MGA BINUHATAN 20

Ang Panlakatan ni Pablo sa Macedonia kag sa Grecia

1Sang nagpuas ang kinagahud, ginpatawag ni Pablo ang mga gintoton-an kag sang nalaygayan sila nagpaalam sia sa ila kag nagtaliwan pakadto sa Macedonia. 2Sang nalatas niya yadtong mga bahin kag nakahatag sa ila sing madamung laygay, nag-abut sia sa Grecia. 3Nagpuyo sia didto sing tatlo ka bulan, kag sang ginpuhon sia sang mga Judio sang buut na sia maglayag pa Siria, nagtapat sia sa pagbalik paagi sa Macedonia. 4Nag-upud sa iya si Sopater nga taga-Berea, nga anak ni Pirro; kag sa mga taga-Tesalonica, si Aristarco kag si Segundo; kag si Gayo nga taga-Derbe, kag si Timoteo; kag sa mga taga-Asia, si Tiquico kag si Trofimo. 5Ini sila nag-una kag naghulat sa amon sa Troas, 6apang sa tapus ang mga adlaw sang mga Tinapay nga walay Tapay, naglayag kami gikan sa Filipos kag nag-abut kami sa ila sa Troas sa lima ka adlaw, diin nagpabilin kami sing pito ka adlaw.

Ang Pagduaw kag Pagpaalam ni Pablo sa Troas

7Sa nahaunang adlaw sang semana, sang nagtipon kami sa pagtipiktipik sing tinapay, nagwali sa ila si Pablo, nga buut magtaliwan sa adlaw nga madason; kag sia nagpalawig sang iya wali tubtub sa tungang gab-i. 8May madamu nga suga sa hulut nga naibabaw diin kami nagtipon. 9Kag may naglingkod sa galawahan nga isa ka pamatan-on nga ginhingalanan si Eutico. Gindaug sia sang hamuuk nga katologon sang ginpalawig pa ni Pablo ang wali; kag sanglit nga gindaug sang iya katologon, naholog sia gikan sa ikatlo nga panalgan kag ginhakwat sia nga patay. 10Apang nagpanaug si Pablo kag nagduko sa iya, kag sang nagahakus sa iya nagsiling, “Indi kamo magpalibog, kay ang iya kabuhi yara sa iya.” 11Kag sang nakasaka si Pablo kag nakatipiktipik sang tinapay kag nakakaon, nagpakighambal sia sa ila sing malawig, tubtub sa pamanagbanag, kag nagtaliwan sia. 12Kag gindala nila nga buhi ang bata, kag indi diotay ang paglipay sa ila.

Ang Panakayon gikan sa Troas pa Mileto

13Apang kami, nga nag-una sa sakayan, naglayag pa Ason, sa katuyoan sa pagpasakay kay Pablo didto; kay amo ini ang iya gintangdo, nga nagatuyo nga magakadto sia paagi sa duta. 14Kag sang ginsugata niya kami sa Ason, ginpasakay namon sia, kag nagdungka sa Mitilene. 15Kag sang nagalayag gikan didto naglambut kami sa madason nga adlaw sa tampad sang Quio; sang adlaw nga madason naghapit kami sa Samos; kag [sang nakapabilin sa Trogilio] sa adlaw nga madason nagdungka kami sa Mileto. 16Kay si Pablo nakatapat nga indi maghapit sa Efeso, agud nga indi sia magdugay sa Asia; kay nagasako sia, kon mahimo, nga didto sia sa Jerusalem sa adlaw sang Pentecostes.

Ang Paalam ni Pablo sa mga Tigulang sa Efeso

17Kag gikan sa Mileto nagpasogo sia sa Efeso kag ginpatawag niya ang mga tigulang sang iglesia. 18Kag sang pag-abut nila sa iya, nagsiling sia sa ila:

“Kamo gid nakahibalo kutub sa nahaunang adlaw nga nagtapak ako sa Asia kon ano ang pagginawi ko kaupud ninyo sa tanan nga tion, 19nga nagaalagad sa Ginoo sa bug-os nga pagpailub kag may mga luha kag may mga pagtilaw nga nag-abut sa akon bangud sa mga pagpuhon sang mga Judio; 20kon paano nga wala ako mag-isol sa pag-asoy sa inyo sang bisan ano nga mapuslanon, kag nagatudlo sa inyo sa dayag kag sa pamalaybalay, 21nga nagapanaksi sa mga Judio kag sa mga Griego sang paghinulsul sa Dios kag pagtoo sa aton Ginoong Jesu-Cristo. 22Kag yari karon, nagakadto ako nga nagapus sa Espiritu pa Jerusalem, nga wala makahibalo sang mahanabu sa akon didto; 23luwas nga ang Espiritu Santo nagapamatuud sa akon sa tagsa ka banwa nga ang mga gapus kag mga kapipit-an nagahulat sa akon. 24Apang wala ko pagkabiga ang akon kabuhi nga mahal sa akon kaugalingon,#2 Tim. 4:7. agud nga matapus ko ang akon dalaganon kag ang hilikuton nga akon nabaton kay Ginoong Jesus, sa pagpanaksi sang maayong balita sang bugay sang Dios. 25Kag karon, yari karon, nahibaloan ko nga kamo tanan nga ginliburan ko nga nagabantala sang ginharian indi na makakita sang akon nawung. 26Busa nagapanaksi ako sa inyo sini nga adlaw nga matinlo ako sa dugo ninyo tanan, 27kay wala ako mag-isol sa pag-asoy sa inyo sang bug-os nga laygay sang Dios. 28Tatapa ang inyo mga kaugalingon kag ang bug-os nga panong, nga sa ila ginhimo kamo sang Espiritu Santo nga mga manugtatap, sa pagpahalab sang iglesia sang Dios nga ginbakal niya sang iya kaugalingon nga dugo. 29Nahibaloan ko nga sa makataliwan na ako sudlon kamo sang mga lobo nga mapintas, nga indi magpaligad sang panong; 30kag gikan sa inyo gid magalutaw ang mga tawo nga nagapamolong sing mga butang nga balingag, sa pagpasonod sa ila sang mga gintoton-an. 31Busa magbantay kamo, nga nagapanumdum nga sa sulud sang tatlo ka tuig sa gab-i kag adlaw wala ako mag-untat sa paglaygay nga may mga luha sa tagsatagsa. 32Kag karon ginatugyan ko kamo sa Dios kag sa polong sang iya bugay, nga makasarang sa pagpalig-on sa inyo kag sa paghatag sa inyo sang panublion upud sa tanan nga ginpakabalaan. 33Wala ako nagkaibug sang pilak ukon bulawan ukon panapton ni bisan sin-o. 34Kamo gid nakahibalo nga ining mga kamut nagpanghikut sa akon mga kinahanglan, kag sa ila sang akon mga kaupud. 35Sa tanan nga butang naghatag ako sa inyo sing solondan nga sa pagpangabudlay sing subong kinahanglan ninyo buligan ang mga maluya, kag dumdumon ang mga polong ni Ginoong Jesus, nga sia gid nagsiling, ‘Bulahan pa ang paghatag sang sa pagbaton.’”

36Kag sang nakapamolong sia sini, nagluhud sia kag nagpangamuyo kaupud nila tanan. 37Kag sila tanan naghibi sing tama kag ginhakus nila si Pablo kag ginhalukan sia, 38nga nagakasubo labi sa tanan bangud sang polong nga nahambal niya, nga indi na sila makakita sang iya nawung. Kag gindul-ong nila sia tubtub sa sakayan.

Currently Selected:

MGA BINUHATAN 20: ABHIL82

Highlight

Copy