GENESIS 17

Ang Circuncision Tanda sang Katipan

1Sang si Abram kasiaman kag siam ka tuig ang Ginoo nagpahayag kay Abram, kag nagsiling sa iya, “Ako Dios nga Makaako; maggawi ka sa atubangan nakon, kag maghimpit ka. 2Kag magahimo ako sang akon katipan sa tunga nimo kag nakon, kag magapabuad sa imo sing lakas.” 3Niyan si Abram naghapa; kag ang Dios nagsiling sa iya, 4“Yari karon, ang akon katipan upud sa imo, kag mangin-amay ka sang kadam-an sang mga pungsud. 5Indi na ikaw pagtawgon nga Abram,#17:5 Kon sayoron Ginpakataas nga amay kondi ang imo ngalan Abraham;#17:5 Kon sayoron Amay sang isa ka kadam-an. kay ginhimo ko ikaw nga amay sang kadam-an sang mga pungsud.#Roma 4:17. 6Pabungahon ko ikaw sing tama; kag himoon ko ang mga pungsud gikan sa imo, kag mga hari magagikan sa imo. 7Kag ako magatukud sang akon katipan sa tunga nakon kag nimo kag sa imo mga kaliwatan sa olihi nimo sa bug-os nila nga mga kaliwatan nga katipan nga dayon,#Luc. 1:55. nga mangin-Dios sa imo kag sa imo mga kaliwatan sa olihi nimo. 8Kag ihatag ko sa imo, kag sa imo mga kaliwatan sa olihi nimo, ang duta nga imo ginpanglugayawan, ang bug-os nga duta sang Canaan, nga kaugalingon nga dayon;#Binu. 7:5. kag mangin-ila Dios ako.”

9Kag ang Dios nagsiling kay Abraham, “Nahanungud sa imo, magbantay ka sang akon katipan, ikaw kag ang imo mga kaliwatan sa olihi nimo sa bug-os nila nga mga kaliwatan. 10Ini among akon katipan, nga bantayan ninyo, sa tunga nakon kag nimo kag sa imo mga kaliwatan sa olihi nimo: circuncidahon ang tagsa ka lalaki sa tunga ninyo.#Binu. 7:8. 11Circuncidahon kamo sa unud sang inyo napunta nga panit, kag ini mangintanda sang katipan sa tunga nakon kag ninyo. 12Sia nga walo ka adlaw sa inyo tunga circuncidahon; ang tagsa ka lalaki sa bug-os ninyo nga mga kaliwatan, bisan ang natawo sa balay, ukon ginbakal sing cuarta sa bisan kay sin-o nga dumuloong nga indi sa imo kaliwat, 13tingub ang natawo sa imo balay kag ang ginbakal sang imo cuarta, circuncidahon. Gani ang akon katipan mangindayon nga katipan sa inyo unud. 14Ang lalaking dicircuncidado nga wala macircuncidar sa unud sang iya napunta nga panit utdon gikan sa iya katawohan; nalalis niya ang akon katipan.”

15Kag ang Dios nagsiling kay Abraham, “Nahanungud kay Sarai nga imo asawa, indi ka magtawag sa iya nga Sarai, kondi Sara#17:15 Kon sayoron Harianon nga babayi. ang iya ngalan. 16Pakamaayohon ko sia, kag labut pa hatagan ko ikaw sa iya sing anak nga lalaki; pakamaayohon ko sia, kag mangin-iloy sia sang mga pungsud; mga hari sang mga katawohan magagikan sa iya.” 17Niyan si Abraham naghapa kag nagkadlaw, kag nagsiling sa iya tagiposoon, “Mangin-amay bala sang isa ka anak ang tawo nga isa ka gatus ka tuig? Si Sara, nga kasiaman ka tuig, magabata pa bala?” 18Kag si Abraham nagsiling sa Dios, “Kabay kuntani nga magkabuhi si Ismael sa atubangan mo!” 19Ang Dios nagsiling, “Indi, kondi si Sara nga imo asawa magapanganak sa imo sing anak nga lalaki, kag hingalanan mo sia Isaac.#17:19 Kon sayoron Nagakadlaw sia. Magapakigkatipan ako sa iya subong nga dayon nga katipan nga sa iya mga kaliwatan sa olihi niya. 20Nahanungud kay Ismael, napamatian ko ikaw; yari karon, pakamaayohon ko sia kag himoon ko sia nga mabungahon kag pabuaron ko sia sing lakas; mangin-amay sia sang napulog duha ka principe, kag himoon ko sia nga dakung pungsud. 21Apang magapakigkatipan ako kay Isaac, nga ipanganak sa imo ni Sara sa sining napat-ud nga tion sa tuig nga masonod.”

22Sang nag-untat sia sa pagpakighambal sa iya, nagpaibabaw ang Dios gikan kay Abraham. 23Niyan ginkuha ni Abraham si Ismael nga iya anak kag ang tanan nga ulipon nga natawo sa iya balay ukon ang nabakal sang iya cuarta, ang tagsa ka lalaki sa mga tawo sa balay ni Abraham, kag gincircuncidar niya ang unud sang ila napunta nga panit sa among adlaw, sono sa nasiling sa iya sang Dios. 24Si Abraham kasiaman kag siam ka tuig sang gincircuncidar sia sa unud sang iya napunta nga panit; 25kag si Ismael nga iya anak napulo kag tatlo ka tuig sang gincircuncidar sa unud sang iya napunta nga panit. 26Sa among adlaw gincircuncidar si Abraham kag si Ismael nga iya anak; 27kag ang tanan nga lalaki sa iya balay, ang mga natawo sa balay kag ang mga ginbakal sing cuarta sa dumuloong, gincircuncidar upud sa iya.

Currently Selected:

GENESIS 17: ABHIL82

Highlight

Copy