EZEQUIEL 40

Ang Palanan-awon nahanungud sa Templo

1Sa ikaduha kapulo kag lima nga tuig sang amon kabihagan, sa pagpamuno sang tuig, sa ikapulo nga adlaw sang bulan, sa ikapulo kag apat nga tuig sa tapus nga ginsamad ang banwa, sa sadto gid nga adlaw, yara sa akon ang kamut sang Ginoo, kag gindala niya ako didto, 2sa mga palanan-awon sang Dios gindala niya ako sa duta sang Israel, kag ginpalingkod ako sa ibabaw sang bukid nga mataas gid, nga sa ibabaw niya daw yara ang pagbalayon sang banwa sa bagatnan.#Bug. 21:10. 3Sang gindala niya ako didto, yari karon, may lalaki, nga ang iya dagway kaangay sang dagway sang saway, nga may latid nga lino sa iya kamut kag tabon-ak nga inugtakus;#Bug. 11:1; 21:15. kag nagtindug sia sa gawang. 4Kag ang lalaki nagsiling sa akon, “Anak sang tawo, tan-awa sang imo mga mata, kag pamatii sang imo mga idulungug, kag ihuyug ang imo tagiposoon sa tanan nga ipakita ko sa imo, kay sa katuyoan nga mapakita ko sila sa imo gindala ka diri; ipahayag sa panimalay sang Israel ang tanan nga imo makita.”

5Kag yari karon, isa ka kuta sa gowa sang templo sa palibut,#1 Hari 6:1-38; 2 Cron. 3:1-9. kag sa kamut sang tawo may tabon-ak nga inugtakus nga anum ka maniko ang kalaba, nga isa ka maniko kag dapal ang tagsatagsa; gani gintakus niya ang kadamul sang templo, isa ka tabon-ak; kag ang kataas, isa ka tabon-ak. 6Niyan nag-abut sia sa gawang nga nagaatubang nayon sa sidlangan, kag nagsaka sia sa iya mga alintaga, kag gintakus niya ang atangan sang gawang, isa ka tabon-ak ang kasangkad; kag ang isa pa ka atangan, isa ka tabon-ak ang kasangkad; 7kag ang tagsa ka hulut isa ka tabon-ak kalaba, kag isa ka tabon-ak kasangkad; kag ang antad sa tunga sang mga hulut, lima ka maniko; kag ang atangan sang gawang sa ubay sang portico sang gawang nayon sa balay, isa ka tabon-ak. 8Gintakus man niya ang portico sang gawang nayon sa balay, isa ka tabon-ak; 9niyan gintakus niya ang portico sang gawang, walo ka maniko; kag ang iya mga haligi, duha ka maniko; kag ang portico sang gawang nayon sa balay. 10Kag ang mga hulut sang gawang nayon sa sidlangan tatlo sa sini nga kilid kag tatlo sa sina nga kilid; sila nga tatlo isa ka takus; kag ang mga haligi isa ka takus sa sini nga kilid kag sa sina nga kilid. 11Niyan gintakus niya ang kasangkaron sang buka sang gawang, napulo ka maniko; kag ang kalabaon sang gawang, napulo kag tatlo ka maniko. 12Ang alagyan sa atubangan sang mga hulut, isa ka maniko sa sini nga kilid kag ang alagyan isa ka maniko sa sina nga kilid; kag ang mga hulut anum ka maniko sa sini nga kilid kag anum ka maniko sa sina nga kilid. 13Niyan gintakus niya ang gawang kutub sa atop sang isa ka hulut tubtub sa atop sang isa pa, ang kasangkaron duha ka pulo kag lima ka maniko, sa ganhaan pa ganhaan. 14Naghimo man sia sing mga haligi, kan-uman ka maniko; kag ang luwang tubtub sa mga haligi palibut sa gawang. 15Kutub sa atubangan sang gawang sa salamputan tubtub sa atubangan sang nasulud nga portico sang gawang kalim-an ka maniko. 16Kag may mga talambuan nga natakpan sa mga hulut, kag sa ila mga haligi sa sulud sang gawang palibut, kag subong man sa mga arko kag ang mga talambuan palibut nayon sa sulud, kag sa tagsa ka haligi may mga palma.

