DANIEL 1

Ang Tinon-an ni Daniel kag sang Iya mga Abyan

1Sa ikatlong tuig sang paghari ni Joiaquim nga hari sang Juda, si Nabucodonosor nga hari sang Babilonia nag-abut sa Jerusalem kag ginkibon ini.#2 Hari 24:1; 2 Cron. 36:5-7. 2Kag gintugyan sang Ginoo sa iya mga kamut si Joiaquim nga hari sang Juda, pati ang bahin sang mga gamit sang balay sang Dios; kag gindala niya sila sa duta sang Sinar sa balay sang iya dios, kag ginsulud niya ang mga gamit sa balay nga bahandian sang iya dios. 3Niyan ang hari nagpamolong kay Aspenaz, nga agalon sang iya mga eunuco, nga magdala sia sing pila sang katawohan sang Israel, sa kaliwat nga harianon kag sa mga dungganon, 4mga pamatan-on nga walay kasawayan, maayoayo kag sampaton sa tanan nga kaalam, nahiyasan sing ihibalo, may paghangup sang kinaadman, kag may ikasarang sa pagtindug sa palacio sang hari, kag nga ton-an niya sila sang kaalam kag sang hambal sang mga Caldeanhon.#2 Hari 20:17-18; 24:10-16; 2 Cron. 36:10; Isa. 39:7-8. 5Ang hari nagtangdo sa ila sing inadlaw nga bahin sang manamit nga pagkaon sang hari, kag sang alak nga iya ginainum. Saguron sila sing tatlo ka tuig, agud nga sa katapusan sini magtilindug sila sa atubangan sang hari. 6Sa ila sini yara gikan sa mga anak sang Juda sanday Daniel, Ananias, Misael, kag Azarias. 7Kag ang principe sang mga eunuco naghingalan sa ila: si Daniel ginhingalanan niya Beltesasar, si Ananias Sadrac, si Misael Mesac, kag si Azarias Abednego.

8Apang gintuyo ni Daniel sa iya tagiposoon nga indi sia magpadagta sang manamit nga pagkaon sang hari, ukon sang alak nga iya ginainum; busa nagpangabay sia sa principe sang mga eunuco nga indi sia magpadagta sang iya kaugalingon. 9Karon ginhimo sang Dios nga si Daniel makakita sing kalolo kag kalooy sa itololok sang principe sang mga eunuco; 10kag ang principe sang mga eunuco nagsiling kay Daniel, “Nahadluk ako sa hari nga akon ginoo, nga nagtangdo sang inyo pagkaon kag sang inyo ilimnon, kay basi makita niya ang inyo mga nawung nga malain pa nga tolokon sang sa mga pamatan-on nga kasubong ninyo sing panuigon. Gani ginabutang ninyo sa katalagman ang akon olo sa hari.” 11Niyan si Daniel nagsiling sa tulugyanan nga gintangdo sang principe sang mga eunuco kanday Daniel, Ananias, Misael, kag Azarias; 12“Tilawi ang imo mga alagad sing napulo ka adlaw; hatagi kami sing mga utan nga kalan-on kag tubig nga imnon. 13Niyan ipatan-aw ang amon mga nawung sa atubangan mo kag ang nawung sang mga pamatan-on nga nagakaon sang manamit nga mga pagkaon sang hari, kag sono sa imo makita himoa sa imo mga alagad.” 14Gani nagpamati sia sa ila sa sini nga butang, kag gintilawan sila sing napulo ka adlaw. 15Sa tapus ang napulo ka adlaw ang ila mga nawung nagpahayag nga maayoayo pa kag matambok pa sila sa unud sang sa tanan nga pamatan-on nga nagkaon sang manamit nga mga pagkaon sang hari. 16Gani ginkuha sang tulugyanan ang ila manamit nga mga pagkaon kag ang alak nga ila pag-imnon, kag ginhatagan sila sing utan.

17Nahanungud sini nga apat ka pamatan-on, ang Dios naghatag sa ila sing ihibalo kag pagkasampaton sa tanan nga tinon-an kag kaalam; kag si Daniel may paghangup sa tanan nga palanan-awon kag mga damgo. 18Sa katapusan sang mga adlaw, sang gintangdo sang hari nga dalhon sila pasulud, ang principe sang eunuco nagdala sa ila sa atubangan ni Nabucodonosor. 19Kag ang hari naghinun-anon sa ila, kag sa tunga nila tanan wala sing nakita kaangay kay Daniel, kay Ananias, kay Misael, kag kay Azarias; busa nagtindug sila sa atubangan sang hari. 20Kag sa tagsa ka butang sang kaalam kag paghangup nga ginpamangkot sa ila sang hari, nakita niya sila nga maayo pa sing makapulo sa tanan nga salamangkero kag mga manugbabaylan nga yara sa bug-os niya nga ginharian. 21Kag si Daniel nagpadayon tubtub gid sa nahauna nga tuig ni Hari Ciro.

Currently Selected:

DANIEL 1: ABHIL82

Highlight

Copy