1 SAMUEL 12
12
Si Samuel Nagapamolong sa Katawohan
1Kag si Samuel nagsiling sa bug-os nga Israel, “Yari karon, ako nagpamati sa inyo tingug sa tanan nga inyo ginsiling sa akon, kag nagbutang sing hari sa ibabaw ninyo. 2Kag karon, yari karon, ang inyo hari nagalakat sa atubangan ninyo; kag ako tigulang na kag ubanon, kag yari karon, ang akon mga anak yara upud sa inyo; kag ako naglakat sa atubangan ninyo kutub sang akon pagkapamatan-on tubtub sini nga adlaw. 3Yari ako; saksi kamo batok sa akon sa atubangan sang Ginoo kag sa atubangan sang iya hinaplas. Kay sin-o bala baka ang nakuha ko? Ukon kay sin-o bala asno ang nakuha ko? Ukon sin-o bala ang akon ginlimolimo? Sin-o bala ang akon ginpigus? Ukon sa kay sin-o bala kamut nakabaton ako sing hamham sa pagbulag sang akon mga mata tungud sini? kag iuli ko ini sa inyo.” 4Nagsiling sila, “Wala ka maglimolimo sa amon ukon magpigus sa amon ukon nagbaton sing bisan ano gikan sa kamut sang bisan sin-o nga tawo.” 5Kag sia nagsiling sa ila, “Ang Ginoo amo ang saksi batok sa inyo, kag ang iya hinaplas saksi sini nga adlaw, nga wala kamo sing nasapwan nga bisan ano sa akon kamut.” Kag nagsiling sila, “Saksi sia.”
6Kag si Samuel nagsiling sa katawohan, “Ang Ginoo amo ang nagtangdo kay Moises kag kay Aaron#Ex. 6:26. kag nagpataklad sa inyo mga ginikanan gikan sa duta sang Egipto. 7Busa karon pahimonong kamo, agud nga magpakilooy ako sa Ginoo tungud sa inyo nahanungud sang tanan nga matarung nga buhat sang Ginoo nga ginhimo niya sa inyo kag sa inyo mga ginikanan. 8Sang si Jacob nag-abut sa Egipto, niyan ang mga ginikanan ninyo nagtuaw sa Ginoo#Ex. 2:23. kag ang Ginoo nagpadala kay Moises kag kay Aaron, nga nagpagowa sang inyo mga ginikanan gikan sa Egipto, kag ginpapuyo sila sa sini nga duug. 9Apang nalimot sila sa Ginoo nga ila Dios; kag nabaligya sila niya sa kamut ni Sisera,#Huk. 4:2. ang pangolo sang kasoldadosan ni Hazor, kag sa kamut sang mga Filistinhon,#Huk. 13:1. kag sa kamut sang hari sang Moab;#Huk. 3:12. kag sila nagpakig-away sa ila. 10Kag sila nagtuaw sa Ginoo, kag nagsiling, ‘Nakasala kami, bangud nga ginbayaan namon ang Ginoo, kag nag-alagad sa mga Baal kag sa Astarot; apang karon luwasa kami sa kamut sang amon mga kaaway, kag magaalagad kami sa imo.’#Huk. 10:10-15. 11Kag ang Ginoo nagpadala kay Jerubbaal#Huk. 7:1. kag kay Barac,#Huk. 4:6. kag kay Jefte,#Huk. 11:29. kag kay Samuel,#1 Sam. 3:20. kag nagluwas sa inyo sa kamut sang inyo mga kaaway sa palibut; kag nagpuyo kamo sa kalig-on. 12Kag sang nakita ninyo nga si Nahas nga hari sang mga anak ni Amon nagkari batok sa inyo, nagsiling kamo sa akon, ‘Dili, kondi ang hari maggahum sa amon,’#1 Sam. 8:19. sing ugai ang Ginoo nga inyo Dios amo ang inyo hari. 13Busa karon tan-awa ang hari nga inyo ginpili, kag inyo ginpangayo; yari karon, ang Ginoo nagbutang sing hari sa ibabaw ninyo. 14Kon magkahadluk kamo sa Ginoo kag mag-alagad sa iya kag magpamati sa iya tingug kag indi magsumpung sa sogo sang Ginoo, kag kon kamo kag ang hari man nga nagagahum sa inyo manginsomulunod sang Ginoo nga inyo Dios, maayo; 15apang kon indi kamo magpamati sang tingug sang Ginoo, kondi magsumpung sa sogo sang Ginoo, niyan ang kamut sang Ginoo manginbatok sa inyo subong nga ini batok sa inyo mga ginikanan. 16Busa karon pahimonong kag tan-awa ninyo ining daku nga butang, nga himoon sang Ginoo sa atubangan sang inyo mga mata. 17Indi bala karon nga adlaw tig-alani sang trigo? Tawgon ko ang Ginoo, agud nga magpadala sia sing daguub kag ulan; kag makilala kag makita ninyo nga ang inyo pagkamalaut daku, nga nahimo ninyo sa itololok sang Ginoo, sa pagpangayo sang hari.” 18Gani si Samuel nagtawag sa Ginoo, kag ang Ginoo nagpadala sing daguub kag ulan sadtong adlaw; kag ang bug-os nga katawohan nahadluk sing daku sa Ginoo kag kay Samuel.
19Kag ang bug-os nga katawohan nagsiling kay Samuel, “Pangamuyo ka sa Ginoo nga imo Dios tungud sa imo mga alagad, nga indi kami mapatay; kay gindugang namon sa amon mga sala ining malaut, sa pagpangayo nga sa amon sing hari.” 20Kag si Samuel nagsiling sa katawohan, “Dili kamo mahadluk; kamo naghimo sini tanan nga malaut, apang dili kamo maglipas sa pagsonod sa Ginoo, kondi alagdon ninyo ang Ginoo sa bug-os ninyong tagiposoon; 21kag dili kamo maglipas sa mga kadayawan nga wala sing kapuslanan kag indi sila makaluwas, kay sila wala sing pulus. 22Kay ang Ginoo indi magbiya sa iya katawohan tungud sa iya dakung ngalan, bangud nga nahamuut ang Ginoo sa paghimo sa inyo nga katawohan nga sa iya kaugalingon. 23Labut pa nahanungud sa akon, malayo sa akon nga magpakasala ako batok sa Ginoo, nga mag-untat ako sa pagpangamuyo tungud sa inyo; apang tudloan ko kamo sa maayo kag matarung nga dalanon. 24Lamang kahadluki ang Ginoo, kag alagda sia sa kamatuuran sa bug-os ninyong tagiposoon; kay talupangda kon daw ano kadalagku nga mga butang ang nahimo niya tungud sa inyo. 25Apang kon maghimo pa kamo sing malauton, papason kamo, tingub kamo kag ang inyo hari.”
Currently Selected:
1 SAMUEL 12: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
