1 SAMUEL 24

Si David Nagapatawad kay Saul sa En-gedi

1Sang nakabalik si Saul gikan sa paglagas sa mga Filistinhon, ginsugid sa iya, “Yari karon, si David yara sa kamingawan sang En-gedi.” 2Niyan nagkuha si Saul sing tatlo ka libo ka lalaki nga pinili gikan sa bug-os nga Israel, kag nagkadto sa pagpangita kay David kag sa iya mga tawo sa mga Igang sang mga Kanding nga talonon. 3Kag nag-abut sia sa mga palasudlan sang mga carnero sa dalanon, nga may lungib; kag nagsulud si Saul sa pagtabon sang iya mga tiil. Karon si David kag ang iya mga tawo yadto sa sulud gid nga mga bahin sang lungib.#Sal. 57 Titulo; Sal. 142 Titulo. 4Kag ang mga tawo ni David nagsiling sa iya, “Yari ang adlaw nga ginsiling sa imo sang Ginoo, ‘Yari karon, itugyan ko ang imo kaaway sa imo kamut, kag himoon mo sa iya ang maayo sa imo.’” Niyan nagtindug si David kag gingutraban ang sidsid sang kunup ni Saul sing inanay. 5Kag ugaling ang tagiposoon ni David nagtandug sa iya, bangud nga gingutraban niya ang sidsid sang kunup ni Saul. 6Nagsiling sia sa iya mga tawo, “Ang Ginoo nagadumili sa akon nga maghimo ako sining butang sa akon ginoo, ang hinaplas sang Ginoo, sa pag-untay sang akon kamut batok sa iya, sa ginatan-aw nga sia hinaplas sang Ginoo.” 7Gani ginpunggan ni David ang iya mga tawo sa sining mga polong, kag wala sila pagtuguti sa pagtindug batok kay Saul. Kag si Saul nagtindug pagowa sa lungib, kag nagpadayon sang iya dalanon.

8Si David nagtindug man ugaling, kag naggowa sa lungib, kag nagsinggit sa olihi ni Saul, “Ginoo kong hari!” Kag sang nagbalikid si Saul sa olihi niya, si David nagyaub sa duta, kag naghapa. 9Kag si David nagsiling kay Saul, “Ngaa bala nagapamati ka sa mga polong sang mga tawo nga nagasiling, ‘Yari karon, si David nagatinguha sa pagsamad sa imo?’ 10Yari karon, nakita sang imo mga mata sining adlaw kon paano nga ang Ginoo nagtugyan sa imo karon nga adlaw sa akon kamut sa sulud sang lungib; kag ang iban nagpangabay sa akon nga patyon ka, apang ginluwas ka nakon. Nagsiling ako, ‘Indi ko pag-untayon ang akon kamut batok sa akon ginoo; kay hinaplas sia sang Ginoo.’ 11Tan-awa, amay ko, toloka ang sidsid sang imo kunup sa akon kamut; kay gingutraban ko ang sidsid sang imo kunup kag wala ikaw pagpatya, kilalaha kag tan-awa nga wala sing malaut ukon paglalis sa akon kamut. Wala ako makasala batok sa imo, bisan nga ikaw nagaayam sang akon kabuhi sa pagkuha sini. 12Ang Ginoo maghukom sa tunga nakon kag nimo, kag magtimalus sa imo ang Ginoo tungud sa akon; apang ang akon kamut indi manginbatok sa imo. 13Subong sang ginasiling sang hulubaton sang mga dumaan, ‘Gikan sa mga malauton nagagowa ang pagkamalaut’; apang ang akon kamut indi manginbatok sa imo. 14Sa olihi bala ni sin-o nagagowa ang hari sang Israel? Sin-o bala ang ginalagas mo? Sa olihi sang ido nga patay! Sa olihi sang isa ka bitik! 15Busa ang Ginoo manginhukom, kag maghukom sa tunga nakon kag nimo, kag magtan-aw, kag mag-apin sang akon kasaba, kag magluwas sa akon gikan sa imo kamut.”

16Sang si David nakatapus sa pagpamolong sining mga polong kay Saul, si Saul nagsiling, “Imo bala ini tingug, anak kong David?” Kag ginbayaw ni Saul ang iya tingug kag naghibi. 17Nagsiling sia kay David, “Ikaw labi pa katarung sa akon; kay nagbayad ka sa akon sing maayo, apang ako nagbayad sa imo sing malaut. 18Kag ikaw nagpahayag sining adlaw kon paano nga naghimo ka sa akon sing maayo, sa bagay nga sang gintugyan ako sang Ginoo sa imo kamut wala mo ako pagpatya. 19Kay kon ang isa ka tawo makasapo sa iya kaaway, palakton bala niya sia nga maayo? Gani ang Ginoo magbalus sa imo sing maayo sang ginhimo mo sa akon sining adlaw. 20Kag karon, yari karon, ako nakakilala nga sa pagkamatuud ikaw magahari, kag nga ang ginharian sang Israel manginmalig-on sa imo kamut. 21Busa karon sumpa ka sa akon sa Ginoo nga indi mo pag-utdon ang akon mga kaliwatan sa olihi nakon, kag nga indi mo paglaglagon ang akon ngalan gikan sa panimalay sang akon amay.” 22Kag si David nagsumpa kay Saul. Niyan nagpauli si Saul sa iya balay; apang si David kag ang iya mga tawo nagtaklad sa pamakud.

Currently Selected:

1 SAMUEL 24: ABHIL82

Highlight

Copy