1 SAMUEL 7
7
1Kag nag-abut ang mga tawo sang Kiryat-jearim kag nagpataklad sang kaban sang Ginoo, kag nagsulud sini sa balay ni Abinadab sa bakolod; kag ginpakabalaan si Eleazar nga iya anak nga lalaki, sa pagbantay sang kaban sang Ginoo.#2 Sam. 6:2-4; 1 Cron. 13:5-7. 2Kutub sang adlaw nga ang kaban nabilin sa Kiryat-jearim, ang tion malawig, kay yadto duha ka pulo ka tuig, kag ang bug-os nga panimalay sang Israel nagpanalabiton sa Ginoo.
Si Samuel Nagahukom sa Israel
3Niyan si Samuel nagpamolong sa bug-os nga panimalay sang Israel, “Kon sa bug-os ninyo nga tagiposoon magbalik kamo sa Ginoo, niyan isikway ang mga dios nga dumuloong kag ang Astarot sa tunga ninyo, kag ituhoy ang inyo tagiposoon sa Ginoo, kag alagda sia lamang, kag luwason kamo niya gikan sa kamut sang mga Filistinhon.” 4Gani ginsikway sang mga anak sang Israel ang mga Baal kag ang Astarot, kag nag-alagad sa Ginoo lamang.
5Niyan si Samuel nagsiling, “Tipona ang bug-os nga Israel sa Mizpa, kag magapangamuyo ako sa Ginoo tungud sa inyo.” 6Gani nagtilipon sila sing tingub sa Mizpa, kag nagsag-ub sing tubig kag gin-ula ini sa atubangan sang Ginoo, kag nagpuasa sadto nga adlaw, kag nagsiling didto, “Nakasala kami batok sa Ginoo.” Kag si Samuel naghukom sa katawohan sang Israel sa Mizpa. 7Karon sang nabatian sang mga Filistinhon nga ang katawohan sang Israel nagtilipon sing tingub sa Mizpa, ang mga ginoo sang mga Filistinhon nagtaklad batok sa Israel. Kag sang nabatian ini sang katawohan sang Israel, hinadlukan sila sa mga Filistinhon. 8Kag nagsiling ang katawohan sang Israel kay Samuel, “Dili ka mag-untat sa pagtuaw sa Ginoo nga aton Dios tungud sa amon, nga luwason niya kami gikan sa kamut sang mga Filistinhon.” 9Gani si Samuel nagkuha sing cordero nga nagasoso kag gindolot ini nga bilog sa halad-nga-sinonog sa Ginoo; kag si Samuel nagtuaw sa Ginoo tungud sa Israel, kag ang Ginoo nagsabat sa iya. 10Sang si Samuel nagadolot sang halad-nga-sinonog, ang mga Filistinhon nagpalapit sa pagpakig-away sa Israel; apang ang Ginoo nagdaguub sa sadto nga adlaw sa daku nga dinaguub batok sa mga Filistinhon kag gindaug sila; kag ginlaglag sila sa atubangan sang Israel. 11Kag ang mga lalaki sang Israel naggowa sa Mizpa kag ginlagas ang mga Filistinhon, kag ginsamad sila, tubtub nga nag-abut sila sa Bet-car.
12Niyan si Samuel nagkuha sing bato kag ginbutang ini sa ulut sang Mizpa kag Sen, kag ginhingalanan ini Eben-ezer;#7:12 Kon sayoron Ang bata sang pagtabang. nga nagasiling, “Tubtub diri gintabangan kami sang Ginoo.” 13Gani ang mga Filistinhon ginpaubus kag wala na sila magsulud sa dulunan sang Israel. Kag ang kamut sang Ginoo batok sa mga Filistinhon sa tanan nga adlaw ni Samuel. 14Gin-uli sa Israel ang mga kabanwaanan nga ginkuha sang mga Filistinhon sa Israel, kutub sa Ecron tubtub sa Gat; kag ang ila ginsakpan ginluwas sang Israel gikan sa mga kamut sang mga Filistinhon. May paghidait sa tunga sang Israel kag sang mga Amornon.
15Si Samuel naghukom sa Israel sa tanan nga adlaw sang iya kabuhi. 16Kag sa tuigtuig nagalibut sia sa Bet-el, sa Gilgal, kag sa Mizpa; kag naghukom sia sa Israel sa sadto tanan nga duug. 17Niyan nagbalik sia sa Rama, kay yadto didto ang iya balay, kag didto naghukom sia sa Israel. Kag didto nagpatindug sia sing halaran sa Ginoo.
Currently Selected:
1 SAMUEL 7: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
