EZEQUIEL 38

Ang Tagna batok kay Gog

1Ang polong sang Ginoo nag-abut sa akon: 2“Anak sang tawo, iatubang ang imo nawung nayon kay Gog, sa duta sang Magog,#Bug. 20:8. ang principe sang Ros, sang Mesec kag sang Tubal, kag tagna batok sa iya 3kag isiling, Amo ini ang ginasiling sang Ginoong Dios: Yari karon, batok ako sa imo, O Gog, principe sang Ros, sang Mesec kag sang Tubal; 4kag palisoon ko ikaw, kag butangan sing mga kaw-it ang imo mga sulang, kag pagowaon ko ikaw, kag ang bug-os mo nga hangaway, mga kabayo kag mga manugkabayo, tanan sila nga napanaptan sa bug-os nga hinganib, isa ka daku nga kabon, nga may kalasag kag taming, tanan sila nga nagauyat sing mga espada; 5ang Persia, ang Cus, kag ang Put upud sa ila, tanan sila nga may taming kag pandong; 6ang Gomer kag ang tanan niya nga guban; ang panimalay ni Togarma sa naukbung gid nga mga bahin sang aminhan kag ang tanan niya nga guban—ang madamu nga katawohan upud sa imo.

7“Mag-aman ka kag amana ang imo kaugalingon, ikaw kag ang tanan mo nga kabon nga natipon sa imo, kag manginbantay ka sa ila. 8Sa tapus ang madamu nga adlaw duawon ka; sa olihi nga mga tuig magasulud ka sa duta nga ginabawi sa espada, nga ginatipon gikan sa madamu nga katawohan sa kabukiran sang Israel, nga nangindayon nga kawagwagan; apang ginapagowa ini sa mga katawohan kag magapuyo sila sing malig-on, tanan sila. 9Magataklad ka, magaabut ka kaangay sang unus, manginkaangay ka sang gal-um nga magatabon sang duta, ikaw kag ang tanan mo nga guban, kag ang madamu nga mga katawohan upud sa imo.

10“Amo ini ang ginasiling sang Ginoong Dios: Sa sadto nga adlaw ang mga butang magaabut sa imo painoino, kag magpadugi ka sing malaut nga pahito 11kag magasiling ka, ‘Magataklad ako sa duta sang mga minoro nga wala sing kuta; magakadto ako sa ila nga nagapahimonong nga nagapuyo sing malig-on, tanan sila nga nagapuyo nga wala sing mga kuta, kag wala sing mga pintal ukon mga gawang’; 12sa pagkuha sang inagaw kag sa pagkuha sang inati; sa pagliso sang imo kamut batok sa nawagwag nga mga duug nga karon ginapuy-an, kag batok sa katawohan nga ginatipon gikan sa mga pungsud, nga nakakuha sing kahayupan kag mga pagkabutang, nga nagapuyo sa tunga sang duta. 13Ang Saba kag ang Dedan kag ang mga manugbaligya sang Tarsis pati sang tanan nila nga mga leon nga bataon magasiling sa imo, ‘Nagakari ka bala sa pagkuha sang inagaw? Gintipon mo bala ang imo kabon sa pagkuha sang inatihan, sa pagkuha sing pilak kag bulawan, sa pagkuha sing kahayupan kag mga pagkabutang, sa pagkuha sing daku nga inagaw?’

14“Busa, anak sang tawo, itagna, kag isiling kay Gog, Amo ini ang ginasiling sang Ginoong Dios: Sa sadto nga adlaw kon ang akon katawohan nga Israel magapuyo sing malig-on, ikaw makahibalo sini 15kag magagowa ka sa imo duug gikan sa naukbung gid nga mga bahin sang aminhan, ikaw kag ang madamu nga mga katawohan upud sa imo, sila tanan magasakay sa mga kabayo, isa ka daku nga kabon, isa ka gamhanan nga hangaway; 16magataklad ka batok sa akon katawohan nga Israel, subong sang gal-um sa pagtabon sang duta. Sa olihi nga mga adlaw dalhon ko ikaw batok sa akon duta, agud nga ang mga pungsud magkilala sa akon, kon pakabalaanon ako sa imo, O Gog, sa atubangan sang ila mga mata.

17“Amo ini ang ginasiling sang Ginoong Dios: Ikaw bala ang ginpamolong ko sa dumaan nga tion paagi sa akon mga alagad nga mga manalagna sang Israel, nga nagtagna sa sadto nga mga adlaw sa madamu nga mga tuig nga dalhon ko ikaw batok sa ila? 18Apang sa sadto nga adlaw, kon mag-abut si Gog batok sa duta sang Israel, nagasiling ang Ginoong Dios, ang akon kasingkal magasaka sa akon ilong. 19Kay sa akon kaimon kag sa kalayo sang akon kasingkal nagpamolong ako, Sa sadto nga adlaw may daku nga pagtay-ug sa duta sang Israel; 20sa bagay nga ang kaisdaan sang dagat, kag ang kapispisan sang mga langit, kag ang kasapatan sang latagon, kag ang tanan nga butang nga nagasaug sa duta, kag ang tanan nga tawo nga yara sa kadaygan sang duta, magakurug sa akon atubangan, kag ang kabukiran mawasdak, kag ang pil-as matimpa, kag ang tagsa ka kuta mapukan sa duta. 21Magatawag ako sing espada batok sa iya sa tanan ko nga bukid, nagasiling ang Ginoong Dios; ang espada sang tagsa ka tawo manginbatok sa iya utud. 22Ako magahukom sa iya sa kamatay kag sa dugo; kag magapaulan ako sa iya kag sa iya mga guban kag sa madamung mga katawohan nga upud sa iya, sing mabunok nga ulan kag dalagku nga mga hielo nga daw bato, sing kalayo kag azufre. 23Gani pakadakuon ko kag pakabalaanon ko kag ipakilala ko ang akon kaugalingon sa mga mata sang madamu nga mga pungsud. Niyan makilala nila nga Ako amo ang Ginoo.

Currently Selected:

EZEQUIEL 38: ABHIL82

Highlight

Copy