2 MGA CRONICA 36
36
Ang Paghari kag ang Pagpahalin kay Joacaz
(2 Hari 23:31-35)
1Ang katawohan sang duta nagkuha kay Joacaz nga anak ni Josias kag ginhimo sia nga hari nga tal-us sa iya amay sa Jerusalem. 2Si Joacaz duha ka pulo kag tatlo ka tuig sang nagsugud sia sa paghari; kag naghari sia sing tatlo ka bulan sa Jerusalem. 3Niyan ginpahalin sia gikan sa Jerusalem sang hari sang Egipto kag ginpabayad ang duta sing isa ka gatus ka talanton nga pilak kag isa ka talanton nga bulawan. 4Kag si Eliaquim nga iya utud ginhimo nga hari sa Juda kag Jerusalem sang hari sang Egipto; kag gin-ilisan ang iya ngalan kay Joaquim; apang si Joacaz nga iya utud ginkuha ni Necao kag gindala sia sa Egipto.#Jer. 22:11-12.
Ang Paghari ni Joaquim
(2 Hari 23:36–24:7)
5Si Joaquim#Jer. 22:18-19; 26:1-6; 35:1-19. duha ka pulo kag lima ka tuig sang nagsugud sia sa paghari, kag naghari sia sing napulo kag isa ka tuig sa Jerusalem. Ginhimo niya ang malaut sa itololok sang Ginoo nga iya Dios. 6Nagtaklad batok sa iya si Nabucodonosor nga hari sang Babilonia,#Jer. 25:1-38; 36:1-32; 45:1-5; Deut. 1:1-2. kag gingapus sia sing mga grilyos sa pagdala sa iya sa Babilonia. 7Gindala man ni Nabucodonosor sa Babilonia ang bahin sang mga gamit sang balay sang Ginoo kag ginbutang sila sa iya templo sa Babilonia. 8Karon ang nabilin sang mga binuhatan ni Joaquim, kag ang iya mga kangil-aran nga ginhimo niya, kag ang nakita sa iya, yari karon, nasulat sila sa Tolon-an sang mga Hari sang Israel kag Juda; kag naghari sa tal-us niya si Joaquin nga iya anak.
Si Joaquin Gindala nga Bihag sa Babilonia
(2 Hari 24:8-17)
9Si Joaquin walo ka tuig sang nagsugud sia sa paghari, kag naghari sia sa Jerusalem sing tatlo ka bulan kag napulo ka adlaw. Ginhimo niya ang malaut sa itololok sang Ginoo. 10Sa pagsapul sang tuig ginpakadtoan ni Hari Nabucodonosor kag ginpadala sia sa Babilonia,#Jer. 22:24-30; 24:1-10; 29:1-2; Ezeq. 17:12. pati ang mga gamit nga malahalon sang balay sang Ginoo, kag si Sedequias nga iya utud ginhimo nga hari sa Juda kag Jerusalem.#Jer. 37:1; Ezeq. 17:13.
Ang Paghari ni Sedequias
(2 Hari 24:18-20; Jer. 52:1-3)
11Si Sedequias#Jer. 27:1-22; 28:1-17. duha ka pulo kag isa ka tuig sang nagsugud sia sa paghari, kag naghari sia sa Jerusalem sing napulo kag isa ka tuig. 12Ginhimo niya ang malaut sa itololok sang Ginoo nga iya Dios. Wala sia magpaubus sang iya kaugalingon sa atubangan ni Jeremias nga manalagna, nga nagapamolong gikan sa baba sang Ginoo. 13Nagribuk man sia batok kay Hari Nabucodonosor,#Ezeq. 17:15. nga nagpasumpa sa iya tungud sa Dios; apang nagpakatingkoyan sia kag nagpatig-a sang iya tagiposoon batok sa pagbalik sa Ginoo, ang Dios sang Israel. 14Labut pa ang tanan nga puno nga mga sacerdote kag ang katawohan naglapas sing labi gid, sono sa tanan nga kangil-aran sang mga pungsud; kag gindagtaan nila ang balay sang Ginoo nga ginpakabalaan niya sa Jerusalem.
15Ang Ginoo, ang Dios sang ila mga ginikanan, nagpadala sa ila paagi sa iya mga manugbalita, nga nagabugtaw kag nagapadala, bangud nga nalooy sia sa iya katawohan kag sa iya puluy-an; 16apang gin-uligyat nila ang mga manugbalita sang Dios, kag gintamay ang iya mga polong, kag ginyubitan ang iya mga manalagna, tubtub nga nag-ibwal ang kasingkal sang Ginoo batok sa iya katawohan, tubtub nga wala na sing tambal.
Ang Pagbihag sang Juda
(2 Hari 25:8-21; Jer. 39:8-10; 52:12-30)
17Busa ginpataklad niya ang hari sang mga Caldeanhon#Jer. 21:1-10; 34:1-5. sa ila, nga nagpatay sa espada sang ila mga pamatan-on nga lalaki sa balay sang ila santuario, kag wala sia sing kalooy sa pamatan-on nga lalaki ukon dalaga, tigulang ukon ubanon; sila tanan gintugyan niya sa iya kamut. 18Kag ang tanan nga gamit sang balay sang Dios, dalagku kag magamay, kag ang mga bahandi sang balay sang Ginoo, kag ang mga bahandi sang hari kag sang iya mga principe, ini tanan gindala niya sa Babilonia. 19Kag ginsonog nila ang balay sang Dios,#1 Hari 9:8. kag ginguba ang kuta sang Jerusalem, kag ginsonog sa kalayo ang tanan niya nga palacio, kag ginlaglag ang tanan nila nga gamit nga malahalon. 20Ang mga nakapalagyo gikan sa espada gindala niya sa Babilonia, kag nangin-alagad sila niya kag sang iya mga lalaking anak tubtub sa paghari sang ginharian sang Persia, 21sa pagtuman sang polong sang Ginoo tungud sa baba ni Jeremias, tubtub nga ang duta nakaagum sang iya mga inugpahuway. Samtang nga ini nagapabilin nga mamingaw nag-agum ini sang iya inugpahuway, sa pagtuman sing kapitoan ka tuig.#Jer. 25:11; 29:10.
Ang Mando ni Ciro
(Esd. 1:1-4)
22Karon sa nahauna nga tuig ni Ciro nga hari sang Persia, agud nga matuman ang polong sang Ginoo paagi sa baba ni Jeremias, ginpukaw sang Ginoo ang espiritu ni Ciro, nga hari sang Persia sa bagay nga nagpabantala sia sa bug-os niya nga ginharian kag ginsulat man ini: 23“Amo ini ang ginasiling ni Ciro nga hari sang Persia, ‘Ang Ginoo, nga Dios sang langit, naghatag sa akon sang tanan nga ginharian sang duta, kag gintulinan niya ako sa pagpatindug sa iya sing balay sa Jerusalem,#Isa. 44:28. nga yara sa Juda. Ang bisan sin-o nga yara sa inyo sang bug-os niya nga katawohan, ang Ginoo nga iya Dios manginkaupud niya. Magtaklad sia.’”
Currently Selected:
2 MGA CRONICA 36: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
