ESDRAS 10
10
Ang mga Dumuloong nga mga Asawa kag Kabataan Ginasikway
1Samtang nagpangamuyo si Esdras kag nagtu-ad, nga nagahibi kag nagahapa sa atubangan sang balay sang Dios, may nagtipon sing tingub sa iya nga tama kadaku nga katilingban nga mga lalaki, mga babayi, kag mga kabataan gikan sa Israel; kay naghibi sing tama gid ang katawohan. 2Kag si Sekanias nga lalaking anak ni Jehiel, isa sang mga lalaking anak ni Elam, nagsiling kay Esdras: “Naglapas kami batok sa aton Dios kag nagpangasawa sing dumuloong nga mga babayi gikan sa mga katawohan sang duta, apang karon may paglaum pa nga sa Israel nahanungud sini nga butang. 3Busa karon magpakigkatipan kita sa aton Dios sa pagsikway sang tanan nga babayi kag sang mga natawo sa ila, sono sa laygay sang akon ginoo, kag sang mga nagakurug sa sogo sang aton Dios; kag himoon ini sono sa kasogoan. 4Tindug ka, kay ang butang naigo sa imo, kag kami upud sa imo; magpakaisug ka kag himoa ini.” 5Niyan nagtindug si Esdras kag ginpasumpa ang mga puno sang mga sacerdote kag ang mga Levinhon kag ang bug-os nga Israel nga maghimo sila sono sa sini nga polong. Gani nagsumpa sila.
6Niyan nagtindug si Esdras gikan sa atubangan sang balay sang Dios, kag nagsulud sa hulut ni Johanan nga lalaking anak ni Eliasib, kag sang didto sia wala sia magkaon sing kalan-on ukon mag-inum sing tubig; kay naglalaw sia bangud sang paglapas sang mga sa kabihagan. 7Kag nagpabantala sila sa bug-os nga Juda kag Jerusalem sa tanan nga anak sang kabihagan nga magtipon sila sing tingub sa Jerusalem, 8kag ang bisan sin-o nga indi mag-abut sa sulud sang tatlo ka adlaw, sono sa ginkasugtanan sang mga principe kag mga tigulang tagudilian ang bug-os niya nga pagkabutang, kag pabulagon sia sa katilingban sang kabihagan.
9Niyan ang tanan nga lalaki sang Juda kag Benjamin nagtipon sing tingub sa Jerusalem sa sulud sang tatlo ka adlaw; ini sa ikasiam nga bulan, sa ikaduha ka pulo nga adlaw sang bulan. Kag naglingkod ang bug-os nga katawohan sa masangkad nga duug sa atubangan sang balay sang Dios, nga nagakurug bangud sini nga butang kag bangud sang daku nga ulan. 10Kag nagtindug si Esdras nga sacerdote kag nagsiling sa ila, “Kamo nakalapas kag nakapangasawa sing dumuloong nga mga babayi, sa pagdugang sang pagpakasala sang Israel. 11Busa karon, magtu-ad kamo sa Ginoo ang Dios sang inyo mga ginikanan, kag maghimo sang iya nahamut-an; kag bulag kamo sa mga katawohan sang duta kag sa dumuloong nga mga babayi.” 12Niyan ang bug-os nga katilingban nagsabat sa mabaskug nga tingug, “Subong sang imo ginsiling sa amon, amo ang dapat namon himoon. 13Apang ang katawohan madamu, kag tion sang madamu nga ulan; kami indi makasarang magtindug sa gowa. Ini indi buluhaton sa isa ka adlaw ukon sa duha; kay kami nakalalis sing daku sa sining butang. 14Itangdo karon ang amon mga principe tungud sa bug-os nga katilingban; ang tanan sa aton mga banwa nga nakapangasawa sing dumuloong nga babayi magkari sa pinat-ud nga mga tion, kag upud sa ila ang mga tigulang sang tagsa ka banwa kag ang ila mga hukom, tubtub nga ang masingkal nga kaakig sang aton Dios maghalin sa amon, tubtub nga matigayon ining butang.” 15Si Jonatan lamang nga lalaking anak ni Asael kag si Jahaz nga lalaking anak ni Ticva nagbatok sini, kag si Mesullam kag si Sabetai nga Levinhon nagbulig sa ila.
