DANIEL 7

Ang Damgo ni Daniel nahanungud sa Apat ka Sapat

1Sa nahauna nga tuig ni Belsasar nga hari sang Babilonia, si Daniel may damgo kag mga palanan-awon sa iya olo sa iya higdaan. Niyan ginsulat niya ang damgo, kag ginsugid ang kabilogan sang mga butang. 2Si Daniel nagsiling, “Nakita ko sa akon palanan-awon sa kagab-ihon, kag yari karon, ang apat ka hangin sang langit naghuyup sa daku nga dagat. 3Kag ang apat ka dalagku nga sapat nagtakas gikan sa dagat,#Bug. 13:1; 17:8. nga tuhay ang isa sa isa. 4Ang nahauna kaangay sa leon kag may mga pakpak sang aguila. Nakita ko tubtub nga ang iya mga pakpak gingabut, kag ginbayaw ini gikan sa duta kag ginpatindug sa duha ka tiil subong sang tawo; kag ginhatag sa sini ang tagiposoon sang tawo. 5Kag yari karon, isa pa ka sapat, ang ikaduha, kaangay sa oso. Ginpatindug ini sa isa ka luyo; sa iya baba yara ang tatlo ka gusuk sa ulut sang iya mga ngipon; kag ginsiling nila sa iya ang subong sini, ‘Tindug, halunhon ka sing madamu nga unud.’ 6Sa tapus sini nakita ko, kag yari karon, ang isa pa, kaangay sa leopardo, nga may apat ka pakpak sang pispis sa iya likod; kag ang sapat may apat man ka olo; kag ginhatagan sia sing pagbulut-an.#Bug. 13:2. 7Sa tapus sini nakita ko ang mga palanan-awon sa kagab-ihon, kag yari karon, ang ikap-at nga sapat, nga makakulugmat kag makalilisang kag makusug sing lakas; kag may dalagku nga mga ngipon nga salsalon; ini naghalunhon kag nagkusnit, kag nagtapak sang nabilin. Tuhay ini sa mga sapat nga una sa iya; kag may napulo sia ka sungay.#Bug. 12:3. 8Ginmulalongan ko ang mga sungay, kag yari karon, nag-uslut ang isa pa ka sungay sa tunga nila, nga diotay, nga sa atubangan sini gingabut ang tatlo sang nahauna nga mga sungay; kag yari karon, sa sini nga sungay may mga mata kaangay sa mga mata sang tawo, kag baba nga nagapamolong sing mga butang nga dalagku.#Bug. 13:5-6. 9Nakita ko,

ginpahamtang ang mga trono#Bug. 20:4.

kag ang isa nga dumaan sang mga adlaw naglingkod;

ang iya panapton maputi subong sang nieve,

kag ang bohok sang iya olo kaangay sa lunsay nga bulbul;#Bug. 1:14.

ang iya trono mga dabdab nga kalayo,

ang iya mga aliling kalayo nga nagadabadaba.

10Ang ilig nga nagadabdab nag-ilig

kag naggowa gikan sa atubangan niya;

ang mga linibo sang mga linibo nag-alagad sa iya,

kag linaksa sa mga linaksa nagtilindug sa atubangan niya;#Bug. 5:11.

ang paghukom ginpahamtang,

kag ginhumlad ang mga tolon-an.#Bug. 20:12.

11Nakita ko sa sadto nga tion bangud sang tingug sang dalagku nga mga polong nga ginpamolong sang sungay. Nakita ko tubtub gid nga ginpatay ang sapat, kag ang iya lawas ginlaglag kag gintugyan nga sonogon sang kalayo. 12Nahanungud sa iban nga mga sapat, ginkuha ang ila pagbulut-an, apang ang ila kabuhi ginpalawig sa isa ka dag-on kag isa ka tion. 13Nakita ko sa mga palanan-awon sa kagab-ihon,

kag yari karon, may nag-abut upud sa mga panganud sang langit#Mat. 24:30; 26:64; Mar. 13:26; 14:62; Luc. 21:2; Bug. 1:7-13; 14:14.

nga isa nga kaangay sa anak sang tawo,

kag nag-abut sia bisan tubtub sa Dumaan sang mga Adlaw

kag gindala nila sia malapit sa atubangan niya.

