GENESIS 20

Si Abraham kag si Abimelec

1Gikan didto naglakat si Abraham nayon sa duta sang Bagatnan, kag nagpuyo sa gin-utlan sang Cades kag Sur; kag nagpanlugayaw sia sa Gerar. 2Kag si Abraham nagsiling nahanungud kay Sara nga iya asawa, “Utud ko sia.”#Gen. 12:13; 26:7. Kag si Abimelec nga hari sa Gerar nagpadala, kag nagpakuha kay Sara. 3Apang ang Dios nag-abut kay Abimelec sa damgo sang kagab-ihon, kag nagsiling sa iya, “Yari karon, patay ka gid nga tawo, bangud sang babayi nga ginkuha mo; kay may bana sia.” 4Karon si Abimelec wala makapalapit sa iya; gani nagsiling sia, “Ginoo, patyon mo bala bisan ang katawohan nga matarung? 5Wala bala sia gid magsiling sa akon, ‘Utud ko sia nga babayi? Kag bisan sia gid nagsiling, ‘Utud ko sia nga lalaki.’ Sa kalubus sang akon tagiposoon kag sa katinlo sang akon kamut ginhimo ko ini.” 6Niyan nagsiling sa iya ang Dios sa damgo, “Hoo, nakahibalo ako nga sa kalubus sang imo tagiposoon nahimo mo ini, kag ako man nagpugung sa imo sa pagpakasala batok sa akon; busa wala ko ikaw pagtuguti sa pagtandug sa iya. 7Niyan karon iuli ang asawa sa iya bana; kay manalagna sia, kag magapangamuyo sia tungud sa imo, kag magakabuhi ka. Apang kon ikaw indi mag-uli sa iya, kilalaha nga sa pagkamatuud mapatay ka, ikaw, kag ang tanan nga imo.”

8Kag si Abimelec nagbangon sing aga pa, kag gintawag ang tanan niyang mga alagad, kag nagsugid sini tanan nga butang sa ila; kag nahadluk ang mga tawo sing tama. 9Niyan gintawag ni Abimelec si Abraham, kag nagsiling sa iya, “Ano bala ang ginhimo mo sa amon? Kag sa ano bala nakasala ako batok sa imo, nga gindala mo ang dakung sala sa akon kag sa akon ginharian? Nakahimo ka sa akon sing mga buhat nga indi dapat himoon.” 10Kag si Abimelec nagsiling kay Abraham, “Ano bala ang ginahunahuna mo, nga nahimo mo ining butang?” 11Si Abraham nagsiling, “Ginhimo ko ini bangud nga naghunahuna ako, Wala gayud sing kahadluk sa Dios sa sining duug, kag patyon nila ako bangud sa akon asawa. 12Labut pa utud ko gid sia nga babayi, anak sang akon amay apang indi anak sang akon iloy; kag nangin-asawa ko sia. 13Kag sang ginpapanlugayaw ako sang Dios gikan sa balay sang akon amay, ako nagsiling sa iya, ‘Ini amo ang pagkaayo nga ipakita mo sa akon: sa tagsa ka duug nga maabutan ta, isiling nahanungud sa akon, Utud ko sia nga lalaki.’” 14Niyan si Abimelec nagkuha sing mga carnero kag mga baka, kag mga alagad nga lalaki kag babayi, kag ginhatag sila kay Abraham, kag gin-uli sa iya si Sara nga iya asawa. 15Kag si Abimelec nagsiling, “Yari karon, ang akon duta yara sa imo atubangan; puyo ka sa diin ang luyag mo.” 16Kay Sara nagsiling sia, “Yari karon, ginhatagan ko sing isa ka libo ka bilog nga pilak ang imo utud nga lalaki; ini panabon sa imo sa mga mata sang tanan nga nagaupud sa imo; kag sa atubangan sang tanan napakamatarung ka.” 17Niyan si Abraham nagpangamuyo sa Dios; kag gin-ayo sang Dios si Abimelec, kag ang iya asawa man kag mga alagad nga babayi sa bagay nga nag-anak sila. 18Kay gintakpan sang Ginoo ang tanan nga taguangkan sang panimalay ni Abimelec bangud kay Sara, asawa ni Abraham.

Currently Selected:

GENESIS 20: ABHIL82

Highlight

Copy