AMOS 5

Pagtawag sa Paghinulsul

1Pamati kamo sining polong nga akon ginagamit nga panalabiton sa inyo, O panimalay sang Israel:

2“Napukan ang ulay sang Israel,

indi na sia makabangon;

napukan sia sa iya duta,

wala gid sing mabangon sa iya.”

3Kay amo ini ang ginasiling sang Ginoong Dios:

“Ang banwa nga nagagowa nga isa ka libo

mabilinan sing isa ka gatus,

kag ang nagagowa nga isa ka gatus

mabilinan sing napulo

sa panimalay sang Israel.”

4Kay amo ini ang ginasiling sang Ginoo sa panimalay sang Israel:

“Pangitaa ninyo ako kag magakabuhi kamo;

5apang dili magpangita sang Bet-el,

ukon magsulud sa Gilgal

kag dili magpadayon sa Beer-seba;

kay ang Gilgal magakadto sing totoo sa kabihagan,

kag ang Bet-el manginwala sing pulus.”

6Pangitaa ang Ginoo kag magakabuhi kamo,

basi nga mag-ibwal sia kaangay sang kalayo sa panimalay ni Jose,

kag ini magapanglamon, nga wala gid sing makapapalong sini sa Bet-el,

7kamo nga nagahimo nga ajenjo sang katarungan,

kag nagapilak sa duta sang pagkamatarung!

8Pangitaa sia nga nagahimo sang Pleyades kag Orion,#Job 9:9; 38:31.

kag nagabaylo sang landong sang kamatayon sa kaagahon,

kag nagapadulum sang kaadlawon sa kagab-ihon,

nga nagatawag sang mga tubig sang dagat,

kag ginaula sila sa kadaygan sang duta,

ang Ginoo amo ang iya ngalan,

9nga nagadala sing hinali nga kalaglagan sa makusug,

sa bagay nga magaabut ang kalaglagan sa pamakud.

10Ginadumtan nila ang nagasabdong sa gawang,

kag ginakangil-aran nila ang nagapamolong sing matadlong.

11Busa sanglit nga ginatapak ninyo ang mga makalolooy

kag nagasuku sa iya sang trigo,

nagpatindug kamo sing mga balay nga bato nga binasbasan,

apang indi kamo makapuyo sa ila;

nagtanum kamo sing matahum nga mga ulubasan,

apang indi kamo makainum sang alak nila.

12Kay kilala ko kon daw ano kadamu ang inyo mga paglalis,

kag kon daw ano kagamhanan ang inyo mga sala—

kamo nga nagapapiot sang matarung, nga nagakuha sing hamham,

kag nagapatalang sang mga nawad-an sa gawang.

13Busa ang mainandamon magahipus sa amo nga tion;

kay ini tion nga malaut.

14Pangitaa ang maayo, kag indi ang malaut,

agud nga mabuhi kamo;

kag sa amo ang Ginoo, ang Dios sang mga kasoldadosan, manginkaupud ninyo,

subong sang ginasiling ninyo.

15Dumti ang malaut, kag higugmaa ang maayo,

kag tukura ang katarungan sa gawang;

ayhan ang Ginoo, ang Dios sang mga kasoldadosan,

magamaayo sa mga nabilin ni Jose.

16Busa amo ini ang ginasiling sang Ginoo, ang Dios sang mga kasoldadosan, ang Ginoo:

“Ang paghaya manginsa tanan nga masangkad nga dalanon;

kag magasiling sila sa tanan nga dalan, ‘Abaw! Abaw!’

Tawgon nila ang mangunguma sa paglalaw

kag ang mga sampaton sa panalabiton sa paghaya,

17kag sa tanan nga ulubasan may paghaya,

kay magalatas ako sa tunga nimo,”

nagasiling ang Ginoo.

18Kailo kamo nga nagahandum sang adlaw sang Ginoo!

Busa ngaa bala luyag ninyo ang adlaw sang Ginoo?

Kadudulman ini, kag indi kapawa;

19subong abi sang tawo nga nagpalagyo sa leon,

kag ginsugata sia sang oso;

ukon nagsulud sa balay kag naghamboy sang iya kamut sa dingding,

kag ginkagat sia sang man-ug.

20Indi bala manginkadudulman ang adlaw sang Ginoo, kag indi kapawa,

tama gid kadulum nga wala sing kasanag sa iya?

21“Ginadumtan ko, ginatamay ko ang inyo mga piesta,

kag indi ako magkalipay sa inyo mga pagtilipon nga maligdong.

22Bisan dolotan ninyo ako sang inyo mga halad-nga-sinonog kag mga halad-nga-kalan-on,

indi ako magbaton sa ila,

kag indi ko pagsapakon

ang mga halad-sa-paghidait sang inyo mga pinatambok nga sapat.#Isa. 1:11-14.

23Kuhaa ninyo sa akon ang kagahud sang inyo mga ambahanon;

indi ako magpamati sang lanton sang inyo mga viola.

24Apang pabulhoga ang katarungan subong sang mga tubig,

kag ang pagkamatarung subong sang mabaskug nga kasulgan.

25“Gindalhan bala ninyo ako sing mga halad kag mga dolot sa kamingawan sing kap-atan ka tuig, O panimalay sang Israel? 26Gindala ninyo ang kayangkayang sang inyo hari, kag ang suludlan sang inyo mga larawan, ang bitoon sang inyo dios, nga ginhimo ninyo nga sa inyo; 27busa ipadala ko kamo sa kabihagan sa unhan sang Damasco,”#Binu. 7:42-43. nagasiling ang Ginoo, nga ang iya ngalan amo ang Dios sang mga kasoldadosan.

Currently Selected:

AMOS 5: ABHIL82

Highlight

Copy