DANIEL 10

Ang Palanan-awon ni Daniel sa Ubay sang Suba nga Tigris

1Sa ikatlong tuig ni Ciro nga hari sang Persia ginpahayag ang polong kay Daniel, nga ginhingalanan si Beltesasar. Kag ang polong matuud, kag yadto amo ang dakung inaway. Kag nahangpan niya ang polong kag may paghangup sang palanan-awon.

2Sa sadtong mga adlaw ako, nga si Daniel, naglalaw sa bug-os nga tatlo ka semana. 3Wala ako magkaon sing manamit nga kalan-on, walay unud ukon alak nga nagsulud sa akon baba, kag wala gid ako magpanghaplas, tubtub nga natuman ang tatlo ka semana nga bug-os. 4Sa ikaduha ka pulo kag apat nga adlaw sang nahaunang bulan, didto ako sa ubay sang dakung suba, nga amo, ang Tigris, 5ginbayaw ko ang akon mga mata kag nagtolok, kag yari karon, isa ka lalaki nga napanaptan sing lino,#Bug. 1:13-15; 19:1. nga nawagkusan ang iya mga balikawang sing bus-og nga bulawan sang Ufaz. 6Ang iya lawas man kaangay sang crisolito, ang iya nawung subong sang dagway sang kilat, ang iya mga mata subong sang mga sulo nga nagadabadaba, ang iya mga butkon kag ang iya mga tiil kaangay sa saway nga pinahining, kag ang tingug sang iya mga polong kaangay sang tingug sang kadam-an. 7Kag ako, si Daniel, nga isa lamang nakakita sang palanan-awon, kay ang mga tawo nga nag-upud sa akon wala makakita sang palanan-awon, kondi nga ang dakung pagkurug nag-abut sa ila, kag nagpalagyo sila sa pagpanago. 8Gani nabilin ako nga isa lamang kag nakakita sining daku nga palanan-awon, kag walay kusug nga nabilin sa akon; kay ang akon kaayoayo nabaylo sa akon sa kaduluntan, kag wala ako sing kusug nga nabilin. 9Apang nabatian ko ang tingug sang iya mga polong; kag sang nabatian ko ang tingug sang iya mga polong, niyan natologan ako sing hamook nga nagahapa nga ang akon nawung nayon sa duta.

10Kag yari karon, isa ka kamut nagkuhit sa akon nga nagpakamang sa akon sa akon mga tuhod kag sa mga palad sang akon mga kamut. 11Kag nagsiling sia sa akon, “O Daniel, ikaw nga lalaki nga hinigugma sing daku, hangpa ang mga polong nga ginpamolong ko sa imo, kag tindug ka sing tadlong, kay sa imo ginapadala ako karon.” Samtang nagapamolong sia sa akon sining polong, nagtindug ako nga nagakurug. 12Niyan nagsiling sia sa akon, “Daniel, dili magkahadluk, kay kutub sa nahauna nga adlaw nga gintuhoy mo ang imo tagiposoon sa paghangup kag sa pagpaubus sang imo kaugalingon sa atubangan sang imo Dios, ginpamatian ang imo mga polong, kag bangud sang imo mga polong nagakari ako. 13Ang principe sang ginharian sang Persia nagbatok sa akon sing duha ka pulo kag isa ka adlaw; apang si Miguel,#Bug. 12:7. isa sang mga principe nga puno, nag-abut sa pagtabang sa akon, gani ako nagpabilin didto upud sa mga hari sang Persia 14kag nagaabut ako sa pagpahangup sa imo sang mahanabu sa imo katawohan sa olihi nga mga adlaw. Kay ang palanan-awon tungud sa madamu pa nga adlaw.”

15Sang nakapamolong sia sa akon sono sa sini nga mga polong, ginpaatubang ko ang akon nawung nayon sa duta kag nag-apa. 16Kag yari karon, ang isa nga kaangay sa mga anak sang mga tawo nagkuhit sang akon mga bibig; niyan ginnganga ko ang akon baba kag nagpamolong. Nagsiling ako sa nagtindug sa atubangan ko, “O Ginoo ko, bangud sang palanan-awon ang akon mga kasakit nagbalik sa akon, kag wala ako sing kusug nga nahawiran. 17Paano bala ang pag-pakighambal sang alagad sang akon ginoo sa akon ginoo? Kay karon wala na kusug nga nabilin sa akon, kag wala nabilin nga ginhawa sa akon.”

18Niyan may isa nga nagkuhit liwat sa akon kaangay sang dagway sang tawo kag ginpabakud niya ako. 19Kag nagsiling sia, “O lalaki nga hinigugma sing daku, dili magkahadluk, ang paghidait manginsa imo; magpakabakud kag magpakaisug.” Kag sang nagpamolong sia sa akon, nagbaskug ako kag nagsiling, “Magpamolong ang akon ginoo, kay ginpabakud mo ako.” 20Niyan nagsiling sia, “Nakahibalo ka bala ngaa nagakari ako sa imo? Apang karon magabalik ako sa pag-away batok sa principe sang Persia; kag kon maggowa ako, yari karon, magaabut ang principe sang Grecia. 21Apang isugid ko sa imo ang napagkit sa sinulat sang kamatooran: wala gid sing nagapugung sa akon batok sa ila sini kondi si Miguel,#Bug. 12:7. nga inyo principe.

Currently Selected:

DANIEL 10: ABHIL82

Highlight

Copy