16Niyan ang mga anak sang kabihagan naghimo sing subong. Si Esdras nga sacerdote, pati sang pila ka mga pangolo sang mga kabaranggayan, sono sa ila mga kabaranggayan, tanan sila sono sa ila mga ngalan ginpain. Naglingkod sila sa nahauna nga adlaw sang ikanapulong bulan sa pag-usisa sang butang; 17kag natapus nila ang tanan nga lalaki nga nakapangasawa sing dumuloong nga mga babayi sa nahaunang adlaw sang nahaunang bulan.
18Sa tunga sang mga lalaking anak sang mga sacerdote may nasapwan nga nakapangasawa sing dumuloong nga mga babayi nga amo sa mga lalaking anak ni Jesua, ang lalaking anak ni Josadac kag sa iya mga utud, si Maasias, si Eliezer, si Jarib, kag si Gedalias. 19Naghatag sila sang ila kamut nga isikway nila ang ila mga asawa, kag subong nga nagpakasala naghalad sila sing carnero gikan sa panong tungud sa ila pagpakasala. 20Gikan sa mga lalaking anak ni Imer: si Hanani kag si Zebadias. 21Gikan sa mga lalaking anak ni Harim: sila ni Maasias, Elias, Semaya, Jehiel, kag Uzias. 22Gikan sa mga lalaking anak ni Pasur: sila ni Elioenai, Maasias, Ismael, Natanael, Jozabad, kag Elasa.
23Gikan sa mga Levinhon: sila ni Jozabad, Simei, Kelaya (nga amo, si Kelita), Petahias, Juda, kag Eliezer. 24Gikan sa mga manug-amba: si Eliasib. Gikan sa mga manugbantay sang gawang: si Sallum, si Telem, kag si Uri.
25Kag gikan sa Israel: gikan sa mga lalaking anak ni Paros: sila ni Ramia, Izias, Malquias, Miamin, Eleazar, Malquias, kag Benaya. 26Gikan sa mga lalaking anak ni Elam: sila ni Matanias, Zacarias, Jehiel, Abdi, Jeremot, kag Elias. 27Gikan sa mga lalaking anak ni Zatu: sila ni Elioenai, Eliasib, Matanias, Jeremot, Zabad, kag Asisa. 28Gikan sa mga lalaking anak ni Bebai: sila ni Johanan, Hananias, Zabai, kag Atlai. 29Gikan sa mga lalaking anak ni Bani: sila ni Mesullam, Malluc, Adaya, Jasub, Seal, kag Ramot. 30Gikan sa mga lalaking anak Pahat-moab: sila ni Adna, Kelal, Benaya, Maasias, Matanias, Bezalel, Binui, kag Manases. 31Gikan sa mga lalaking anak ni Harim: sila ni Eliezer, Isya, Malquias, Semaya, Simeon, 32Benjamin, Malluc, kag Semarias. 33Gikan sa mga lalaking anak ni Hasum: sila ni Matenai, Matata, Zabad, Elifelet, Jeremai, Manases, kag Simei. 34Gikan sa mga lalaking anak ni Bani: sila ni Maadai, Amram, Uel, 35Benaya, Bedias, Keluhu, 36Vanias, Meremot, Eleasib, 37Matanias, Matenai, Jaas. 38Gikan sa mga lalaking anak ni Bani: sila ni Simei, 39Selemias, Natan, Adaya, 40Macnadbai, Sasai, Sarai, 41Azarel, Selemias, Semarias, 42Sallum, Amarias, kag Jose. 43Gikan sa mga lalaking anak ni Nebo: sila ni Jeiel, Matitias, Zabad, Zebina, Iddo, Joel, kag Benaya. 44Ini tanan nakapangasawa sing mga dumuloong, kag ila sila ginsikway pati ang ila mga anak.
Currently Selected:
ESDRAS 10: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
