AMOS 7
7
Tatlo ka Palanan-awon nahanungud sang Kalaglagan
1Amo ini ang ginpahayag sa akon sang Ginoong Dios: yari karon, naghimo sia sing mga apan sa pagsugud sa pagtubo sang naolihi nga tubo; kag yari karon, amo ini ang naolihi nga tubo sa tapus nga napagalaban sang hari. 2Sang natapus nila sa pagkaon ang hilamon sang duta, ako nagsiling,
“O Ginoong Dios, patawara, ginaampo ko sa imo!
Paano bala nga pagtindug ni Jacob?
Kay diotay sia!” 3Ang Ginoo nagkalisud nahanungud sini:
“Indi mahanabu ini,” nagasiling ang Ginoo.
4Amo ini ang ginpahayag sa akon sang Ginoong Dios: yari karon, ang Ginoong Dios nagtawag sa pagpakigsuay paagi sa kalayo, kag naglamon ini sang daku nga kadadalman kag naghalonhon kuntani sang duta. 5Niyan nagsiling ako,
“O Ginoong Dios, pauntata, ginaampo ko sa imo!
Paano bala nga pagtindug ni Jacob?
Kay diotay sia!”
6Ang Ginoo nagkalisud nahanungud sini;
“Ini man indi mahanabu,” nagasiling ang Ginoong Dios.
7Amo ini ang ginpahayag niya sa akon: yari karon, ang Ginoo nagtindug sa luyo sang kuta nga nahimo sa tonton, nga may isa ka tonton sa iya kamut. 8Kag ang Ginoo nagsiling sa akon, “Amos, ano bala ang ginatan-aw mo?” Kag nagsiling ako, “Isa ka tonton.” Niyan ang Ginoo nagsiling,
“Yari karon, ako magabutang sing tonton
sa tunga sang akon banwa nga Israel;
indi ko na sila pagpasaylohon pa;
9kay ang mga mataas nga duug ni Isaac manginmamingaw,
kag ang mga santuario sang Israel gub-on;
kag magasumpung ako nga may espada sa panimalay ni Jeroboam.”
Si Amos kag si Amasias
10Niyan si Amasias nga sacerdote sang Bet-el nagpadala kay Jeroboam, nga hari sang Israel, nga nagasiling, “Si Amos nagpuhon batok sa imo sa tunga sang panimalay sang Israel; ang duta indi makabatas sang tanan niya nga polong. 11Kay amo ini ang ginasiling ni Amos,
‘Si Jeroboam mapatay sa espada,
kag sa pagkamatuud ang Israel dalhon nga bihag
gikan sa iya duta.’”
12Si Amasias man nagsiling kay Amos, “O ikaw nga manugpanan-aw, lakat, palagyo ka sa duta sang Juda, kag magpangabuhi didto, kag magtagna didto; 13apang dili ka na magpanagna pa sa Bet-el, kay santuario ini sang hari, kag templo ini nga harianon.”
14Niyan nagsabat si Amos kay Amasias, “Indi ako manalagna, ukon anak ako sang manalagna; kondi manugbantay ako sang kahayupan, kag manugtatap sang sicomoro, 15kag ginkuha ako sang Ginoo sa pagsonod sang panong, kag nagsiling sa akon ang Ginoo, ‘Lakat, tagna sa akon katawohan nga Israel.’
16“Busa karon pamatii ang polong sang Ginoo.
Ikaw nagasiling, ‘Dili ka magtagna batok sa Israel,
kag dili magwili batok sa panimalay ni Isaac.’
17Busa amo ini ang ginasiling sang Ginoo:
‘Ang imo asawa manginmakihilawason sa banwa,
kag ang imo mga anak nga lalaki kag ang imo mga anak nga babayi mapukan sa espada,
kag ang imo duta bahinbahinon sa latid;
ikaw imo mapatay sa duta nga dimatinlo,
kag sa pagkamatuud ang Israel dalhon nga bihag gikan sa iya duta.’”
Currently Selected:
AMOS 7: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
