ni Jose, didto pa sia; kag naghapa sila sa duta sa atubangan niya. 15Nagsiling si Jose sa ila, “Ano bala nga buhat ining nahimo ninyo? Wala bala kamo makahibalo nga ang lalaki subong sa akon makaban-aw gayud?” 16Kag si Juda nagsiling, “Ano bala ang amon isiling sa akon ginoo? Ano bala ang ipamolong namon? Ukon ano ang pagpakatarung namon? Ang Dios nakasapo sang kalautan sang imo mga alagad; yari karon, kami mga ulipon sang amon ginoo, tingub kami kag sia man nga sa iya kamut nasapwan ang tagayan.” 17Apang sia nagsiling, “Malayo sa akon nga maghimo ako sing subong! Ang lalaki nga sa iya kamut nasapwan ang tagayan sia mangin-akon ulipon; apang nahanungud sa inyo, pauli kamo sa paghidait sa inyo amay.”

Si Juda Nagapakilooy tungud kay Benjamin

18Niyan si Juda nagpalapit sa iya, kag nagsiling, “O ginoo ko, ginaampo ko sa imo, pahambala ang imo alagad sing isa ka polong sa mga idulungug sang akon ginoo, kag dili pagpadabdaba ang imo kaakig batok sa imo alagad; kay ikaw kaangay ni Faraon. 19Ang akon ginoo nagpamangkot sa iya mga alagad, nga nagsiling, ‘May amay bala kamo, ukon utud nga lalaki?’ 20Kag nagsiling kami sa akon ginoo, ‘May amay pa kami, nga tigulang na, kag isa ka bataon nga utud, ang bata sang iya katigulangon; kag ang iya utud nga lalaki patay na, kag sia lamang ang nabilin sang iya iloy; kag ang iya amay nagahigugma sa iya.’ 21Niyan ikaw nagsiling sa imo mga alagad, ‘Dalha ninyo sia sa akon, agud nga matan-aw ko sia.’ 22Kami nagsiling sa akon ginoo, ‘Ang pamatan-on indi makabiya sa iya amay, kay kon magbiya sia sa iya amay, ang iya amay mapatay.’ 23Niyan nagsiling ka sa imo mga alagad, ‘Kon ang inyo utud indi magdulhog upud sa inyo, indi na ninyo makita ang akon nawung.’ 24Sang nag-abut kami sa akon amay nga imo alagad ginsugid namon sa iya ang mga polong sang akon ginoo. 25Kag sang nagsiling ang amon amay, ‘Balik kamo, bakal sa aton sing diotay nga kalan-on,’ 26kami nagsiling, ‘Indi kami makadulhog. Kon ang amon utud nga kamanghuran mag-upud sa amon, niyan magadulhog kami; kay indi kami makakita sang nawung sang lalaki, kon indi upud sa amon ang amon kamanghuran nga utud.’ 27Niyan ang imo alagad nga akon amay nagsiling sa amon, ‘Kamo nakahibalo nga ang akon asawa nag-anak sa akon sing duha ka lalaki; 28ang isa nagbiya sa akon, kag nagsiling ako. Sa pagkamatuud ginkusnit sia; kag tubtub niyan wala ko sia makita. 29Kon kuhaon ninyo ining isa man sa akon, kag mahanabu sa iya ang kalainan, papanaugon ninyo ang akon mga uban nga may kasubo sa Sheol.’ 30Busa karon, kon mag-abut ako sa imo alagad nga akon amay, kag ang pamatan-on wala sa amon, niyan, sanglit nga ang iya kabuhi nahigot sa kabuhi sang pamatan-on; 31kon makita niya nga ang pamatan-on wala na, mapatay sia; kag ang imo mga alagad magapapanaug sang mga uban sang imo alagad nga amon amay nga may kasubo sa Sheol. 32Kay ang imo alagad nanginkalig-onan sang pamatan-on sa akon amay, nga nagasiling, ‘Kon indi ko sia mauli sa imo, niyan magaantus ako sang kabasulanan sang akon amay sa bug-os kong kabuhi.’ 33Busa karon, ginaampo ko sa imo, papabilina nga ulipon sang akon ginoo ang imo alagad sa baylo sang pamatan-on; kag pataklara ang pamatan-on upud sa iya mga utud. 34Kay paano bala ang pagtaklad ko sa akon amay kon wala sa akon ang pamatan-on? Nahadluk ako sa pagtan-aw ang malaut nga matabu sa akon amay.”

Currently Selected:

GENESIS 44: ABHIL82

Highlight

Copy