DEUTERONOMIO 25

1“Kon may kasaba sa tunga sang mga tawo, kag magkadto sila sa hukmanan, kag hukman sila, niyan pakamatarungon nila ang matarung kag tagudilian ang malaut, 2niyan kon ang malaut nga tawo takus nga lapdusan, ang hukom magpahapa sa iya kag sa iya atubangan palapdusan niya sia sa kadamuon sono sa iya pagkamalaut. 3Palapdusan niya sia sing kap-atan, dili niya pagpalabawan; basi nga, kon palabawan niya kag lapdusan sia sing madamu nga lapdus kapin sini sa ila, niyan ang imo utud mangindaw banyaga sa imo.

4“Dili mo pagbusalan ang baka kon nagalinas sia.#1 Cor. 9:9; 1 Tim. 5:18.

5“Kon ang mag-ulutud magpuyo sing tingub, kag mapatay ang isa sa ila kag wala sing anak, ang asawa sang napatay dili magbana sa luwas sa isa ka dumuloong; ang iya bayaw nga lalaki maghiusa sa iya, kag magpangasawa sa iya, kag maghimo sa iya sang katungdanan sang bayaw. 6Kag ang panganay nga anak niya magatal-us sa ngalan sang iya utud nga napatay, agud nga indi mapanas sa Israel ang iya ngalan.#Mat. 22:24; Mar. 12:19; Luc. 20:28. 7Kag kon ang lalaki indi maluyag magpangasawa sa iya bayaw nga babayi, niyan ang iya bayaw nga babayi magataklad sa gawang sa mga tigulang, kag magasiling, ‘Ang akon bayaw nga lalaki nagadumili sa pagbangon sing ngalan sa iya utud sa Israel; indi sia maghimo sa akon sang katungdanan sang bayaw.’ 8Niyan tawgon sia sang mga tigulang sang iya banwa, kag hambalon sia: kag kon tindugan niya, kag magsiling, ‘Wala ako maluyag magpangasawa sa iya,’ 9niyan ang iya bayaw nga babayi magpalapit sa iya sa atubangan sang mga tigulang, kag hukson ang iya sapin sa tiil, kag duplaan sia sa nawung; kag magsabat sia kag magsiling, ‘Amo ini ang himoon sa lalaki nga indi buut magpatindug sang panimalay sang iya utud.’ 10Kag ang iya ngalan tawgon sa Israel, ang balay sang nahuksan sing sapin.#Rut 4:7-8.

11“Kon ang mga lalaki mag-inaway, kag magpalapit ang asawa sa pagluwas sang iya bana sa kamut sang nagasakit sa iya, kag untayon niya ang iya kamut kag dakpon sia sa iya mga tinago, 12niyan utdon mo ang iya kamut; ang imo mata dili magkaawa.

13“Dili ka maghuput sa imo puyo sing sarisari nga mga itilimbang, daku kag diotay. 14Dili ka maghuput sa imo balay sing mga sulukban nga sarisari, daku kag diotay. 15Maghuput ka sing itilimbang nga nagakaigo kag matarung, maghuput ka sing sulukban nga nagakaigo kag matarung; agud nga maglawig ang imo mga adlaw sa duta nga ginahatag sa imo sang Ginoo nga imo Dios. 16Kay ang tanan nga nagahimo sang amo nga mga butang, ang tanan nga nagahimo sing dimatarung, kangil-aran sa Ginoo nga imo Dios.#Lev. 19:35-36.

17“Dumduma ang ginhimo sa imo ni Amalec sa dalanon sang naggowa kamo gikan sa Egipto, 18kon paano nga nagsugata sia sa imo sa dalanon, kag ginlaglag niya ang naolihi gid sa imo, ang tanan nga maluya sa olihi nimo, sang ikaw ginpunaw kag ginlapyo; kag wala sia magkahadluk sa Dios.#Ex. 17:8-14. 19Busa kon ang Ginoo nga imo Dios nakahatag na sa imo sing kapahuwayan sa tanan mo nga kaaway sa palibut, sa duta nga ginahatag nga panublion nimo sang Ginoo nga imo Dios sa pagtag-iya sini, panason mo ang handumanan ni Amalec sa idalum sang langit; dili ka malipat.#1 Sam. 15:2-9.

Currently Selected:

DEUTERONOMIO 25: ABHIL82

Highlight

Copy