2 MGA HARI 17

Ang Samaria Gindaug kag ang Israel Ginbihag

1Sa ikanapulo kag duha nga tuig ni Acaz nga hari sang Juda nagsugud sa paghari si Oseas nga anak ni Ela sa Samaria sa ibabaw sang Israel, kag naghari sia sing siam ka tuig. 2Kag ginhimo niya ang malaut sa itololok sang Ginoo, apang indi subong sang mga hari sang Israel nga nahauna sa iya. 3Batok sa iya nagtaklad si Salmanasar nga hari sang Asiria; kag si Oseas nangin-iya alagad, kag nagbayad sa iya sing buhis. 4Apang ang hari sang Asiria nakakita kay Oseas sing puhon; kay nagpadala sia sing mga manugbalita kay So, nga hari sang Egipto, kag wala magbayad sing buhis sa hari sang Asiria, subong sang nahimo niya tuigtuig; busa gintakpan sia sang hari sang Asiria, kag gingapus sa bilanggoan. 5Niyan ang hari sang Asiria nagtaklad sa bug-os nga duta kag nagtaklad sa Samaria, kag ginkibon ini sing tatlo ka tuig. 6Sa ikasiam nga tuig ni Oseas gin-agaw sang hari sang Asiria ang Samaria, kag gindala ang Israel sa Asiria, kag ginbutang sila sa Hala, kag sa Habor, ang suba sang Gozan, kag sa mga banwa sang mga Medianhon.

7Kag nahanabu ini, bangud nga nagpakasala ang katawohan sang Israel batok sa Ginoo nga ila Dios, nga nagpataklad sa ila gikan sa duta sang Egipto gikan sa idalum sang kamut ni Faraon nga hari sang Egipto, kag nagkahadluk sa iban nga mga dios 8kag naglakat sa mga palatukuran sang mga pungsud nga ginsobol sang Ginoo gikan sa atubangan sang katawohan sang Israel, kag gikan sa mga hari sang Israel nga ginhimo nila. 9Kag ang katawohan sang Israel naghimo sa tago sang mga butang nga batok sa Ginoo nga ila Dios. Nagpatindug sila sing mataas nga mga duug sa tanan nila nga kabanwaanan, gikan sa torre sang mga bantay tubtub sa banwa nga pinalig-on; 10nagpatindug sila nga sa ila sing mga obelisco kag mga Ashera sa tagsa ka bakolod nga mataas kag sa idalum sang tagsa ka kahoy nga madabung;#1 Hari 14:23. 11kag nagsonog sila didto sing mga incienso sa tanan nga mataas nga mga duug, subong sang mga pungsud nga ginpabihag sang Ginoo sa atubangan nila. Kag naghimo sila sing malaut nga mga butang sa pagpaakig sang Ginoo, 12kag nag-alagad sila sa mga diosdios, nga nahanungud sa ila ang Ginoo nagsiling sa ila, “Dili kamo maghimo sini nga butang.” 13Apang ang Ginoo nagpamatuud sa Israel kag sa Juda paagi sa tagsa ka manalagna kag sa tagsa ka manugpanan-aw, nga nagasiling, “Talikod kamo sa inyo mga malaut nga mga dalanon kag bantayi ang akon mga sogo kag ang akon mga palatukuran, sono sa tanan nga kasogoan nga ginsogo ko sa inyo mga ginikanan, kag nga ginpadala ko sa inyo paagi sa akon mga alagad nga mga manalagna.” 14Wala sing sapayan indi sila buut magpamati, kondi nagpatig-a sang ila mga tingkoy, kaangay sang tingkoy sang ila mga ginikanan, nga wala magtoo sa Ginoo nga ila Dios. 15Ginsikway nila ang iya mga palatukuran, kag ang iya katipan nga ginhimo niya kaupud sa ila mga ginikanan, kag ang iya mga pagpamatuud nga ginpamatuud niya sa ila. Nagsonod sila sa kadayawan, nanginhanginon, kag nagsonod sa mga pungsud sa palibut nila, nga nahanungud sa ila ang Ginoo nagtugon sa ila nga indi sila maghimo kaangay nila. 16Kag ginbayaan nila ang tanan nga sogo sang Ginoo nga ila Dios, kag naghimo sila sing mga larawan nga tinunaw nga duha ka tinday nga baka;#1 Hari 12:28. kag naghimo sing Ashera, kag nagsimba sang bug-os nga kadam-an sang langit, kag nag-alagad kay Baal. 17Kag ginpaagi nila sa kalayo ang ila mga anak nga lalaki kag babayi, kag naggamit sing mga pagpamakut kag mga babaylan,#Deut. 18:10. kag nagbaligya sang ila kaugalingon sa paghimo sang malaut sa itololok sang Ginoo, sa pagpaakig sa iya. 18Busa ang Ginoo naakig sing tama gid sa Israel, kag ginkuha sila gikan sa iya itololok; wala sing bisan sin-o nga nabilin kondi ang kabikahan ni Juda lamang.

19Ang Juda man wala magbantay sang mga sogo sang Ginoo nga ila Dios, kondi naglakat sa mga palatukuran sang Israel nga ginhimo nila. 20Kag ginsikway sang Ginoo ang tanan nga kaliwatan sang Israel, kag ginpiotan sila, kag gintugyan sila sa kamut sang mga manug-agaw, tubtub nga nasobol niya sila gikan sa iya itololok.

