EZEQUIEL 26

Mga Tagna batok sa Tiro

1Sa ikapulog isa nga tuig, sa nahaunang adlaw sang bulan, nag-abut sa akon ang polong sang Ginoo: 2“Anak sang tawo, bangud nga ang Tiro#Isa. 23:1-18; Joel 3:4-8; Amos 1:9-10; Zac. 9:3-4; Mat. 11:21-22; Luc. 10:13-14. nagsiling batok sa Jerusalem, ‘Aha, naguba ang gawang sang mga katawohan, nagliso sia sa akon; hil-obon ako, karon nga nawagwag sia,’ 3busa amo ini ang ginasiling sang Ginoong Dios: Yari karon, batok ako sa imo, O Tiro, kag pataklaron ko batok sa imo ang madamung pungsud, subong sang dagat nga nagapasaka sang iya mga balud. 4Laglagon nila ang mga kuta sang Tiro, kag lumpagon ang iya mga torre; kag kagison ko man sa iya ang iya yab-ok, kag himoon sia nga hublas nga igang. 5Manginduug sia nga ladlaran sang mga chinchorro sa tunga sang dagat; kay napamolong ko ini, nagasiling ang Ginoong Dios; kag sia mangin-inagaw sa mga pungsud; 6kag ang iya mga anak nga babayi nga yara sa latagon patyon sa espada. Niyan makilala nila nga Ako amo ang Ginoo.

7“Kay amo ini ang ginasiling sang Ginoong Dios: Yari karon, dalhon ko sa Tiro si Nabucodonosor nga hari sang Babilonia, hari sang mga hari, gikan sa aminhan, nga may mga kabayo kag may mga kangga, kag may mga manugkabayo kag isa ka kabon nga madamung katawohan. 8Patyon niya sa espada ang imo mga anak nga babayi sa latagon; magahimo sia sing mga pamakud batok sa imo, kag magatukud sing trinsira batok sa imo, kag magabayaw sing taming batok sa imo. 9Magapahamtang sia sing mga inugbungkol batok sa imo mga kuta, kag gub-on niya ang imo mga torre sang iya mga wasay. 10Bangud sang kabugana sang iya mga kabayo tabonan ka sang yab-ok nila; ang imo mga kuta magauyug sa kagahud sang mga manugkabayo kag sang mga karo kag sang mga kangga, kon magsulud sia sa imo mga gawang subong sang pagsulud sang mga tawo sa banwa nga nabulhoan. 11Sa mga koko sang iya mga kabayo tasakon niya ang tanan mong dalan; patyon niya ang imo katawohan sa espada; kag ang imo mga gamhanan nga haligi mapukan sa duta. 12Agawon nila ang imo mga manggad kag atihon ang imo mga inugbaligya; lumpagon nila ang imo mga kuta kag laglagon ang imo matahum nga mga balay; itagbong nila ang imo mga bato kag ang imo tablon kag ang imo yab-ok sa tunga sang mga tubig. 13Kag pauntaton ko ang kagahud sang imo mga ambahanon, kag indi na mabatian ang tonog sang imo mga arpa.#Bug. 18:22. 14Himoon ko ikaw nga hublas nga igang; manginduug ka nga ladlaran sang mga chinchorro; indi ka na pagpatindugon; kay ako nga Ginoo nagpamolong sini, nagasiling ang Ginoong Dios.

15“Amo ini ang ginasiling sang Ginoong Dios sa Tiro: Indi bala mag-uyug ang kapuloan sa kagahud sang imo pagkapukan, kon mag-ugayong ang mga napilasan, kon ang pagpamatay himoon sa tunga nimo? 16Niyan ang tanan nga principe sang dagat magapanaug gikan sa ila mga trono, kag magauba sang ila mga panapton nga malaba, kag magauba sang ila binordahan nga mga panapton; magapanaput sila nga may pagkurug; magalingkod sila sa duta kag magakurug sa tagsa ka tion, kag mabulong sa imo. 17Kag magagamit sila sing panalabiton sa imo, kag magasiling sa imo,

‘Daw ano nga nalaglag ka nga ginpuy-an sang mga dagatnon,

O banwa nga bantug,

nga makusug sa dagat,

sia kag ang iya mga pumuluyo,

nga nagpakugmat

sa tanan nga nagpuyo didto!

18Karon ang kapuloan magakurug

sa adlaw sang imo pagkapukan;

hoo, ang kapuloan nga yara sa dagat

mahangawa sa imo pagtaliwan.’#Bug. 18:9-10.

19“Kay amo ini ang ginasiling sang Ginoong Dios: Kon himoon ko ikaw nga banwa nga mamingaw, kaangay sang kabanwaanan nga wala mapuy-i, kon palapawan ko ikaw sang kadadalman, kag ang dalagku nga mga tubig magatabon sa imo, 20niyan dalhon ko ikaw upud sa ila nga nagapanaug sa Boho, sa katawohan sang dumaan nga tion, kag papuy-on ko ikaw sa kadadalman sang duta, sa mga duug nga mamingaw kutub sa dumaan, upud sa ila nga nagapanaug sa Boho, agud nga indi ka pagpuy-an ukon mabutangan sing duug sa duta sang mga buhi. 21Himoon ko ikaw nga kakugmat, kag mawala ikaw; bisan pangitaon ka, indi ka na gid makita,#Bug. 18:21. nagasiling ang Ginoong Dios.”

Currently Selected:

EZEQUIEL 26: ABHIL82

Highlight

Copy