GENESIS 34

Ang Pagtimalus sang Pagdagta kay Dina

1Karon si Dina nga anak nga babayi ni Lea, nga ginpanganak niya kay Jacob, naggowa sa pagtan-aw sang mga babayi sang duta. 2Kag sang si Siquem nga anak nga lalaki ni Hamor nga Hevinhon, ang principe sang duta, nakakita sa iya, ginkuha niya sia kag ginhulidan sia kag ginlugus sia. 3Kag ang iya kalag naangut kay Dina nga anak ni Jacob; nahagugma sia sa dalaga kag nagpamolong sing malolo sa iya. 4Gani si Siquem nagpamolong kay Hamor nga iya amay, nga nagasiling, “Paasawahi ako sining dalaga.” 5Karon si Jacob nakabati nga gindagtaan niya si Dina nga iya anak; apang ang iya mga anak nga lalaki yadto sa latagon upud sa iya kahayupan, gani si Jacob naghipus tubtub nga nag-abut sila. 6Kag nagkadto si Hamor nga amay ni Siquem kay Jacob sa pagpakighambal sa iya. 7Nag-abut ang mga anak nga lalaki ni Jacob gikan sa latagon sang pagkabati nila sini; kag nagkasakit ang mga lalaki kag nagsingkal sing tama, bangud nga si Siquem naghimo sing kahuluy-an sa Israel sa paghulid sa anak ni Jacob, butang nga indi dapat himoon.

8Apang si Hamor nagpakighambal sa ila, nga nagasiling, “Ang kalag sang akon anak nga si Siquem nagalangut sa inyo anak nga babayi; ginaampo ko sa inyo, ipaasawa ninyo sia sa iya. 9Mag-inasawahay kita; ihatag sa amon ang inyo mga anak nga babayi, kag kuha kamo nga sa inyo sang amon mga anak nga babayi. 10Magpuyo kamo upud sa amon; kag ang duta yara sa atubangan ninyo; puyo kamo kag patikang sa iya, kag panag-iya sa iya.” 11Si Siquem nagsiling man sa amay kag sa mga utud ni Dina, “Magmanginkalahamut-an ako sa inyo mga mata, kag magahatag ako sang isiling ninyo sa akon. 12Pangayoi ninyo ako sang daku gid nga doti kag dolot, kag ako magahatag sono sa isiling ninyo sa akon; lamang ipaasawa ninyo sa akon ang dalaga.”

13Ang mga anak nga lalaki ni Jacob nagsabat nga may limbong kay Siquem kag kay Hamor nga iya amay, bangud nga gindagtaan niya si Dina nga ila utud. 14Sila nagsiling sa ila, “Indi kami makahimo sining butang, sa paghatag sang amon utud nga babayi sa isa nga dicircuncidado, kay kahuluy-an ina sa amon. 15Lamang sa sining kasugtanan magasugut kami sa inyo: manginsubong kamo sa amon kag ang tagsa ka lalaki sa inyo magpacircuncidar. 16Niyan ihatag namon sa inyo ang amon mga anak nga babayi, kag magakuha kami nga sa amon sang inyo mga anak nga babayi, kag magapuyo kami upud sa inyo kag mangin-isa kita ka katawohan. 17Apang kon indi kamo magpamati sa amon sa pagpacircuncidar, niyan kuhaon namon ang amon anak nga babayi, kag magalakat kami.”

18Ang ila mga polong nagpahamuut kay Hamor kag kay Siquem nga anak ni Hamor. 19Kag wala magpalantang ang pamatan-on nga lalaki sa paghimo sang butang, bangud nga naganyat sia sa babayi nga anak ni Jacob. Karon ginhangad sia labaw sa bug-os nga panimalay sang iya amay. 20Gani si Hamor kag si Siquem nga iya anak nagkadto sa gawang sang ila banwa kag nagpamolong sa mga lalaki sang ila banwa, nga nagasiling, 21“Ining mga tawo makidaiton sa aton; busa papuy-on sila sa duta kag magpatikang sa iya, kay yari karon, ang duta tuman kasangkad sa ila; pangasaw-on naton ang ila mga anak nga babayi, kag ihatag naton sa ila ang aton mga anak nga babayi. 22Lamang sa sining kasugtanan ang mga tawo magasugut sa aton sa pagpuyo upud sa aton, nga mangin-isa ka katawohan: kon magpacircuncidar ang tagsa ka lalaki sa aton subong nga sila circuncidado. 23Indi bala ang ila kahayupan, ang ila pagkabutang kag ang tanan nila nga kasapatan aton? Lamang magsugut kita sa ila, kag magapuyo sila upud sa aton.” 24Kag nagpamati kay Hamor kag kay Siquem nga iya anak ang tanan nga naggowa sa banwa; kag gincircuncidar ang tagsa ka lalaki, nga naggowa sa gawang sang iya banwa.

25Sa ikatlong adlaw, sang ginahapdian sila, ang duha ka anak nga lalaki ni Jacob, si Simeon kag si Levi, mga utud ni Dina, nagkuha sang ila espada kag nagkadto nga wala mahibal-i sa banwa, kag ginpatay ang tanan nga lalaki. 26Ginpatay nila sa sulab sang espada si Hamor kag si Siquem nga iya anak, kag ginkuha nila si Dina sa balay ni Siquem, kag naglakat. 27Kag ang mga anak ni Jacob nagkadto sa mga patay, kag gin-ati ang banwa, bangud nga nadagtaan ang ila utud; 28ginkuha nila ang ila mga panong kag ang ila kabakahan, ang ila mga asno, kag ang yara sa banwa kag sa latagon; 29ginbihag nila kag gin-agaw ang tanan nila nga manggad, ang tanan nila nga magamay kag ang mga asawa nila, ang tanan nga yara sa balay. 30Niyan si Jacob nagsiling kay Simeon kag kay Levi, “Gingamo ninyo ako sa paghimo sa akon nga kangil-aran sa mga pumuluyo sang duta, sa mga Canaanhon kag sa mga Pereznon; ako pila ka bato, kag kon magtingub sila batok sa akon kag awayon ako, malaglag ako, ako kag ang akon panimalay.” 31Apang nagsiling sila, “Bilangon bala nila ang amon utud subong sang makihilawason nga babayi?”

Currently Selected:

GENESIS 34: ABHIL82

Highlight

Copy