17Niyan ginpasulud niya ako sa nagowa nga luwang; kag yari karon, may mga hulut kag salog nga nabatohan, nga ginhimo palibut sa luwang; katloan ka hulut nga yara sa salog nga nabatohan. 18Kag ang salog nga nabatohan yara sa kilid sang mga gawang, nga sibo sa kalabaon sang mga gawang; ini amo ang naubus nga nabatohan. 19Niyan gintakus niya ang kasangkaron kutub sa atubangan sang gawang nga naidalum tubtub sa atubangan sang nasulud nga luwang sa gowa, isa ka gatus ka maniko sa sidlangan kag sa aminhan.

20Niyan ang gawang sang nagowa nga luwang nga nagaatubang nayon sa aminhan gintakus niya ang kalabaon sini kag ang kasangkaron sini. 21Ang iya mga hulut, tatlo sa sini nga kilid kag tatlo sa sina nga kilid, kag ang iya mga haligi kag ang iya mga arko sono sa takus sang nahauna nga gawang; kalim-an ka maniko ang iya kalabaon, kag duha ka pulo kag lima ka maniko ang iya kasangkaron. 22Kag ang iya mga talambuan, ang iya mga arko, kag ang iya mga palma sono sa takus sang gawang nga nagaatubang nayon sa sidlangan; kag nagsaka sila sa sini paagi sa pito ka alintaga; kag ang iya mga arko yara sa atubangan nila. 23Kag may gawang sa nasulud nga luwang sa tampad sang isa ka gawang, ang duha sa aminhan kag sa sidlangan; kag gintakus niya sa gawang pa gawang, isa ka gatus ka maniko.

24Kag gindala niya ako nayon sa bagatnan, kag yari karon, ang gawang nayon sa bagatnan; kag gintakus niya ang iya mga haligi kag ang iya mga arko sono sa sini nga mga takus. 25Kag may mga talambuan sa sini kag sa iya mga arko palibut, kaangay sadto nga mga talambuan; ang kalabaon kalim-an ka maniko, kag ang kasangkaron duha ka pulo kag lima ka maniko. 26Kag may pito ka alintaga sa pagsaka sa sini, kag ang iya mga arko yara sa atubangan nila; kag ini may mga palma, isa sa sini nga kilid kag isa sa sina nga kilid sa iya mga haligi. 27Kag may gawang sa nasulud nga luwang nayon sa bagatnan; kag gintakus niya sa gawang pa gawang nayon sa bagatnan, isa ka gatus ka maniko.

28Niyan gindala niya ako sa nasulud nga luwang sa luyo sang gawang nga nabagatnan, kag gintakus niya ang gawang nga nabagatnan sono sa sini nga mga takus. 29Ang iya mga hulut, ang iya mga haligi, kag ang iya mga arko sono sa sini nga mga takus; kag may mga talambuan sa sulud sini kag sa iya mga arko palibut; ini kalim-an ka maniko ang kalabaon kag duha ka pulo kag lima ka maniko ang kasangkaron. 30Kag may mga arko sa palibut, nga duha ka pulo kag lima ka maniko ang kalabaon kag lima ka maniko ang kasangkaron. 31Ang iya mga arko nayon sa nagowa nga luwang, kag may mga palma sa iya mga haligi, kag ang salakaan sa sini may walo ka alintaga.

32Niyan ginpasulud niya ako sa nasulud nga luwang nayon sa sidlangan, kag gintakus niya ang gawang sono sa sini nga mga takus. 33Ang iya mga hulut, ang iya mga haligi, kag ang iya mga arko sono sa sini nga mga takus; kag may mga talambuan sa sini kag sa iya mga arko palibut; ini kalim-an ka maniko ang kalabaon, kag duha ka pulo kag lima ka maniko ang kasangkaron. 34Ang iya mga arko nayon sa nagowa nga luwang, kag may mga palma sa iya mga haligi, sa sini nga kilid kag sa sina nga kilid; kag ang salakaan sa sini may walo ka alintaga.

