MGA BINUHATAN 18

Si Pablo sa Corinto

1Sa tapus sini naghalin sia sa Atenas kag nagkadto sa Corinto. 2Kag nakita niya ang isa ka Judio nga ginhingalanan si Aquila, nga tumanduk sa Ponto, nga bag-o pa lang mag-abut gikan sa Italia kaupud ang iya asawa nga si Priscila, bangud nga si Claudio nagsogo sang tanan nga Judio sa paghalin sa Roma. Kag nagkadto sia sa pagpakigkita sa ila; 3kag bangud nga kaangay sila sing palangitan-an nagdayon sia sa ila, kag nagpangabudlay sila, kay sa ila palangitan-an manughimo sila sing mga layanglayang. 4Kag nagpakigbais sia sa sinagoga sa tagsa ka adlaw nga inugpahuway, kag nagbuyok sang mga Judio kag mga Griego.

5Sang nagdolhog si Silas kag si Timoteo gikan sa Macedonia, masako si Pablo sa pagwali, nga nagapanaksi sa mga Judio nga si Jesus amo ang Cristo. 6Kag sang nagsumpong sila kag nagpasipala sa iya, ginwaswas niya ang iya panapton kag nagsiling sa ila, “Ang inyo dugo manginsa inyo gid mga olo! Ako walay salabton. Kutub karon makadto ako sa mga Gentil.” 7Kag nagtaliwan sia didto kag nagsulud sa balay sang tawo nga ginhingalanan si Tito Justo, nga masinimbahon sa Dios; ang iya balay iping sa sinagoga. 8Si Crispo, nga manugdumala sang sinagoga, nagtoo sa Ginoo, pati ang bug-os niyang panimalay; kag madamu sang mga taga-Corinto nga nakabati kay Pablo nagtoo kag ginbautisohan. 9Kag sa kagab-ihon ang Ginoo nagsiling kay Pablo sa palanan-awon, “Dili ka magkahadluk, kondi magpamolong kag dili maghipus; 10kay ako kaupud nimo, kag walay tawo nga magdamhag sa paghalit sa imo; kay may madamu ako nga katawohan sa sining banwa.” 11Kag nagpuyo sia didto sing isa ka tuig kag anum ka bulan, nga nagapanudlo sang polong sang Dios sa tunga nila.

12Apang sang si Galion ang proconsul sa Acaya, ang mga Judio nagtingub sa pagdamhag kay Pablo kag gindala sia sa atubangan sang hukmanan, 13nga nagasiling, “Ining tawo nagabuyok sang mga tawo sa pagsimba sa Dios batok sa kasogoan.” 14Apang sang si Pablo buut magtikab sang iya baba, si Galion nagsiling sa mga Judio, “Kon ini butang nga sayup ukon malaut nga pagkabanyaga, O mga Judio, may katarungan nga batason ko kamo; 15apang sanglit ini kasuayon nahanungud sa mga polong kag mga ngalan kag sa inyo kaugalingon nga kasogoan, kamo inyo ang mahibalo sini; indi ako buut magmanginhukom sining mga butang.” 16Kag gintabog niya sila gikan sa hukmanan. 17Kag sila tanan nagdakup kay Sostenes, nga manugdumala sang sinagoga, kag ginbunal sia sa atubangan sang hukmanan. Apang si Galion wala magsapak sini.

18Sa tapus sini si Pablo nagpabilin pa sing madamung adlaw, kag nagpaalam sa mga kauturan kag nagsakay pa Siria, kag kaupud niya si Priscila kag si Aquila. Nagpabulug sia sa Cencreas, kay may panaad sia.#Num. 6:18. 19Kag nag-abut sila sa Efeso, kag ginbayaan ni Pablo sila didto; apang sia iya nagsulud sa sinagoga kag nagpakigbais sa mga Judio. 20Sang ginpangayo nila sia sa pagpabilin sing madugaydugay pa nga tion, wala sia magsugut; 21kondi sang nagapaalam sia sa ila sia nagsiling, “Magabalik ako ugaling sa inyo kon buut sang Dios,” kag naglayag sia gikan sa Efeso.

Si Pablo Nagabalik sa Antioquia kag Nagasugud sang Ikatlong Panlakatan

22Sang nakadungka sia sa Cesarea, nagtaklad sia kag gin-abiabi niya ang iglesia, kag niyan nagdolhog pa Antioquia. 23Sang nakapabilin sia sing pila ka tion didto nagtaliwan sia kag naglatas sing pasonod sa ginsakpan sang Galacia kag Frigia, nga nagapalig-on sang tanan nga gintoton-an.

Si Apolos Nagawali sa Efeso

24Karon nag-abut sa Efeso ang isa ka Judio nga ginhingalanan si Apolos, nga tumanduk sa Alejandria. Sia tawo nga sampaton sa hambal, madagmit kag gamhanan sa mga kasulatan. 25Sia naton-an sa dalan sang Ginoo; kag sanglit nga nagasilabo sa espiritu, nagpamolong sia kag nagpanudlo sing sibo gid sang mga butang nahanungud kay Jesus, bisan nakahibalo lamang sia sang bautismo ni Juan. 26Nagsugud sia sa pagpamolong nga may kasidla sa sinagoga; apang sang napamatian sia ni Priscila kag ni Aquila, gindala nila sia sa ila kag gintalastas sa iya sing sibo pa gid ang dalan sang Dios. 27Kag sang buut sia maglaton sa Acaya, ginpabaskug sia sang mga kauturan, kag nagsulat sa mga gintoton-an sa pagbaton sa iya. Sang pag-abut niya, nakabulig sia sing daku sa mga nagtoo paagi sa bugay, 28kay sa dakung kagamhanan ginlutus niya ang mga Judio sa dayag, nga nagapakita paagi sa mga kasulatan nga si Jesus amo ang Cristo.

Currently Selected:

MGA BINUHATAN 18: ABHIL82

Highlight

Copy