2 MGA HARI 4
4
Ang Lana sang Babaying Balo
1Karon may isa ka babayi sa mga asawa sang mga anak sang mga manalagna nga nagtuaw kay Eliseo, “Ang imo alagad nga akon bana napatay; kag ikaw nakahibalo nga ang imo alagad nahadluk sa Ginoo, apang nag-abut ang nautangan sa pagkuha sang akon duha ka anak nga uliponon niya.” 2Kag si Eliseo nagsiling sa iya, “Ano bala ang himoon ko sa imo? Sugiri ako; ano bala ang yara sa imo balay?” Kag nagsiling sia, “Ang imo alagad wala gid sing ano nga butang sa balay, luwas sang isa ka tibud nga lana.” 3Niyan nagsiling sia, “Lakat, panghulam ka sa luwas sing mga suludlan sa tanan mo nga kaingud, mga suludlan nga wala sing sulud kag indi ka manghulam sing pila lamang ka bilog. 4Niyan magsulud ka, kag takpan ang ganhaan sa imo kag sa imo mga anak nga lalaki, kag ihuwad sa sadto tanan nga suludlan; kag painon mo ang mapuno.” 5Gani nagtaliwan sia gikan sa iya kag gintakpan ang ganhaan sa babayi kag sa iya mga anak; sila nagdala sa iya sang mga suludlan kag ginhuwad niya. 6Sang napuno na ang mga suludlan, nagsiling sia sa iya anak, “Dalhi pa ako sing suludlan.” Kag sia nagsiling sa iya, “Wala na sing suludlan.” Niyan nagkunta ang lana. 7Niyan nagkadto sia kag nagsugid sa tawo sang Dios, kag nagsiling sia, “Lakat, ibaligya ang lana kag bayari ang imo utang, kag ikaw kag ang imo mga anak magpangabuhi sang mabilin.”
Si Eliseo kag ang Sunemnon nga Babayi
8Sa isa ka adlaw nag-agi si Eliseo sa Sunem, diin may babayi nga manggaranon, kag sia nagpilit sa iya nga magkaon. Gani subong sini nga sa masunsun nga naglabay sia didto, naghapit sia didto sa pagkaon. 9Kag nagsiling sia sa iya bana, “Yari karon, ginahangup ko nga ini balaan nga tawo sang Dios, nga nagalabay sa aton sing dalayon. 10Maghimo kita sing diotay nga hulut sa ibabaw sang dingding, kag butangan naton sia didto sing higdaan, latok, lingkoran, kag candelero, agud nga kon mag-abut sia sa aton, magadayon sia didto.”
11Sang isa ka adlaw nag-abut sia didto, kag nagdayon sia sa hulut kag naghigda didto. 12Kag nagsiling sia kay Giezi nga iya alagad, “Tawga ini nga Sunemnon nga babayi.” Sang natawag niya sia, nagtindug sia sa atubangan niya. 13Kag nagsiling sia kay Giezi, “Isiling karon sa iya, Yari karon, ikaw nagmatinatapon sa amon sa sini tanan nga pagtatap; ano bala ang himoon tungud sa imo? Buut ka bala nga ihinambit sa hari ukon sa pangolo sang kasoldadosan?” Nagsabat sia, “Ako nagapuyo sa tunga sang akon kaugalingon nga katawohan.” 14Kag nagsiling sia, “Ano bala niyan ang himoon tungud sa iya?” Kag si Giezi nagsabat, “Sa pagkamatuud, wala sia sing anak, kag ang iya bana tigulang na.” 15Nagsiling sia, “Tawga sia.” Kag sang natawag niya sia, sia nagtindug sa ganhaan. 16Kag nagsiling sia, “Sa sini nga panag-on, sa pagsapul sang tion, magahakus ka sing anak nga lalaki.” Kag nagsiling sia, “Indi, ginoo ko, ikaw nga tawo sang Dios; dili magbutig sa imo ulipon.” 17Apang ang babayi nanamkon, kag nag-anak sing lalaki sa sadto nga panag-on sa pagsapul sang tion, sono sa nasiling sa iya ni Eliseo.
18Sang nagdaku ang bata, sa isa ka adlaw naggowa sia pakadto sa iya amay sa mga manug-ani. 19Kag nagsiling sia sa iya amay, “Ang olo ko, ang olo ko!” Nagsiling sia sa iya alagad, “Dalha sia sa iya iloy.” 20Kag sang nakuha niya sia, kag nadala sia sa iya iloy, naglingkod sia sa iya mga tuhud tubtub sa odto, kag ugaling napatay. 21Kag nagsaka sia, kag ginhamyang sia sa higdaan sang tawo sang Dios, kag gintakpan sa iya ang ganhaan, kag naggowa. 22Niyan gintawag niya ang iya bana, kag nagsiling sa iya, “Padalhi ako sing isa sang imo mga alagad kag isa sang mga asno, agud nga magdalagan ako sa tawo sang Dios, kag magbalik.” 23Kag nagsiling sia, “Ngaa bala magkadto ka sa iya karon nga adlaw? Indi lati ukon inugpahuway.” Nagsiling sia, “Maayo ini.” 24Niyan ginpasiyahan niya ang asno, kag nagsiling sa iya alagad, “Padalagana kag padasiga; indi pagpahinaya sa akon ang pagsakay luwas kon magsiling ako sa imo.” 25Gani nagkadto sia, kag nag-abut sa tawo sang Dios sa Bukid nga Carmelo.