35Niyan gindala niya ako sa gawang nga naaminhan, kag gintakus niya ini sono sa sini nga mga takus. 36Ang iya mga hulut, ang iya mga haligi, kag ang iya mga arko; kag may mga talambuan sa sini palibut; ang kalabaon kalim-an ka maniko, kag ang kasangkaron duha ka pulo kag lima ka maniko. 37Ang iya mga haligi nayon sa nagowa nga luwang, kag may mga palma sa iya mga haligi, sa sini nga kilid kag sa sina nga kilid; kag ang salakaan sa sini may walo ka alintaga.

38Ang hulut nga may iya nga ganhaan yara sa luyo sang mga haligi sa mga gawang, didto ginhugasan nila ang halad-nga-sinonog. 39Kag sa portico sang gawang may duha ka latok sa sini nga kilid kag duha ka latok sa sina nga kilid nga ihawan sang halad-nga-sinonog kag sang halad-tungud-sa-sala kag sang halad-sa-paglapas. 40Kag sa isa ka kilid sa gowa sa nagasaka ang isa sa salamputan sang gawang nayon sa aminhan may duha ka latok; kag sa isa pa ka kilid nga iya sang portico sang gawang may duha ka latok. 41Apat ka latok yari sa sini nga kilid, kag apat ka latok sa sina nga kilid sa luyo sang kilid sang gawang, walo ka latok, nga ihawan nila sang mga halad. 42Kag may apat ka latok nga sa halad-nga-sinonog nga binasbasan nga bato, isa ka maniko kag tunga ang kalabaon, kag isa ka maniko kag tunga ang kasangkaron, kag isa ka maniko ang kataason, nga gintungtungan nila sang mga gamit nga gin-ihaw nila sang halad-nga-sinonog kag sang halad. 43Kag ang mga kaw-it, nga isa ka dapal kalaba, natakud sa sulud palibut. Kag sa ibabaw sang mga latok yara ang unud sang halad.

44Niyan sa gowa sang nasulud nga gawang yara ang mga hulut nga sa mga manug-amba sa nasulud nga luwang, nga yara sa kilid sang gawang nga naaminhan, kag nagaatubang sila nayon sa bagatnan, ang isa sa kilid sang gawang nga nasidlangan nga nagaatubang nayon sa aminhan. 45Kag nagsiling sia sa akon, Ini nga hulut nga nagaatubang nayon sa bagatnan iya sang mga sacerdote nga mga manugtatap sang tinulin sang templo, 46kag ang hulut nga nagaatubang nayon sa aminhan iya sang mga sacerdote nga mga manugtatap sang tinulin sang halaran; ini sila amo ang mga anak ni Sadoc, nga gikan sa mga anak ni Levi nagapalapit sa Ginoo sa pag-alagad sa iya. 47Kag gintakus niya ang luwang, isa ka gatus ka maniko ang kalabaon, kag ang kasangkaron isa ka gatus ka maniko, kasilo; kag ang halaran yara sa atubangan sang templo.

48Niyan gindala niya ako sa portico sang templo kag gintakus ang tagsa ka haligi sang portico, lima ka maniko sa sini nga kilid; kag lima ka maniko sa sina nga kilid; kag ang kasangkaron sang gawang tatlo ka maniko sa sini nga kilid, kag tatlo ka maniko sa sina nga kilid. 49Ang kalabaon sang portico duha ka pulo ka maniko, kag ang kasangkaron napulo kag isa ka maniko; sa mga alintaga nga ginsakaan nila sa sini; kag may mga haligi sa luyo sang mga bakalan nga isa sa sini nga kilid kag isa pa sa sina nga kilid.

Currently Selected:

EZEQUIEL 40: ABHIL82

Highlight

Copy