EZEQUIEL 44

1Niyan ginpabalik niya ako paagi sa alagyan sang nagowa nga gawang sang santuario, nga nagaatubang sa sidlangan; kag natakpan ini. 2Kag nagsiling sa akon ang Ginoo, “Ini nga gawang takpan; dili ini pagbuksan, kag wala sing bisan sin-o nga tawo nga magsulud paagi sini; kay ang Ginoo, ang Dios sang Israel, nagsulud paagi sini; busa takpan ini. 3Nahanungud sa principe magalingkod sia sa iya subong nga principe sa pagkaon sing kalan-on sa atubangan sang Ginoo; magasulud sia paagi sa alagyan sang portico sang gawang, kag magagowa paagi sa amo man nga alagyan.”

4Niyan gindala niya ako paagi sa alagyan sang naaminhan nga gawang sa atubangan sang templo; kag nagtolok ako, kag yari karon, ang himaya sang Ginoo nagpuno sang templo sang Ginoo; kag naghapa ako. 5Kag ang Ginoo nagsiling sa akon, “Anak sang tawo, tandai sing maayo, kag toloka sang imo mga mata, kag pamatii sang imo mga idulungug ang tanan nga ginasiling ko sa imo nahanungud sa tanan nga pagsolondan sang templo sang Ginoo kag sang tanan niya nga kasogoan; kag tandai sing maayo ang salamputan sang templo, pati ang tagsa ka golowaan sang santuario. 6Kag isiling mo sa mga mabinatoon, sa panimalay sang Israel, Amo ini ang ginasiling sang Ginoong Dios: O kamo nga panimalay sang Israel, tuman na kamo sang tanan ninyo nga kangil-aran, 7nga ginpasulud ninyo ang mga dumuloong, nga dicircuncidado sa tagiposoon kag sa unud, nga manginsa akon santuario, sa pagpasipala sini, ang akon templo sang ginahalad ninyo ang akon tinapay, ang sapay kag ang dugo. Ginbungkag nila ang akon katipan, sa pagdugang sa tanan ninyo nga kangil-aran. 8Kag wala ninyo pagbantayi ang tinulin sang akon mga butang nga balaan; kondi ginbutangan ninyo sing mga manugbantay sa akon tinulin sa akon santuario sa tal-us ninyo.

9“Amo ini ang ginasiling sang Ginoong Dios: Wala sing dumuloong, nga dicircuncidado sa tagiposoon kag sa unud, nga magsulud sa akon santuario gikan sa bisan ano nga dumuloong nga yara sa tunga sang katawohan sang Israel. 10Apang ang mga Levinhon nga nagpalayo sa akon, sang nagtalang ang Israel nga nagtalang gikan sa akon sa pagsonod sang ila mga diosdios, magaantus sila sang ila kalautan. 11Apang mangin-alagad sila sa akon santuario, nga nagatatap sang mga gawang sang templo, kag nagaalagad sa templo; mag-ihaw sila sang halad-nga-sinonog kag sang halad tungud sa katawohan, kag magatindug sila sa atubangan nila, sa pag-alagad sa ila. 12Bangud nga nag-alagad sila sa ila sa atubangan sang ila mga diosdios kag nanginkasandaran nga kalautan sa panimalay sang Israel, busa ginbayaw ko ang akon kamut batok sa ila, nagasiling ang Ginoong Dios, kag magaantus sila sang ila kalautan. 13Indi sila magpalapit sa akon, sa pagpanghikot sang palangakoan sang pagkasacerdote sa akon, ukon magpalapit sa bisan ano sang akon mga butang nga balaan kag sa mga butang nga labi gid ka balaan; kondi magaantus sila sang ila kahuluy-an, kag sang ila mga kangil-aran nga ginhimo nila. 14Apang himoon ko sila nga mga manugbantay sang tinulin sang templo, sa tanan nga pag-alagdan sini kag sa tanan nga himoon sa sini.

