MGA BINUHATAN 24

Ang Pangapin ni Pablo sa atubangan ni Felix

1Kag sa tapus sang lima ka adlaw nagdolhog ang pinakamataas nga sacerdote nga si Ananias kaupud sang pila ka tigulang kag si Tertulo, nga manugpangatubang. Nagsugid sila sa pangolo-puud batok kay Pablo; 2kag sang gintawag sia, si Tertulo nagsugud sa pagsumbung sa iya, nga nagasiling:

“Tungud nga paagi sa imo nagaagum kami sing daku nga kalinong, kag bangud sang imo pagkamainamanon ang kalautan nabadlong sa sining banwa, 3ginabaton namon ini sa tanan nga bagay kag sa tanan nga duug nga may bug-os nga pagpasalamat, labing halangdon nga Felix. 4Apang, agud nga indi ako makaawat pa sa imo, nagapakilooy ako sa imo nga pamatian mo kami sa imo pagkaayo sa malip-ot nga mga polong. 5Kay nakita namon ining tawo nga magamo, manugpatigayon sang mga ribok sa tunga sang tanan nga Judio sa bug-os nga kalibutan, kag pangolo sang bunghay sang mga Nazaretnon. 6Kapin pa nagtinguha sia sa pagdagta sang templo, apang gindakup namon sia [kag kuntani hukman namon sia sono sa amon kasogoan. 7Apang nag-abut si Lisias, nga tribuno, kag sa daku nga paglugus gin-agaw niya sia sa amon mga kamut, 8nga nagasogo sa iya manunumbung sa pagkari sa atubangan nimo.] Sa pag-usisa mo sa iya sarang ka makahibalo sini tanan nga butang nga ginasumbung namon batok sa iya.”

9Ang mga Judio nag-ulugyon man sa panumbung, nga nagapalig-on nga ini tanan matuud.

10Kag sang nasinyasan sia sang pangolo-puud sa paghambal, si Pablo nagsabat:

“Sa bagay nga nahibaloan ko nga ikaw hukom sa madamu nga tuig sining pungsud, nagakalipay ako sa paghimo sang akon pag-apin. 11Sa mahibaloan mo, indi pa kapin sa napulog duha ka adlaw nga nagtaklad ako sa Jerusalem sa pagsimba; 12kag wala nila ako makita sa templo nga nagapakigbanggianay sa bisan kay sin-o nga tawo ukon nagasugyot sing punsok, ukon sa mga sinagoga, ukon sa banwa. 13Kag indi sila makapamatuud sa imo sang ginasumbung nila karon batok sa akon. 14Apang ini ginatu-ad ko sa imo, nga sono sa Dalan, nga ginatawag nila nga bunghay, sa amo nagasimba ako sa Dios sang amon mga ginikanan, nga nagatoo sang tanan nga butang nga sono sa kasogoan kag nga nasulat sa mga manalagna, 15nga may paglaum sa Dios nga ini sila man nagabaton, nga may pagkabanhaw sang mga matarung kag mga dimatarung. 16Sa sini ako man nagapanikasug sa paghuput gihapon sing kaisipan nga dimalinapason sa Dios kag sa mga tawo. 17Karon sa tapus ang pila ka tuig nagkadto ako sa pagdala sa akon pungsud sing mga limos kag mga halad. 18Sa ginahimo ko ini, nakita nila ako nga natinloan sa templo, sa walay punsok ukon kagubut.#Binu. 21:17-28. Apang may pila ka mga Judio gikan sa Asia— 19dapat sila kuntani magkari diri sa atubangan nimo kag magsumbung, kon may butang sila batok sa akon. 20Ukon pasilinga ini gid nga mga tawo kon ano nga kasaypanan ang nakita nila sa akon sang nagtindug ako sa atubangan sang corte, 21luwas sining isa ka polong nga ginsinggit ko sang nagatindug ako sa tunga nila, ‘Nahanungud sa pagkabanhaw sang mga patay ginahukman ako sa atubangan ninyo karon nga adlaw.’#Binu. 23:6.”

22Apang si Felix, nga nakahibalo sing sibo gid nahanungud sang Dalan, nagpahulat sa ila, nga nagasiling, “Kon magdolhog si Lisias nga tribuno, binagbinagon ko ang inyo kasaba.” 23Niyan nagsogo sia sa capitan nga bantayan sia apang pahuluhilwayan, kag indi pagdilian sa bisan sin-o sang iya mga abyan sa pag-alagad sa iya.

24Sa tapus ang pila ka adlaw nag-abut si Felix upud ang iya asawa nga si Drusila, nga Judia; kag nagpatawag sia kay Pablo kag nagpamati sa iya nahanungud sang pagtoo kay Cristo Jesus. 25Kag sang nagtalastas sia sang pagkamatarung kag pagpugung sa kaugalingon kag sang paghukom nga palaabuton, nakugmat si Felix kag nagsiling, “Lakat ka anay karon; kon may kahigayonan ako ipatawag ko ikaw.” 26Sa amo nga tion man naglaum sia nga hatagan sia ni Pablo sing cuarta. Gani ginpatawag niya sia sing masunsun kag nagpakighambal sa iya. 27Apang sang nagligad ang duha ka tuig, si Felix gintal-usan ni Porcio Festo; kag si Felix, nga buut magpahamuut sa mga Judio, nagbiya kay Pablo sa bilanggoan.

Currently Selected:

MGA BINUHATAN 24: ABHIL82

Highlight

Copy