EZEQUIEL 29

Mga Tagna batok sa Egipto

1Sa ikapulo nga tuig, sa ikapulo nga bulan, sa ikapulog duha nga adlaw sang bulan, nag-abut sa akon ang polong sang Ginoo: 2“Anak sang tawo, iatubang ang imo nawung batok kay Faraon nga hari sang Egipto, kag itagna batok sa iya kag batok sa bug-os nga Egipto;#Isa. 19:1-25; Jer. 46:2-26. 3ipamolong, kag isiling, Amo ini ang ginasiling sang Ginoong Dios:

“Yari karon, ako batok sa imo,

Faraon nga hari sang Egipto,

ang daku nga dragon nga nagatubog

sa tunga sang iya mga suba,

nga nagsiling, ‘Ang akon Nilo akon kaugalingon;

ginhimo ko ini nga sa akon.’

4Kaw-itan ko sing mga taga ang imo mga sulang,

kag patapikon ko ang mga isda sang imo mga suba sa imo mga himbis;

kag patakason ko ikaw gikan sa tunga sang imo mga suba,

pati sang tanan nga isda sang imo mga suba

nga nagtapik sa imo mga himbis.

5Kag ihal-id ko ikaw sa kamingawan,

ikaw kag ang tanan nga isda sang imo mga suba;

mapukan ka sa wayang,

indi ka pagtingbon ukon tiponon.

Ginhatag ko ikaw nga kalan-on

sa kasapatan sang duta kag sa kapispisan sang mga langit.

6“Niyan ang tanan nga pumuluyo sang Egipto makakilala nga Ako amo ang Ginoo. Bangud nga sila nanginsungkud nga tabon-ak sa panimalay sang Israel; 7sang gin-uyatan ka nila sa imo kamut, ginbali mo, kag ginluta ang tanan nila nga abaga; kag sang nagsandig sila sa imo, nabali ka, kag ginpakurug mo ang bug-os nila nga hawak; 8busa amo ini ang ginasiling sang Ginoong Dios: Yari karon, dalhon ko ang espada sa imo, kag utdon ko gikan sa imo ang tawo kag sapat; 9kag ang duta sang Egipto manginmamingaw kag kawagwagan. Niyan makilala nila nga Ako amo ang Ginoo.

“Bangud nga nagsiling sia, ‘Akon ang Nilo, kag ginhimo ko ini,’ 10busa, yari karon, ako batok sa imo, kag batok sa imo mga suba, kag himoon ko ang duta sang Egipto nga bug-os nga kawagwagan kag mamingaw, kutub sa torre sang Sevene tubtub gid sa dulunan sang Etiopia. 11Wala sing tiil sang tawo nga magaagi sa sini, ukon tiil sang sapat nga magaagi sa sini; indi pagpuy-an ini sing kap-atan ka tuig. 12Kag himoon ko nga mamingaw ang duta sang Egipto sa tunga sang mga duta nga mamingaw; kag ang iya kabanwaanan sa tunga sang kabanwaanan nga nawagwag manginmamingaw sing kap-atan ka tuig. Paaplaagon ko ang mga Egiptohanon sa tunga sang mga pungsud, kag palaptahon sila sa kadutaan.

13“Kay amo ini ang ginasiling sang Ginoong Dios: Sa katapusan sang kap-atan ka tuig tiponon ko ang mga Egiptohanon gikan sa mga katawohan diin ginlapta sila; 14kag pahaulian ko ang kabihagan sang Egipto, kag papaulion ko sila sa duta sang Patros, sa duta nga natawohan nila; kag didto manginkubus sila nga ginharian. 15Sia manginkubus gid sang mga ginharian, kag indi na gid sia makapaibabaw sa mga pungsud; kag buhinan ko sila agud nga indi na sila maggahum sa mga pungsud. 16Kag sia indi na manginsalaligan sang panimalay sang Israel, nga nagapahanumdum sang kalautan, kon magbalikid sila sa ila. Niyan makilala nila nga Ako amo ang Ginoong Dios.”

17Sa ikaduha ka pulo kag pito nga tuig, sa nahauna nga bulan, sa nahauna nga adlaw sang bulan, nag-abut sa akon ang polong sang Ginoo: 18“Anak sang tawo, si Nabucodonosor nga hari sang Babilonia nagpaalagad sing daku sang iya hangaway batok sa Tiro; ang tagsa ka olo naupaw kag nadul-ak ang tagsa ka abaga; apang wala sia sing sohol ukon ang iya hangaway gikan sa Tiro tungud sang pag-alagad nga gin-alagad niya batok sa iya. 19Busa amo ini ang ginasiling sang Ginoong Dios: Yari karon, ihatag ko kay Nabucodonosor nga hari sang Babilonia ang duta sang Egipto; kag kuhaon niya ang iya kadam-an kag magakuha sang inagaw sa iya kag magakuha sang inatihan sa iya; kag manginsohol ini sa iya hangaway. 20Nahatag ko sa iya ang duta sang Egipto subong nga iya tumbas sang iya pag-alagad, bangud nga nagpanghikot sila tungud sa akon, nagasiling ang Ginoong Dios.

21“Sa sadto nga adlaw patuboon ko ang sungay sa panimalay sang Israel, kag ihatag ko sa imo ang pagnganga sang baba sa tunga nila. Niyan makilala nila nga Ako amo ang Ginoo.”

Currently Selected:

EZEQUIEL 29: ABHIL82

Highlight

Copy