GENESIS 26

Si Isaac sa Gerar

1Karon may tiggulutum sa duta, luwas sang nahauna nga tiggulutum nga nag-abut sa kaadlawan ni Abraham. Kag si Isaac nagkadto kay Abimelec nga hari sang mga Filistinhon, sa Gerar. 2Kag ang Ginoo nagpahayag sa iya, kag nagsiling, “Dili ka magdolhog sa Egipto; puyo ka sa duta nga isiling ko sa imo. 3Panlugayaw ka sa sining duta, kag magaupud ako sa imo, kag magapakamaayo sa imo; kay sa imo kag sa imo mga kaliwatan ihatag ko ini tanan nga duta, kag tumanon ko ang sumpa nga ginsumpa ko kay Abraham nga imo amay. 4Pabuaron ko ang imo mga kaliwatan subong sang kabitoonan sang langit, kag magahatag sa imo mga kaliwatan sini tanan nga duta; kag ang tanan nga pungsud sang duta pakamaayohon paagi sa imo mga kaliwatan:#Gen. 22:16-18. 5bangud nga nagtuman si Abraham sa akon tingug kag nagbantay sang akon tinulin, sang akon mga sogo, sang akon mga palatukuran, kag sang akon mga kasogoan.”

6Gani si Isaac nagpuyo sa Gerar. 7Sang nagpamangkot sa iya ang mga tawo sang duug nahanungud sa iya asawa, nagsiling sia, “Utud ko sia”;#Gen. 12:13; 20:2. kay nahadluk sia sa pagsiling, “Akon asawa,” nga nagapainoino, “basi ang mga tawo sang duug magpatay sa akon bangud kay Rebeca”; bangud nga maanyag sia nga tolokon. 8Sang madugay na sia didto, si Abimelec nga hari sang mga Filistinhon naggawa sa talambuan kag nakakita kay Isaac nga nagaangga kay Rebeca nga iya asawa. 9Gani gintawag ni Abimelec si Isaac, kag nagsiling, “Yari karon, sia asawa mo; paano bala niyan nga nagsiling ka, ‘Utud ko sia’?” Si Isaac nagsiling sa iya, “Bangud nga nagpainoino ako, ‘Basi mapatay ako bangud sa iya.’” 10Si Abimelec nagsiling, “Ano bala ining ginhimo mo sa amon? Ang isa sang mga tawo mahapus makahulid kuntani sa imo asawa, kag nagdala ka kuntani sa amon sing paglapas.” 11Gani si Abimelec nagpaandam sa bug-os nga katawohan, nga nagasiling, “Ang magtandug sa sining tawo ukon sa iya asawa patyon.”

12Kag nagsab-ug si Isaac sa sadto nga duta, kag nagpatubas sa amo nga tuig sing isa ka gatus ka pilo. Ginpakamaayo sia sang Ginoo, 13kag ang lalaki nagmanggaranon, kag nagdugang sa pagtubo tubtub nga nagtama gid kadaku. 14May pagkabutang sia nga mga panong kag mga kabakahan, kag daku nga panimalay, gani nahisa sa iya ang mga Filistinhon. 15(Karon ang tanan nga bobon nga ginkutkut sang mga alagad sang iya amay sa kaadlawan ni Abraham nga iya amay, gintampokan sang mga Filistinhon kag ginpuno sing duta.) 16Kag si Abimelec nagsiling kay Isaac, “Halin ka sa amon; kay gamhanan ka pa sa amon.”

17Gani si Isaac nagtaliwan gikan didto, kag nagpahamtang sang dologan sa nalupyakan sang Gerar kag nagpuyo didto. 18Kag ginkutkut liwat ni Isaac ang mga bobon sang tubig nga ginkutkut sa kaadlawan ni Abraham nga iya amay; kay ang mga Filistinhon nagtampok sa ila sang patay na si Abraham; kag ginhingalanan niya sila sa mga ngalan nga gintawag sa ila sang iya amay. 19Apang sang nagkutkut ang mga alagad ni Isaac sa nalupyakan kag nakita nila didto ang isa ka bobon sang tubig nga buhi, 20ang mga manugbantay sang kahayupan sa Gerar nagpakigsuay sa mga manugbantay sang kahayupan ni Isaac, nga nagasiling, “Amon ang tubig.” Gani ginhingalanan niya ang bobon Esec,#26:20 Kon sayoron Sinuay. bangud nga nagsuay sila sa iya. 21Niyan nagkutkut sila sing isa pa ka bobon, kag nagsuay man sila nahanungud sina; gani ginhingalanan niya ini Sitna.#26:21 Kon sayoron Kaawayon. 22Kag naghalin sia gikan didto kag nagkutkut sing isa pa ka bobon, kag wala sila magsuay nahanungud sina; kag ginhingalanan niya ini Rehobot,#26:22 Kon sayoron Malapad nga mga duug. nga nagasiling, “Kay karon ang Ginoo naghatag sa aton sing duug, kag magmabungahon kita sa duta.”

23Nagtaklad sia gikan didto pa Beer-seba. 24Kag nagpahayag sa iya ang Ginoo sa among gab-i kag nagsiling, “Ako amo ang Dios ni Abraham nga imo amay; dili ka mahadluk, kay nagaupud ako sa imo kag magapakamaayo sa imo kag magapabuad sang imo mga kaliwatan tungud kay Abraham nga akon alagad.” 25Gani nagpatindug sia didto sing halaran kag nagpanawag sa ngalan sang Ginoo, kag nagpatindug sang iya layanglayang didto. Kag ang mga alagad ni Isaac nagkutkut didto sing isa ka bobon.

26Niyan si Abimelec#Gen. 21:22. nagkadto sa iya gikan sa Gerar upud si Ahuzat nga iya manuglaygay kag si Picol nga pangolo sang iya kasoldadosan. 27Si Isaac nagsiling sa ila, “Ngaa bala nagkari kamo sa akon, sa ginatan-aw nga ginadumtan ninyo ako kag ginsobol ninyo ako gikan sa inyo?” 28Nagsiling sila, “Nakita namon sing maathag nga ang Ginoo upud sa imo; gani nagasiling kami, Magmanginmay sumpa karon sa tunga nimo kag namon, kag magapakigkatipan kami sa imo, 29nga indi mo kami paghimoan sing malain, subong nga kami wala magtandug sa imo kag wala kami sing nahimo sa imo kondi maayo kag ginpalakat ka sa paghidait. Ikaw karon ang pinakamaayo sang Ginoo.” 30Gani sia naghiwat sing sinalosalo sa ila, kag nagkaon kag nag-inum sila. 31Nagbangon sila sing aga pa kag nagsumpaanay; kag si Isaac nagpalakat sa ila, kag nagtaliwan sila gikan sa iya sa paghidait. 32Sa among adlaw nag-abut ang mga alagad ni Isaac kag nagsugid sa iya nahanungud sang bobon nga nakutkut nila, kag nagsiling sa iya, “Nakakita kami sing tubig.” 33Ginhingalanan niya ini Seba; busa ang ngalan sang banwa amo ang Beer-seba tubtub sining adlaw.

34Sang si Esau kap-atan ka tuig, nagpangasawa sia kay Judit nga anak ni Beeri nga Hethanon, kag kay Basemat nga anak ni Elon nga Hethanon; 35kag nanginkapaitan sila sa espiritu ni Isaac kag ni Rebeca.

Currently Selected:

GENESIS 26: ABHIL82

Highlight

Copy