MGA BINUHATAN 8

Si Saulo Nagahingabut sang Iglesia

(Binu. 26:9-11)

1Kag sa sadtong adlaw nag-abut ang dakung paghingabut sa iglesia nga didto sa Jerusalem; kag sila tanan nag-aplaag sa bug-os nga mga ginsakpan sang Judea kag Samaria, luwas ang mga pinadala. 2Si Esteban ginlubung sang mga tawo nga mainampoon, kag naghaya sing daku tungud sa iya. 3Apang ginpaantus sing lakas ni Saulo ang iglesia, nga nagapamalaybalay, kag sang ginpangguyud ang mga lalaki kag mga babayi ginpanulud sila sa bilanggoan.

Ang Maayong Balita Ginawali sa Samaria

4Karon ang mga nag-aplaag nagpanglakatan nga nagawali sang polong. 5Si Felipe nagdolhog sa isa ka banwa sang Samaria, kag nagbantala sa ila sang Cristo. 6Kag ang mga kadam-an nagtalupangud sing hiusa sang ginpamolong ni Felipe, sang pagkabati nila sa iya kag pagkakita sang mga tanda nga iya ginhimo. 7Kay ang mga espiritu nga dimatinlo gikan sa madamu naggowa, nga nagasinggit sa mabaskug nga tingug; kag ang madamu nga paralitiko ukon piang gin-ayo. 8Gani may daku nga kalipay sa sadtong banwa.

9Apang may tawo didto nga si Simon ang ngalan nga nagpanghikot anay sing babaylan sa banwa kag nagpayanghag sang katawohan sang Samaria, nga nagapakadaku sang iya kaugalingon. 10Sa iya sila tanan nagtalupangud, kutub sa labing magamay tubtub sa labing dalagku, nga nagasiling, “Ining tawo amo yadtong gahum sang Dios nga ginatawag Daku.” 11Kag nagtalupangud sila sa iya, bangud nga sa malawig nga tion ginpayanghag niya sila sang iya mga babaylan. 12Apang sang nagtoo sila kay Felipe nga nagawali sang maayong balita nahanungud sang ginharian sang Dios kag sang ngalan ni Jesu-Cristo, ginbautisohan sila, mga lalaki kag mga babayi. 13Bisan si Simon gid nagtoo, kag sang nabautisohan na nagpadayon sia upud kay Felipe. Kag sang pagkakita niya sang mga tanda kag mga buhat nga gamhanan nga nahimo, natingala sia.

14Karon sang nakabati ang mga pinadala sa Jerusalem nga ang Samaria nagbaton sang polong sang Dios, ginpadala nila sa ila si Pedro kag si Juan, 15nga sang pagdolhog nila nagpangamuyo sila tungud sa ila agud nga mabaton nila ang Espiritu Santo; 16kay ini wala pa maholog sa bisan kay sin-o sa ila, kondi nabautisohan sila sa ngalan lamang ni Ginoong Jesus. 17Niyan gintakdungan nila sila sang ila mga kamut kag nabaton nila ang Espiritu Santo. 18Karon sang nakita ni Simon nga paagi sa pagtakdung sang mga kamut sang mga pinadala ginhatag ang Espiritu Santo, nagtanyag sia sa ila sing cuarta, 19nga nagasiling, “Hatagi man ako ninyo sining gahum, agud nga sa bisan kay sin-o itakdong ko ang akon mga kamut makabaton sia sang Espiritu Santo.” 20Apang si Pedro nagsiling sa iya, “Ang imo pilak mawala upud sa imo, bangud nga nagahunahuna ka sa pag-agum sang hiyas sang Dios sa cuarta! 21Wala ka sing bisan ano nga bahin ukon kapalaran sa sining butang, kay ang imo tagiposoon indi matarung sa atubangan sang Dios.#Sal. 78:37. 22Busa hinulsuli ining kalautan mo, kag pangamuyo sa Ginoo, basi ayhan ang hunahuna sang imo tagiposoon patawaron sa imo. 23Kay ginatan-aw ko nga yara ka sa apdo sang kapaitan kag sa gapus sang kalautan.” 24Kag si Simon nagsabat, “Pangamuyo kamo sa Ginoo tungud sa akon, agud nga walay mag-abut sa akon sang napamolong ninyo.

