MGA BINUHATAN 22

1“Mga kauturan kag mga ginikanan, pamatii ninyo ang pangapin nga ginahimo ko karon sa atubangan ninyo.”

2Kag sang pagkabati nila nga nagpamolong sia sa ila sa hambal nga Hebreo, nagtinong pa gid sila. Kag nagsiling sia:

3“Ako Judio, nga natawo sa Tarso sang Cilicia, apang ginpadaku sa sining banwa, nga gintudloan sa tiilan ni Gamaliel#Binu. 5:34-39. sono sa tul-id nga paagi sang kasogoan sang aton mga ginikanan, nga makugi tungud sa Dios subong sa inyo tanan karon nga adlaw. 4Ginhingabut ko ining Dalan tubtub sa kamatayon, nga ginapanggapus ko kag ginapamilanggo ang mga lalaki kag mga babayi,#Binu. 8:3. 5subong nga ang pinakamataas nga sacerdote kag ang katilingban sang mga tigulang nagapanaksi sa akon. Sa ila nakabaton ako sing mga sulat nga sa mga kauturan, kag nagkadto ako sa Damasco sa pagkuha sa ila man nga yadto didto kag sa pagdala sa ila nga gapus pa Jerusalem nga silotan.

Ang Pagliso ni Pablo

(Binu. 9:1-19; 26:12-18)

6“Sang nagpakadto ako kag naghinamput sa Damasco, sa mga odtong adlaw sa hinali nagsilak palibut sa akon ang isa ka dakung kapawa gikan sa langit. 7Kag napukan ako sa duta kag nakabati sing tingug nga nagasiling sa akon, ‘Saulo, Saulo, ngaa bala ginahingabut mo ako?’ 8Kag nagsabat ako, ‘Sin-o bala ikaw, Ginoo?’ Kag nagsiling sia sa akon, ‘Ako si Jesus nga Nazaretnon nga ginahingabut mo.’ 9Karon ang mga nag-upud sa akon nakakita gid sang kapawa apang wala sila makabati sang tingug sang nagpamolong sa akon. 10Kag nagsiling ako, ‘Ano bala ang himoon ko, Ginoo?’ Kag ang Ginoo nagsiling sa akon, ‘Tindug ka, kag magkadto sa Damasco, kag didto isugid sa imo ang tanan nga gintangdo nga himoon mo.’ 11Kag sang indi ako makakita bangud sang kasilaw sadtong kapawa, nakaabut ako sa Damasco nga gintuytuyan ako sa kamut sang nag-upud sa akon.

12“Kag ang isa nga si Ananias, tawong mainampoon sono sa kasogoan, nga ginsugid nga maayo sang tanan nga Judio nga nagpuyo didto, 13nagkari sa akon, kag sa nagatupad sa akon nagsiling, ‘Utud Saulo, batona ang imo itololok.’ Kag sa sadto gid nga takna nabaton ko ang akon itololok kag nakita sia. 14Kag nagsiling sia, ‘Gintangdoan ka sang Dios sang aton mga ginikanan sa pagkilala sang iya kabubut-on, sa pagtan-aw sang Matarung kag sa pagpamati sing tingug sa iya baba; 15kay manginsaksi ka niya sa tanan nga tawo sang imo nakita kag nabatian. 16Kag karon ngaa bala nagapalantang ka? Tindug ka kag magpabautiso, kag manghugas sang imo mga sala, nga nagapanawag sa iya ngalan.’

Ang Pagtawag kay Pablo nga Makadto sa mga Gentil

17“Sang nakabalik ako sa Jerusalem kag nagapangamuyo sa templo, nag-abut sa akon ang isa ka pagpanganinaw 18kag nakita ko sia nga nagasiling sa akon, ‘Dalidali ka kag maggowa sa Jerusalem sa gilayon, bangud nga indi sila magbaton sang imo pagpamatuud nahanungud sa akon.’ 19Kag nagsiling ako, ‘Ginoo, sila gid nakahibalo nga ginpamilanggo ko kag ginpamunal sa tagsa ka sinagoga ang mga nagtoo sa imo. 20Kag sang nag-agay ang dugo sang imo saksi nga si Esteban, ako man nagatambong kag nagapasugut, kag nagabantay sang mga panapton sang mga nagpatay sa iya.#Binu. 7:58.’ 21Kag nagsiling sia sa akon, ‘Lakat ka; kay ipadala ko ikaw sa malayo sa mga Gentil.’”

Si Pablo sa Kagamhanan sang Tribuno

22Ginpamatian nila sia tubtub sining polong; niyan gintib-ong nila ang ila mga tingug kag nagsiling, “Dulaa sa duta ang tawo nga subong sa iya! Kay indi nagakaigo nga magkabuhi sia.” 23Kag sang nagsinggit sila kag nagpilak sang ila mga panapton kag nagasabwag sing yab-ok sa hangin, 24ang tribuno nagsogo nga dalhon sia sa pamakud, kag nagmando nga usisaon sia paagi sa lapdus, agud nga mahibaloan kon sa ano nga kabangdanan nga nagsinggit sila sing subong batok sa iya. 25Apang sang nagaid nila sia sang ginihay nga panit, nagsiling si Pablo sa capitan nga nagatambong, “Tugut bala sa inyo ang paglapdus sa tawo nga Romanhon, kag wala pa mahukmi?” 26Sang pagkabati sang capitan sini, nagkadto sia sa tribuno kag nagsugid sa iya, “Ano bala ang buut mo himoon? Kay ining tawo Romanhon.” 27Gani ang tribuno nagkadto kag nagsiling sa iya, “Sugiri ako, Romanhon ka bala?” Kag nagsabat sia, “Hoo.” 28Ang tribuno nagsabat, “Sa daku nga bili naagum ko ining pagkabanwahanon.” Si Pablo nagsiling, “Apang ako natawo nga Romanhon.” 29Gani sa gilayon nagtaliwan ang buut mag-usisa sa iya; kag ang tribuno man hinadlukan sang pagkahibalo niya nga sia Romanhon, kag bangud nga ginpagapus niya sia.

Si Pablo sa atubangan sang Corte

30Apang sa madason nga adlaw, sang buut sia makisayud sang kamatooran kon sa ano nga ginsumbung sia sang mga Judio, ginhubaran niya sia, kag nagsogo sia nga magtipon ang puno nga mga sacerdote kag ang bug-os nga corte, kag ginpapanaug niya si Pablo kag ginpaatubang sia sa ila.

Currently Selected:

MGA BINUHATAN 22: ABHIL82

Highlight

Copy