2 MGA CRONICA 25
25
Ang Paghari ni Amasias
(2 Hari 14:1-22)
1Si Amasias duha ka pulo kag lima ka tuig sang nagsugud sia sa paghari, kag naghari sia sing duha ka pulo kag siam ka tuig sa Jerusalem. Ang ngalan sang iya iloy si Joadan sang Jerusalem. 2Kag ginhimo niya ang matarung sa itololok sang Ginoo, apang indi sa himpit nga tagiposoon. 3Karon sang naglig-on ang ginharian sa iya ginpatay niya ang iya mga alagad nga nagpatay sa hari nga iya amay. 4Apang wala niya pagpatya ang mga anak nila, kondi ginhimo ang sono sa nasulat sa kasogoan, sa tolon-an ni Moises, sono sa ginsogo sang Ginoo, “Ang mga ginikanan indi mapatay tungud sa mga anak, kag ang mga anak indi mapatay tungud sa mga ginikanan; apang ang tagsa ka tawo mapatay tungud sa iya kaugalingon nga sala.”#Deut. 24:16.
5Niyan gintipon sing tingub ni Amasias ang Juda, kag ginpaagisud sono sa ila kabaranggayan sa idalum sang mga pangolo sang mga linibo kag mga pangolo sang ginatus sa bug-os gid nga Juda kag Benjamin. Gin-isip niya sila kutub sa duha ka pulo ka tuig kag pa ibabaw, kag nakita sila nga tatlo ka gatus ka libo ka tawo nga pinili, nga sarang makakadto sa inaway, nga makakaput sing bangkaw kag taming. 6Gikan sa Israel naghinakay man sia sing isa ka gatus ka libo ka gamhanan nga mga tawo nga isganan sa isa ka gatus ka talanton nga pilak. 7Apang may tawo sang Dios nga nag-abut sa iya nga nagasiling, “O hari, dili pagpaupda sa imo ang hangaway sang Israel, kay ang Ginoo wala nagaupud sa Israel, nga upud sa sini tanan nga Efraimnon. 8Apang kon ikaw maglakat, magpakaisug ka, magpakabaskug sa inaway, ang Dios magapukan sa imo sa atubangan sang kaaway; kay ang Dios may gahum sa pagtabang kag sa pagpukan.” 9Kag si Amasias nagsiling sa tawo sang Dios, “Apang ano bala ang himoon naton tungud sang isa ka gatus ka talanton nga nahatag ko sa hangaway sang Israel?” Ang tawo sang Dios nagsabat, “Ang Ginoo makasarang maghatag sa imo sing labi pa sini.” 10Niyan ginpain ni Amasias, ang hangaway nga nag-abut sa iya gikan sa Efraim, sa pagpapauli liwat. Busa nagdabdab sing daku ang ila kaakig batok sa Juda, kag nagpauli sila sa masingkal nga kaakig. 11Apang nagpakaisug si Amasias, kag ginpangolohan ang iya katawohan, kag nagkadto sa Nalupyakan sang Asin kag ginpatay sa mga tawo sang Seir ang napulo ka libo. 12Gindala nga buhi sang mga tawo sang Juda ang iban nga napulo ka libo, kag gindala sila sa putokputokan sang igang kag ginholog sila kutub sa putokputokan sang igang; sa bagay nga tanan sila nagkalawas-ag. 13Apang ang mga tawo sang hangaway nga ginpapauli ni Amasias, agud nga indi sila mag-upud sa iya sa inaway, naggubat sang mga banwa sang Juda, kutub sa Samaria tubtub gid sa Bet-horon, kag ginpatay sa ila ang tatlo ka libo, kag nagkuha sing labi kadamu nga inagaw.
