MGA BINUHATAN 12
12
Si Santiago Ginapatay; si Pedro Ginabilanggo
1Sa mga amo yadtong tion si Herodes nga hari nagbayaw sang iya mga kamut sa pagpintas sang pila sa iglesia. 2Ginpatay niya sa espada si Santiago nga utud ni Juan; 3kag sang nakita niya nga ini nagpahamuut sa mga Judio, nagpadayon sia sa pagdakup kay Pedro man. Ini sa mga adlaw sang Tinapay nga walay Tapay. 4Kag sang nadakpan niya sia, ginsulud sia sa bilanggoan, kag gintugyan sia sa apat ka tinag-apat nga mga soldado sa pagbantay sa iya, nga nagabuko sa pagpaatubang sa iya sa katawohan sa tapus ang Pascua.#Ex. 12:1-27. 5Gani ginbantayan si Pedro sa bilanggoan; apang ang pangamuyo sa Dios ginhimo sing hanuut gid sang iglesia tungud sa iya.
Si Pedro Ginapagowa gikan sa Bilanggoan
6Sang buut na ni Herodes ipagowa sia, sadtong gab-i si Pedro nagakatolog sa tunga sang duha ka soldado, nga nagapus sa duha ka talikala, kag ang mga manugbantay sa atubangan sang ganhaan nagbantay sang bilanggoan; 7kag yari karon, ang manugtunda sang Ginoo nagpahayag sa iya, kag nagsilak ang kapawa sa hulut; kag ginpakpak niya si Pedro sa kilid kag ginpukaw sia, nga nagasiling, “Bangon ka sing dalidali.” Kag ang iya mga talikala nagkalataktak sa iya mga kamut. 8Kag ang manugtunda nagsiling sa iya, “Pangwagkus ka kag ihigut ang imo sandalias.” Kag ginhimo niya ini. Kag nagsiling sia sa iya, “Ikunup ang imo panapton kag sonod sa akon.” 9Kag naggowa sia kag nagsonod; wala sia makahibalo nga matuud ang ginhimo sang manugtunda, kondi naghunahuna nga nakakita sia sing palanan-awon. 10Sang naligaran nila ang nahauna kag ang ikaduha nga manugbantay, nag-abut sila sa gawang nga salsalon nga nagapadolong sa banwa. Nagbukas ini sa ila sa iya kaugalingon, kag naggowa sila kag nagpadayon sa isa ka dalan; kag sa gilayon nagbiya sa iya ang manugtunda. 11Kag sang nakamarasmas si Pedro, nagsiling sia, “Karon nakilala ko sing matuud gid nga ginpadala sang Ginoo ang iya manugtunda kag ginluwas ako sa kamut ni Herodes kag sa bug-os nga pagpaabut sang katawohan sang mga Judio.”
12Sang nahangpan niya ini, nagkadto sia sa balay ni Maria, nga iloy ni Juan nga ang iya hayo si Marcos, diin madamu ang nagtipon kag nagapangamuyo. 13Kag sang pagpanuktuk niya sa gawang nga sa gowa, nagkadto sa pagsabat ang isa ka sologoon nga babayi nga ginhingalanan si Roda. 14Sang nakilala niya ang tingug ni Pedro, wala niya mabuksi ang gawang tungud sa kalipay kondi nagdalagan sa sulud kag nagsugid nga si Pedro yara sa gawang. 15Nagsiling sila sa iya, “Nagabuang ka.” Apang nagpamatuud sia sing malig-on nga amo gid. Nagsiling sila, “Manugtunda niya ina!” 16Apang si Pedro nagpadayon sa pagpanuktuk; kag sang nabuksan nila, nakita nila sia kag naorongan. 17Apang sia sang ginsinyasan niya sila sang iya kamut nga maghipus, nag-asoy sa ila kon paano ang pagpagowa sa iya sang Ginoo sa bilanggoan. Kag nagsiling sia, “Isugid ninyo ini kay Santiago kag sa mga kauturan.” Niyan nagtaliwan sia kag nagkadto sa iban nga duug.
18Karon sang pagkaaga, indi diotay ang pagkagubut sang mga soldado tungud sang nahanabu kay Pedro. 19Kag sang ginpangita sia ni Herodes kag wala sia makita, gin-usisa niya ang mga manugbantay kag nagsogo sia nga pamatyon sila. Niyan nagdolhog sia gikan sa Judea pa Cesarea, kag nagpabilin didto.
Ang Pagkapatay ni Herodes
20Karon naakig si Herodes sa mga taga-Tiro kag taga-Sidon; kag nagpalapit sila sing hiliusa sa iya, kag sang naabyan nila si Blasto, nga manugtatap sang hiligdaan sang hari, nagpangayo sila sing paghidait, bangud nga ang ila duta ginsagud sang iya sang hari. 21Sa adlaw nga pinat-inan si Herodes nagsul-ub sang panapton nga harianon, naglingkod sa trono, kag nagpamolongpolong sa ila. 22Kag ang katawohan nagsinggit, “Tingug sang isa ka dios, kag indi iya sang tawo!” 23Kag gilayon ginhalitan sia sang manugtunda sang Ginoo, bangud nga wala niya paghimayaa ang Dios; kag gin-uk-uk sia sang mga ulud kag napatay sia.
24Apang ang polong sang Dios nagtubo kag nagdugang.
25Kag si Bernabe kag si Saulo nagpauli gikan sa Jerusalem sang natapus nila ang ila hilikuton, nga ginaupud nila si Juan nga ang iya hayo si Marcos.
Currently Selected:
MGA BINUHATAN 12: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