Sang nakita sia sa malayo sang tawo sang Dios, sia nagsiling kay Giezi nga iya alagad, “Yari karon, yadto ang Sunemnon nga babayi; 26dalagan ka karon sa pagsugata sa iya, kag isiling sa iya, Maayo ka bala? Maayo bala ang imo bana? Maayo bala ang bata?” Kag nagsabat sia, “Maayo.” 27Kag sang nag-abut sia sa tawo sang Dios sa bakolod, nagkapyot sia sa iya mga tiil. Kag nagpalapit si Giezi sa paghukas sa iya. Apang ang tawo sang Dios nagsiling, “Pabayai sia, kay ang iya kalag may kapaitan sa sulud niya; kag ang Ginoo naglikum sini sa akon, kag wala magsugid sa akon.” 28Niyan nagsiling sia, “Nagpangayo bala ako sing anak nga lalaki sa akon ginoo? Wala bala ako magsiling, ‘Dili ako paglimbongi?’” 29Nagsiling sia kay Giezi, “Wagkusi ang imo mga hawak, kag dalha ang akon sungkud sa imo kamut, kag lakat ka. Kon makasugata ka sing bisan sin-o nga tawo, dili sia pag-abiabiha; kag kon ang bisan sin-o mag-abiabi sa imo, dili ka magsabat sa iya; kag ibutang ang akon sungkud sa nawung sang bata.” 30Niyan ang iloy sang bata nagsiling, “Sa nagakabuhi ang Ginoo, kag sa nagakabuhi ang imo kalag, indi ako magbiya sa imo.” Gani nagtindug sia kag nagsonod sa iya. 31Si Giezi nag-una sa ila kag nagbutang sang sungkud sa nawung sang bata, apang wala sing tingug ukon idulungug. Busa nagbalik sia sa pagsugata kay Eliseo, kag nagsugid sa iya, “Ang bata wala magmata.”
32Sang nagsulud si Eliseo sa balay, yari karon, ang bata patay kag nahamyang sa iya higdaan. 33Busa nagsulud sia kag gintakup niya ang gawang sa ila nga duha, kag nagpangamuyo sa Ginoo. 34Niyan nagsaka sia kag naghapa sa bata, kag nagbutang sang iya baba sa baba niya, sang iya mga mata sa mga mata niya, kag sang iya mga kamut sa mga kamut niya; kag nag-untay sia sa ibabaw niya, kag nag-init ang unud sang bata. 35Niyan naghalin sia, kag nagpakadto pakari sia sing makaisa sa balay, kag nagsaka, kag nag-untay sia sa ibabaw niya; kag ang bata nagpamahaon sing makapito, kag ang bata nagmuklat sang iya mga mata. 36Niyan gintawag niya si Giezi, kag nagsiling, “Tawga inang Sunemnon.” Gani gintawag niya sia. Kag sang nag-abut sia sa iya, nagsiling sia, “Hakwata ang imo anak.” 37Nagsulud sia kag naghapa sa iya mga tiilan, nga nagayaub sa duta; niyan ginkuha niya ang iya anak kag naggowa.
Ang mga Katingalahan ni Eliseo tungud sa mga Manalagna
38Kag si Eliseo nag-abut liwat sa Gilgal sang may tiggulutum sa duta. Kag sang naglingkod ang mga anak sang mga manalagna sa atubangan niya, nagsiling sia sa iya alagad, “Itig-ang ang dakung kaldero, kag loto sing linaga sa mga anak sang mga manalagna.” 39Naggowa ang isa sa latagon sa pagpangutan, kag nakakita sing balagon nga talonon kag nagkuha gikan sini sing mga talonon nga alupait nga isa niya sa bantal, kag ginkidkid ini sa kaldero sang linaga, kay wala ini makilal-i nila. 40Kag naghuwad sila nga kaonon sang mga tawo. Apang sang nagakaon sila sang linaga, nagsinggit sila, “O tawo sang Dios, may kamatayon sa kolon!” Kag indi sila makakaon sini. 41Sia nagsiling, “Niyan dala sing harina.” Kag ginsabwag niya ini sa kaldero, kag nagsiling sia, “Maghuwad nga sa mga tawo, agud nga magkaon sila.” Kag walay malain sa kaldero.
42May nag-abut nga isa ka tawo gikan sa Baal-salisa, nga nagadala sa tawo sang Dios sing tinapay sang nahaunang mga bunga, duha ka pulo ka bilog nga sebada, kag bag-ong mga uyas sa iya sako. Kag sia nagsiling, “Hatagi ang mga tawo, agud nga magkaon sila.” 43Apang ang iya alagad nagsiling, “Ano, ibutang ko bala ini sa atubangan sang isa ka gatus ka lalaki?” Gani sia nagsiling, “Hatagi ang mga tawo, agud nga magkaon sila, kay amo ini ang ginasiling sang Ginoo, ‘Magakaon sila kag may mabilin sini.’” 44Gani ginbutang niya ini sa atubangan nila. Kag nagkaon sila, kag may nabilin sini, sono sa polong sang Ginoo.
Currently Selected:
2 MGA HARI 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