14Sang nakaabut si Amasias gikan sa pagpamatay sang mga Edomnon gindala niya ang mga dios sang mga tawo sang Seir, kag ginpatindug sila nga mga dios niya, kag nagyaub sia sa atubangan nila, nga nagasonog sing incienso sa ila. 15Busa nagdabdab ang kaakig sang Ginoo batok kay Amasias kag nagpadala sia sa iya sing manalagna, nga nagsiling sa iya, “Ngaa bala nga nagdangup ka sa mga dios sang katawohan, nga wala makaluwas sang ila kaugalingon nga katawohan gikan sa imo kamut?” 16Apang sang nagapakighambal sia ang hari nagsiling sa iya, “Ginhimo ka bala namon nga manuglaygay sang hari? Paumud ka! Ngaa bala nga patyon ka?” Gani nagpaumud ang manalagna, apang nagsiling, “Nakahibalo ako nga ang Dios nagtapat sa paglaglag sa imo, bangud nga naghimo ka sini kag wala magpamati sa akon laygay.”
17Niyan si Amasias nga hari sang Juda nagbaton sing laygay kag nagpadala kay Joas nga lalaking anak ni Joacaz, nga lalaking anak ni Jehu, hari sang Israel, nga nagasiling, “Kari, magkitaay kita sa guya kag guya.” 18Kag si Joas nga hari sang Israel nagpadala sing polong kay Amasias nga hari sang Juda, “Ang talongon nga yara sa Libano nagpadala sa cedro nga yara sa Libano, nga nagasiling, ‘Ipaasawa ang imo anak nga babayi sa akon anak nga lalaki’; kag may nag-agi nga sapat nga talonon nga yara sa Libano kag nagtapak sang talongon. 19Ikaw nagasiling, ‘Yari karon, gindaug ko ang Edom,’ kag ang imo tagiposoon nabayaw sa imo sa pagpabugal. Apang karon pabilin ka sa puluy-an; ngaa bala nga maghilabut ka sa imo kasamaran agud nga mapukan ka, ikaw kag ang Juda upud sa imo?”
20Apang si Amasias indi magpamati; kay ini gikan sa Dios, agud nga matugyan niya sila sa kamut sang ila mga kaaway, bangud nga nagdangup sila sa mga dios sang Edom. 21Gani nagtaklad si Joas nga hari sang Israel; kag nagkitaay sa nawung kag nawung sia kag si Amasias nga hari sang Juda sa Bet-semes, nga iya sang Juda. 22Kag ang Juda natam-an sa atubangan sang Israel, kag nagpalagyo ang tagsa ka tawo sa iya layanglayang. 23Kag si Joas nga hari sang Israel nagdakup sa Bet-semes kay Amasias nga hari sang Juda, ang anak ni Joas nga anak ni Joacaz, kag gindala sia sa Jerusalem, kag ginguba ang kuta sang Jerusalem kutub sa gawang sang Efraim tubtub sa gawang sang pamusud, apat ka gatus ka maniko. 24Kag ginkuha niya ang tanan nga bulawan kag pilak, kag ang tanan nga gamit nga nakita sa balay sang Dios, pati si Obed-edom; ginkuha man niya ang mga bahandi sa balay sang hari, kag ang mga tawo nga inugpalig-on, kag nagbalik sia sa Samaria.
25Si Amasias nga anak ni Joas nga hari sang Juda nagkabuhi sing napulo kag lima ka tuig sa tapus nga mapatay si Joas nga anak ni Joacaz, nga hari sang Israel. 26Karon ang nabilin sang mga binuhatan ni Amasias, nahauna kag katapusan, wala bala sila masulat sa Tolon-an sang mga Hari sang Juda kag Israel? 27Kutub sa tion nga si Amasias naglipas sa pagsonod sa Ginoo nagpuhon sila batok sa iya sa Jerusalem; kag nagpalagyo sia sa Laquis. Apang ginpaapasan nila sia sa Laquis, kag ginpatay sia didto. 28Kag ginlulan nila sia sa mga kabayo; kag ginlubung sia upud sa iya mga ginikanan sa banwa sang Juda.
Currently Selected:
2 MGA CRONICA 25: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society