21Sang ginpaksi niya ang Israel gikan sa balay ni David ginhimo nila nga hari si Jeroboam nga anak ni Nabat. Kag gintabog ni Jeroboam ang Israel gikan sa pagsonod sa Ginoo kag ginpapakasala sila sing daku nga sala. 22Ang katawohan sang Israel naglakat sa tanan nga sala nga ginhimo ni Jeroboam; wala sila magbiya sa ila, 23tubtub nga ginkuha sang Ginoo ang Israel gikan sa iya itololok, sono sa ginpamolong niya paagi sa tanan nga manalagna nga iya mga alagad. Gani ang Israel ginpaliton gikan sa ila kaugalingon nga duta pa Asiria tubtub sining adlaw.

Ginpapuy-an Liwat ang Samaria

24Kag ang hari sang Asiria nagdala sing mga tawo gikan sa Babilonia, sa Cuta, sa Ava, sa Hamat, kag sa Sefar-vaim, kag ginbutang sila sa mga kabanwaanan sang Samaria sa tal-us sang katawohan sang Israel; kag ginpanag-iyahan nila ang Samaria, kag nagpuyo sa iya kabanwaanan. 25Kag sa pagsugud sang ila pagpuyo didto, wala sila magkahadluk sa Ginoo; busa nagpadala ang Ginoo sa ila sing mga leon, nga nagpatay sang iban sa ila. 26Gani nagpamolong sila sa hari sang Asiria, “Ang mga pungsud nga imo ginpaliton kag ginbutang sa kabanwaanan sang Samaria wala makahibalo sang sogo sang dios sang duta; busa nagpadala sia sing mga leon sa ila, kag yari karon, ginpatay sila, bangud nga wala sila makahibalo sang sogo sang dios sang duta.” 27Niyan ang hari sang Asiria nagsogo, “Pakadtoa didto ang isa sang mga sacerdote nga gindala ninyo gikan didto; kag palakta sila kag papuy-a didto, kag patudloa sia sa ila sang sogo sang dios sang duta.” 28Gani nag-abut ang isa sang mga sacerdote nga pinaliton nila gikan sa Samaria kag nagpuyo sa Bet-el, kag nagtudlo sa ila kon paano ang pagkahadluk nila sa Ginoo.

29Apang ang tagsa ka pungsud naghimo sang iya kaugalingon nga mga dios, kag ginbutang sila sa mga balay sang mataas nga mga duug nga ginhimo sang mga Samariahanon, ang tagsa ka pungsud sa ila kabanwaanan nga ginpuy-an nila; 30ang mga tawo sang Babilonia naghimo sang Succot-benot, ang mga tawo sang Cuta naghimo sang Nergal, ang mga tawo sang Hamat naghimo sang Asima, 31kag ang mga Avinhon naghimo sang Nibcaz kag sang Tartac; kag ang mga Sefarvaimnon nagsonog sa ila mga anak sa kalayo kay Adramilec kag kay Anamelec, ang mga dios sang Sefarvaim. 32Nagkahadluk sila sa Ginoo, kag naghimo sila nga sa ila sing mga sacerdote sang mataas nga mga duug, nga nagahalad nga sa ila sa mga balay sang mataas nga mga duug. 33Gani nagkahadluk sila sa Ginoo apang nag-alagad sang ila kaugalingon nga mga dios, sono sa kinabatasan sang mga pungsud diin sila ginkuha. 34Tubtub sining adlaw nagahimo sila sono sa nahaunang kinabatasan.

Wala sila magkahadluk sa Ginoo, ukon maghimo sila sono sa ila mga palatukuran ukon sono sa ila mga pagsolondan ukon sono sa kasogoan ukon sono sa sogo nga ginsogo sang Ginoo sa mga anak ni Jacob, nga iya ginhingalan Israel.#Gen. 32:28; 35:10. 35Ang Ginoo naghimo sing katipan sa ila, kag nagtulin sa ila, “Dili kamo mahadluk sa iban nga mga dios ukon magyaub kamo sa atubangan nila ukon mag-alagad sa ila ukon maghalad sa ila;#Ex. 20:5; Deut. 5:9. 36kondi sa Ginoo, nga nagpagowa sa inyo gikan sa duta sang Egipto sa dakung gahum kag sa butkon nga inuntay; sia ang inyo kahadlukan,#Deut. 6:13. kag sa iya kamo magyaub kag sa iya kamo maghalad. 37Kag ang mga palatukuran kag ang mga pagsolondan kag ang kasogoan kag ang sogo nga sinulat niya tungud sa inyo, tumanon ninyo sa gihapon. Dili kamo mahadluk sa iban nga mga dios, 38kag ang katipan nga ginhimo ko kaupud ninyo dili ninyo pagkalimtan. Dili kamo mahadluk sa iban nga mga dios, 39kondi magkahadluk sa Ginoo nga inyo Dios, kag sia magaluwas sa inyo sa kamut sang tanan ninyong kaaway.” 40Walay sapayan sila wala magpamati, kondi ginhimo nila ang sono sa ila nahaunang kinabatasan.

41Gani ining mga pungsud nagkahadluk sa Ginoo, kag nag-alagad man sa ila mga larawan nga tinigban; ang ila man mga anak, kag ang ila mga kaapohan—naghimo sila tubtub sining adlaw sono sa ginhimo sang ila mga ginikanan.

Currently Selected:

2 MGA HARI 17: ABHIL82

Highlight

Copy