DEUTERONOMIO 27

Ang Kasogoan nga Sulaton sa Bukid nga Ebal

1Karon si Moises kag ang mga tigulang sang Israel nagsogo sa katawohan, nga nagasiling, “Bantayi ang bug-os nga sogo nga ginasogo ko sa inyo sini nga adlaw. 2Kag sa adlaw nga magtabok kamo sa Jordan pakadto sa duta nga ginahatag sa imo sang Ginoo nga imo Dios, magpatindug ka sing dalagku nga mga bato, kag hapulason sila sing apog; 3kag isulat mo sa ila ang tanan nga polong sini nga kasogoan, kon nakatabok ka na agud nga magsulud ka sa duta nga ginahatag sa imo sang Ginoo nga imo Dios, duta nga nagailig sing gatas kag dugus, sono sa ginsaad sa imo sang Ginoo, nga Dios sang imo mga ginikanan. 4Kag kon makatabok na kamo sa Jordan, patindugon ninyo ini nga mga bato, nga ginasogo ko sa inyo sini nga adlaw, sa Bukid nga Ebal, kag hapulason mo sila sing apog. 5Kag magpatindug ka didto sing halaran sa Ginoo nga imo Dios, halaran nga mga bato; dili mo sila paggamitan sing gamit nga salsalon. 6Sa mga bato nga wala mabasbasi patindugon mo ang halaran#Ex. 20:25. sa Ginoo nga imo Dios; kag ihalad mo sa ibabaw niya ang mga halad-nga-sinonog sa Ginoo nga imo Dios; 7kag maghalad ka sang mga halad-sa-paghidait, kag magkaon didto; kag magkalipay ka sa atubangan sang Ginoo nga imo Dios. 8Kag isulat mo sa mga bato ang tanan nga polong sini nga kasogoan sing maathag gid.”#Jos. 8:30-32.

9Kag si Moises kag ang mga sacerdote nga mga Levinhon nagpamolong sa bug-os nga Israel, “Maghipus kag magpamati, O Israel: sini nga adlaw manginkatawohan ka sang Ginoo nga imo Dios. 10Busa tumanon mo ang tingug sang Ginoo nga imo Dios, kag himoon ang iya mga sogo kag ang iya mga palatukuran, nga ginasogo ko sini nga adlaw sa imo.”

11Kag si Moises nagtulin sa katawohan sa amo nga adlaw, nga nagasiling, 12“Kon makatabok na kamo sa Jordan, ini sila magatindug sa Bukid nga Gerizim sa pagpakamaayo sang katawohan:#Deut. 11:29; Jos. 8:33-35. si Simeon, si Levi, si Juda, si Isacar, si Jose, kag si Benjamin. 13Kag ini sila magatindug sa Bukid nga Ebal sa pagpakamalaut: si Ruben, si Gad, si Aser, si Zabulon, si Dan, kag si Neftali. 14Kag ang mga Levinhon magasabat kag magsiling sa tanan nga tawo sang Israel sa mabaskug nga tingug:

15“‘Pinakamalaut ang tawo nga nagahimo sing larawan nga tinigban ukon tinunaw,#Ex. 20:4; 34:17; Lev. 19:4; 26:1; Deut. 4:15-18; 5:8. nga kalangil-aran sa Ginoo, nga buhat sang kamut sang panday, kag nagapatindug sini sa tago.’ Kag magsabat kag magsiling ang bug-os nga katawohan, ‘Kabay pa.’

16“‘Pinakamalaut ang nagatamay sa iya amay kag sa iya iloy.#Ex. 20:12; Deut. 5:16.’ Kag magsiling ang bug-os nga katawohan, ‘Kabay pa.’

17“‘Pinakamalaut ang nagahalin sang mohon sang iya isigkatawo.#Deut. 19:14.’ Kag magsiling ang bug-os nga katawohan, ‘Kabay pa.’

18“‘Pinakamalaut ang nagapatalang sang bulag gikan sa dalanon.#Lev. 19:14.’ Kag magsiling ang bug-os nga katawohan, ‘Kabay pa.’

19“‘Pinakamalaut ang nagapatiko sang katarungan nga naigo sa manlulugayaw, sa ilo, kag sa balo nga babayi.#Ex. 22:21; 23:9; Lev. 19:33-34; Deut. 24:17-18.’ Kag magsiling ang bug-os nga katawohan, ‘Kabay pa.’

20“‘Pinakamalaut ang nagahulid sa asawa sang iya amay,#Lev. 18:8; 20:11; Deut. 22:30. bangud nga ginbuksan niya ang sayal sang iya amay.’ Kag magsiling ang bug-os nga katawohan, ‘Kabay pa.’

21“‘Pinakamalaut ang nagahulid sa bisan ano nga bagay sang sapat.#Ex. 22:19; Lev. 18:23; 20:15.’ Kag magsiling ang bug-os nga katawohan, ‘Kabay pa.’

22“‘Pinakamalaut ang nagahulid sa iya utud nga babayi,#Lev. 18:9; 20:17. ang babayi nga anak sang iya amay ukon anak nga babayi sang iya iloy.’ Kag magsiling ang bug-os nga katawohan, ‘Kabay pa.’

23“‘Pinakamalaut ang nagahulid sa iya ugangan nga babayi.#Lev. 18:7; 20:14.’ Kag magsiling ang bug-os nga katawohan, ‘Kabay pa.’

24“‘Pinakamalaut ang nagapatay sa tago sang iya isigkatawo.’ Kag magsiling ang bug-os nga katawohan, ‘Kabay pa.’

25“‘Pinakamalaut ang nagabaton sing hamham sa pagpatay sang tawo nga wala sing sala.’ Kag magsiling ang bug-os nga katawohan, ‘Kabay pa.’

26“‘Pinakamalaut ang wala nagapamatuud sang mga polong sini nga kasogoan sa paghimo sa ila.#Gal. 3:10.’ Kag magsiling ang bug-os nga katawohan, ‘Kabay pa.’

Currently Selected:

DEUTERONOMIO 27: ABHIL82

Highlight

Copy