14Kag ginhatagan sia sing pagbulut-an

kag himaya kag ginharian,

agud nga ang tanan nga mga katawohan, mga pungsud, kag mga hambal

mag-alagad sa iya;#Bug. 11:15.

ang iya pagbulut-an dayon nga pagbulut-an,

nga indi magtaliwan,

kag ang iya ginharian

amo ang indi malaglag.

15“Nahanungud sa akon, nga si Daniel, ang akon espiritu nagkalisud sa tunga sang akon lawas kag ang mga palanan-awon sang akon olo nagtublag sa akon. 16Nagpalapit ako sa isa sang mga nagatambong kag nagpamangkot sa iya sang kamatooran nahanungud sini tanan. Gani ginsugiran niya ako, kag ginpakilala ako sang kasaysayan sang mga butang. 17‘Ining apat ka dalagkung mga sapat amo ang apat ka hari nga magalutaw sa duta. 18Apang ang mga balaan sang Labing Mataas magabaton sang ginharian, kag magaangkon sang ginharian sa gihapon, sa gihapon kag sa gihapon.’#Bug. 22:5.

19“Niyan naghandum ako sa paghibalo sang kamatooran nahanungud sang ikap-at nga sapat, nga tuhay sa tanan sa ila, nga makakulugmat sing lakas, nga ang iya mga ngipon salsalon kag ang iya mga koko saway; nga naghalunhon kag nagkusnit, kag nagtapak sang mga nabilin; 20kag nahanungud sang napulo ka sungay nga yara sa iya olo, kag sang isa pa nga nag-ulhut kag sa una sini ang tatlo napungal, yadtong sungay nga may mga mata kag baba nga nagpamolong sing dalagkung mga butang, nga ang iya dagway mabakud pa sang sa iya mga kaupdanan. 21Nakita ko, ang amo nga sungay nagpakig-away sa mga balaan, kag naglandas sa ila,#Bug. 13:7. 22tubtub nga nag-abut ang Dumaan sang mga Adlaw, kag ginhatag ang paghukom sa mga balaan sang Labing Mataas,#Bug. 20:4. kag nag-abut ang tion nga ang mga balaan nagtag-iya sang ginharian.

23“Nagsiling sia sing subong sini: ‘Ang ikap-at nga sapat,

mangin-ikap-at ang ginharian sa duta,

nga mangintuhay sa tanan nga ginharian,

kag magahalunhon sang bug-os nga duta,

kag magatapak sini, kag magadugmok sini.

24Nahanungud sang napulo ka sungay,

gikan sa sining ginharian

magalutaw ang napulo ka hari,#Bug. 17:12.

kag ang isa pa magalutaw sa olihi nila;

mangintuhay sia sa mga nahauna,

kag dag-on niya ang tatlo ka hari.

25Magapamolong sia sing mga polong batok sa Labing Mataas,

kag magapakag-as sang mga balaan sang Labing Mataas,

kag magahunahuna sia sa pagbaylo sang mga tion kag sang kasogoan;

kag itugyan sila sa iya kamut

tubtub sa isa ka tion kag mga tion, kag sa katunga sa tion.#Bug. 12:14; 13:5-6.

26Apang ang paghukom pat-uron,

kag agawon nila ang iya pagbulut-an,

sa pagpapas kag sa paglaglag sini tubtub sa katapusan.

27Kag ang ginharian kag ang pagbulut-an

kag ang pagkadaku sang mga ginharian sa idalum sang bug-os nga langit

ihatag sa katawohan sang mga balaan sang Labing Mataas;#Bug. 20:4.

ang iya ginharian dayon nga ginharian,#Bug. 22:5.

kag ang tanan nga ginsakpan magaalagad kag magatuman sa iya.’

28“Yari ang katapusan sang butang. Nahanungud sa akon, nga si Daniel, ang akon mga hunahuna nagtublag sa akon sing daku, kag ang akon mga nawung nagbalhin; apang ginhuptan ko ang butang sa akon tagiposoon.”

Currently Selected:

DANIEL 7: ABHIL82

Highlight

Copy