EXODO 1
1
Ang Kapiotan sang mga Israelnon sa Egipto
1Amo ini ang mga ngalan sang mga lalaking anak ni Israel nga nag-abut sa Egipto upud kay Jacob, ang tagsa ka tawo upud ang iya panimalay: 2si Ruben, si Simeon, si Levi, kag si Juda, 3si Isacar, si Zabulon, kag si Benjamin, 4si Dan kag si Neftali, si Gad kag si Aser. 5Ang tanan nga kaliwat ni Jacob kapitoan ka tawo; si Jose didto na sa Egipto. 6Niyan napatay si Jose, kag ang tanan niya nga lalaking utud, kag yadtong bug-os nga kaliwatan. 7Apang ang mga kaliwatan ni Israel mabungahon kag nagdugang sing bugana; kag nabu-ad kag nagmakusug sing lakas;#Binu. 7:17. sa bagay nga nahil-ob nila ang duta.
8Karon may naglutaw nga isa ka bag-ong hari sa Egipto, nga wala makakilala kay Jose.#Binu. 7:18. 9Kag nagsiling sia sa iya katawohan, “Yari karon, ang katawohan sang Israel madamu kag makusug pa sa aton. 10Kari kamo, maghisayo kita sing maalamon sa ila,#Binu. 7:19. basi magbu-ad sila, kag, kon awayon kita, magsimpon sila sa aton mga kaaway kag mag-away batok sa aton kag maggowa sila sa duta.” 11Busa ginbutangan nila sila sing mga agalon sa pangabudlay sa pagsakit sa ila sa mga lulan nila; kag nagpatindug sila nga kay Faraon sang mga banwa nga tambobohan, ang Pitom kag Raamses. 12Apang sa labi nga pagsakit nila sa ila, labi nga nagbu-ad sila kag labi nga naglapnag sila. Kag nahadluk ang mga Egiptohanon sa katawohan sang Israel. 13Gani gin-ulipon nila nga may kapintas ang katawohan sang Israel, 14kag ginpapait ang ila kabuhi sa mapiot nga pagpangabudlay, sa galagala kag tisa, kag sa tanan nga bagay sang pagpangabudlay sa uma; sa tanan nila nga pagpangabudlay gin-ulipon sila nga may kapintas.
15Niyan ang hari sang Egipto nagpamolong sa mga partera nga Hebreo, nga ang isa ginhingalanan si Sifra kag ang isa si Pua, 16“Kon magpaanak kamo sa Hebreo nga mga babayi, kag makita sila sa balataan, kon ini lalaki, patyon ninyo sia; apang kon ini babayi, buhion sia.” 17Apang ang mga partera nahadluk sa Dios, kag wala maghimo sono sa ginsogo sa ila sang hari sang Egipto, kondi ginbuhi nila ang kabataan nga lalaki. 18Gani ang hari sang Egipto nagpatawag sa mga partera, kag nagsiling sa ila, “Ngaa bala nga naghimo kamo sini, kag ginbuhi ninyo ang kabataan nga lalaki?” 19Ang mga partera nagsiling kay Faraon, “Bangud nga ang mga babayi nga Hebreo indi subong sang mga Egiptohanon nga babayi; kay mga mapagsik sila kag nagaanak sa wala pa mag-abut ang partera sa ila.” 20Gani ang Dios nagmaayo sa mga partera; kag ang katawohan nagbu-ad kag naggamhanan gid. 21Kag bangud nga nahadluk ang mga partera sa Dios ginhatagan niya sila sing mga panimalay. 22Niyan si Faraon nagsogo sa bug-os niyang katawohan, “Ihaboy ninyo sa Nilo ang tagsa ka lalaki nga matawo sa mga Hebreo,#Binu. 7:19. apang buhia ninyo ang tagsa ka anak nga babayi.”
Currently Selected:
EXODO 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