Si Felipe kag ang Eunuco nga Taga-Etiopia

25Karon sang nakapanaksi sila kag nakahambal sang polong sang Ginoo, nagbalik sila sa Jerusalem, kag nagwali sang maayong balita sa madamu nga minoro sang mga Samariahanon.

26Apang ang manugtunda sang Ginoo nagpamolong kay Felipe, “Tindug ka kag magkadto nayon sa bagatnan sa dalan padolhog gikan sa Jerusalem pa Gaza.” Ini dalan sa desierto. 27Kag nagtindug sia kag nagkadto. Kag yari karon, isa ka tawo nga taga-Etiopia, nga eunuco, nga may daku nga pagbulut-an sa idalum ni Candace nga hara sang mga Etiopiahanon, nga tulugyanan sang tanan niya nga bahandi, nga nagkadto sa Jerusalem sa pagsimba 28kag nagapauli; sang nagalingkod sa iya kangga, nagabasa sia kay Isaias nga manalagna. 29Kag ang Espiritu nagsiling kay Felipe, “Palapit ka kag magbuylog sa sining kangga.” 30Gani si Felipe nagdalagan sa iya, kag nabatian sia nga nagabasa kay Isaias nga manalagna, kag nagpamangkot, “Nakahangup ka bala sang imo ginabasa?” 31Kag nagsiling sia, “Paano bala nga pagkahangup ko, kon walay isa nga magtuytuy sa akon?” Kag nagpangabay sia kay Felipe nga magsakay kag maglingkod upud sa iya. 32Karon ang bahin sang kasulatan nga ginabasa niya amo ini:

“Gindala sia sa ihawan subong sang carnero

ukon subong sang cordero nga nag-apa sa atubangan sang iya manug-alot,

gani sia wala magbuka sang iya baba.

33Sa iya pagpaubus gindumili sa iya ang pagkatarung.

Sin-o bala ang magaasoy sang iya kaliwatan?

Kay ang iya kabuhi ginkuha sa duta.”#Isa. 53:7-8.

34Kag ang eunuco nagsiling kay Felipe, “Nagapakilooy ako sa imo, nahanungud kay sin-o bala nagapamolong ang manalagna sini, sa iya kaugalingon ukon sa iban pa?” 35Niyan si Felipe nagbungat sang iya baba, kag sumugud sa sining kasulatan ginwali sa iya ang maayong balita ni Jesus. 36Kag sang nagpadayon sila sa dalan nag-abut sila sa tubig, kag ang eunuco nagsiling, “Yari karon, may tubig! Ano bala ang nagasablag sa akon sa pagpabautiso?” [ 37Kag si Felipe nagsiling, “Kon nagatoo ka sa bug-os mo nga tagiposoon, sarang ka.” Kag nagsabat sia, “Nagatoo ako nga si Jesu-Cristo Anak sang Dios.”] 38Kag ginpadolog niya ang kangga, kag naglusung sila nga duha sa tubig, si Felipe kag ang eunuco, kag ginbautisohan niya sia. 39Kag sang nakatakas sila sa tubig, si Felipe ginbalitbit sang Espiritu sang Ginoo; kag wala na sia makita sang eunuco, kag nagpadayon sia nga malipayon sa iya dalanon. 40Apang si Felipe nakita sa Azoto, kag sang nagalatas ginwali niya ang maayong balita sa tanan nga banwa tubtub nga nag-abut sia sa Cesarea.

Currently Selected:

MGA BINUHATAN 8: ABHIL82

Highlight

Copy