DEUTERONOMIO 19

Ang mga Banwa nga Dalangpan

(Num. 35:1-34)

1“Kon papason sang Ginoo nga imo Dios ang mga pungsud nga ang ila duta ginahatag sa imo sang Ginoo nga imo Dios, kag ikaw magtal-us sa ila kag magpuyo sa ila mga banwa kag sa ila mga balay, 2magpain ka nga sa imo sing tatlo ka banwa sa tunga sang imo duta nga ginahatag sa imo sang Ginoo nga imo Dios sa pagtag-iya sini. 3Mag-aman ka sa imo sing mga dalan, kag bahinon mo sa tatlo ka bahin ang mga dulunan sang imo duta nga ginapapanubli sa imo sang Ginoo nga imo Dios, agud nga ang tagsa nga makapatay sing tawo magpalagyo didto.#Deut. 4:41-43; Jos. 20:1-7.

4“Amo ini ang kahimtangan sang nakapatay sing tawo, nga magpalagyo didto kag magkabuhi. Ang bisan sin-o nga makapatay sa iya isigkatawo sing dihungud kag wala magdumut sa iya sa nagligad nga tion— 5subong sang isa ka tawo nga nagakadto sa kagulangan kaupud sang iya isigkatawo sa pagpulud sing kahoy, kag ginalabo niya ang wasay sa pag-utud sang kahoy, kag ang wasay mapalus sa patok kag magtupa sa iya isigkatawo sa bagay nga sia mapatay—sia magpalagyo sa isa sining mga banwa kag magkabuhi; 6basi kon ang manugtimalus sang dugo maglagas sa nakapatay sing tawo samtang nga nagasingkal ang iya tagiposoon kag maabut sia, bangud nga malawig ang dalan, kag sakiton sia sing ikamatay, sing ugai indi sia takus sang kamatayon, sanglit nga wala sia niya pagdumti sa tion nga nagligad. 7Busa nagasogo ako sa imo, Magpain ka nga sa imo sing tatlo ka banwa. 8Kag kon pasangkaron sang Ginoo nga imo Dios ang imo ginsakpan, sono sa nasumpa niya sa imo mga ginikanan, kag mahatag sa imo ang bug-os nga duta nga ginsaad niya nga ihatag sa imo mga ginikanan— 9kon bantayan mo ini tanan nga sogo, nga ginasogo ko sining adlaw sa imo sa paghimo sini, sa paghigugma sa Ginoo nga imo Dios kag sa paglakat sa iya mga dalanon sa gihapon—niyan magdugang ka nga sa imo sing tatlo pa ka banwa luwas sini nga tatlo, 10agud nga indi mapaagay ang dugo nga walay sala sa tunga sang imo duta nga ginahatag nga panublion sa imo sang Ginoo nga imo Dios, kag sa amo ang dugo manginsa ibabaw nimo.

11“Apang kon ang bisan sin-ong tawo nagadumut sa iya isigkatawo, kag magpuut sa iya, kag magtindug batok sa iya, kag magpilas sa iya sing tama sa bagay nga mapatay sia, kag magpalagyo sia sa isa sining kabanwaanan, 12niyan ang mga tigulang sang iya banwa magpadala kag magpakuha sa iya gikan didto, kag itugyan sia sa kamut sang manugtimalus sang dugo, agud nga mapatay sia. 13Ang imo mata dili magkaawa sa iya, kondi ipahilayo mo gikan sa Israel ang dugo nga walay sala, agud nga magmaayo sa imo.

14“Dili mo paghalinon ang dulunan sang imo isigkatawo,#Deut. 27:17. nga ginpahamtang sang katigulangan, sa imo panublion nga panublion mo sa duta nga ginahatag sa imo sang Ginoo nga imo Dios sa pagtag-iya sini.

15“Ang isa ka saksi dili magtindug batok sa isa ka tawo sa bisan anong kalautan ukon sa bisan anong sala, nga ginapakasal-an niya; sa baba sang duha ka saksi, ukon sa baba sang tatlo ka saksi, palig-onon ang butang.#Num. 35:30; Deut. 17:6; Mat. 18:16; 2 Cor. 13:1; 1 Tim. 5:19; Heb. 10:28. 16Kon magtindug ang isa ka dimatarung nga saksi batok sa bisan kay sin-ong tawo sa pagsaksi batok sa iya sang malaut nga buhat, 17niyan ang duha ka tawo nga nagakasabaay, mag-atubang sa Ginoo, sa atubangan sang mga sacerdote kag sang mga hukom nga didto sa sinang mga adlaw; 18usisaon sing maid-id sang mga hukom, kag kon ang saksi dimatuud nga saksi kag nakasaksi sing dimatuud batok sa iya utud, 19niyan himoon ninyo sa iya sono sa ginahunahuna niya nga himoon sa iya utud; sa amo mapahilayo mo ang malaut gikan sa tunga nimo. 20Kag ang mga mabilin magapamati, kag magakahadluk, kag kutub niyan dili na maghimo sang subong nga malaut sa tunga nimo. 21Ang imo mata dili magkaawa; kabuhi sa kabuhi, mata sa mata, ngipon sa ngipon,#Ex. 21:23-25; Lev. 24:19; Mat. 5:38. kamut sa kamut, tiil sa tiil.

Currently Selected:

DEUTERONOMIO 19: ABHIL82

Highlight

Copy