15“Apang ang mga sacerdote nga mga Levinhon, ang mga anak ni Sadoc, nga nagbantay sang tinulin sang akon santuario sang magbiya sa akon ang katawohan sang Israel, sila magapalapit sa akon sa pag-alagad sa akon; kag sila magatindug sa atubangan nakon sa pagdolot sa akon sang sapay kag sang dugo, nagasiling ang Ginoong Dios; 16magasulud sila sa akon santuario, kag magapalapit sila sa akon latok, sa pag-alagad sa akon, kag magabantay sila sang akon tinulin. 17Kon magsulud sila sa mga gawang sang nasulud nga luwang, magapanaput sila sang mga panapton nga lino; wala sing dilana nga magdapat sa ila, samtang nagaalagad sila sa mga gawang sang nasulud nga luwang, kag sa sulud. 18Maggamit sila sa ila olo sing mga pulus nga lino, kag mga puroy nga lino sa ila mga balikawang;#Ex. 28:39-43; Lev. 16:4. dili sila magsuklub sang makapabalhas. 19Kag kon maggowa sila pakadto sa nagowa nga luwang sa nagowa nga luwang sa katawohan, ubahon nila ang mga panapton nga ginaalagad nila, kag ibutang sila sa mga hulut nga balaan;#Lev. 16:23. kag magsuklub sila sang iban nga mga panapton, agud nga indi nila mapakabalaan ang katawohan sang ila mga panapton. 20Dili nila pagkiskisan ang ila olo ukon palabaon ang ila mga bohok nga nagabunghay;#Lev. 21:5. guntingan lamang nila ang bohok sang ila mga olo. 21Wala sang bisan sin-o sang mga sacerdote nga mag-inum sing alak, kon magsulud sila sa nasulud nga luwang.#Lev. 10:9. 22Dili sila magpangasawa sing balo, ukon sinikway, kondi magpangasawa sila sing mga ulay gikan sa kaliwat sang panimalay sang Israel, ukon balo nga balo sang sacerdote.#Lev. 21:7, 13-14. 23Tudloan nila ang akon katawohan sang katuhayan sang balaan kag dibalaan, kag pahantupon sila sang dimatinlo kag sang matinlo.#Lev. 10:10. 24Sa kasuayon magatindug sila sa paghukom, sono sa akon mga pagsolondan hukman nila ini. Bantayan nila ang akon mga kasogoan kag ang akon mga palatukuran sa tanan ko nga piesta nga pinat-ud, kag pakabalaanon nila ang akon mga inugpahuway. 25Dili sila magpalapit sa patay nga tawo sa pagdagta sang ila kaugalingon;#Lev. 21:1-4. apang tungud sa amay ukon tungud sa iloy, tungud sa anak nga lalaki ukon tungud sa anak nga babayi, tungud sa utud nga lalaki ukon tungud sa utud nga babayi nga wala makapamana sarang sila makapadagta. 26Sa tapus nga matinloan sia, isipan nila sia sing pito ka adlaw. 27Kag sa adlaw nga magsulud sia sa santuario, sa nasulud nga luwang, sa pag-alagad sa santuario, magdolot sia sang iya halad-tungud-sa-sala, nagasiling ang Ginoong Dios.

28“May panublion sila;#Num. 18:20. ako ang ila panublion: kag dili ninyo sila paghatagan sing kaugalingon sa Israel; ako ang ila kaugalingon. 29Magakaon sila sang halad-nga-kalan-on, sang halad-tungud-sa-sala, kag sang halad-sa-paglapas; kag ang tagsa ka napahanungud nga butang sa Israel mangin-ila. 30Kag ang ali sang tanan nga nahauna nga bunga sang tagsa ka butang, kag ang tagsa ka halad sang tagsa ka butang sang tanan ninyo nga halad, mangin-iya sang sacerdote; ihatag man ninyo sa mga sacerdote ang nahauna sang inyo linamas, sa pagpaabut sing pagpakamaayo sa imo panimalay.#Num. 18:8-19. 31Ang mga sacerdote dili magkaon sang bisan ano nga butang nga napatay sa iya kaugalingon, ukon kinusnit, bisan ini pispis ukon sapat.#Lev. 22:8.

Currently Selected:

EZEQUIEL 44: ABHIL82

Highlight

Copy