Ambahanon sang Tatlo ka mga Pamatan-on 1

Ang Pangamuyo ni Azarias

1Ang#Dan. 3:23. tatlo ka mga pamatan-on nga lalaki nga amo sanday Hananias, Misael kag Azarias#1:1 HANANIAS, MISAEL KAG AZARIAS: Amo ini ang orihinal nga mga ngalan nanday Sadrac, Mesac kag Abednego (tan-awa ang Dan. 1:6-7). nagsugod sa paglakat palibot sa nagadabdab nga kalayo samtang nagaambahan sila sa Dios kag nagadayaw sa Ginoo. 2Dayon nagpundo si Azarias kag sa tunga sang kalayo nagpangamuyo sia sa mabaskog nga tingog: 3“O Ginoo nga Dios sang amon mga katigulangan, nagadayaw kag nagahimaya kami sa imo, kabay nga tahuron ang imo ngalan sa walay katapusan. 4Ginkabig mo kami suno sa nagakabagay sa amon. Matarong ikaw sa gihapon sa tanan nga imo ginbuhat sa amon, kag sa imo paghukom wala ikaw sing pinilian. 5Nagakabagay ang imo ginbuhat sang ginlaglag mo ang Jerusalem, ang balaan nga siudad sang amon mga katigulangan. Angay sa amon yadto nga paghukom tungod sang amon mga sala. 6Nagmalalison kami batok sa imo, nagtalikod kami sa imo kag salabton namon ang tagsa ka sala. 7Wala namon gintuman ang mga butang nga imo ginsugo sa amon. Kon gintuman namon ang imo mga kasugoan, kuntani nagmainuswagon kami, 8pero karon angay sa amon ang imo paghukom kag silot nga ginpadala sa amon. 9Gintugyan mo kami sa kamot sang amon mabinatuon, maakigon kag malalison nga mga kaaway—sa pinakalaut nga hari sa kalibutan. 10Kag karon, nahuy-an kami tanan nga nagasimba sa imo kag nahuya gani kami sa paghambal.

11“Pero tungod na lamang sang imo kadungganan, indi pagsikwaya ang imo kasugtanan sa amon kag indi kami pagpabayai sing dayon. 12Ihulog sa amon ang imo kaluoy. Dumdoma ang imo mga saad kay Abraham nga imo hinigugma, kay Isaac nga imo alagad, kag kay Jacob nga amay sang imo balaan nga mga tawo nga Israelinhon. 13Ginsaad mo sa ila nga hatagan mo sila sing kaliwatan nga madamo kasubong sang mga bituon sa kalangitan ukon kasubong sang balas sa higad sang baybayon. 14Pero sa karon, Ginoo, kami ang pinakadiutay nga pungsod, bisan sa diin kami, nagakabuhi kami sa kahuloy-an tungod sang amon mga sala. 15Yari kami nga wala sing hari, wala sing mga propeta, ukon mga pangulo. Wala na sing Templo sa diin sarang kami makahalad sa imo sang sinunog nga mga dulot, mga halad, mga dulot kag insyenso. Wala na sing lugar sa diin sarang kami makadulot sa imo kag makakita sang imo kaluoy. 16Pero sa tagipusoon nga mahinulsulon kag sa mapainuboson nga espiritu nagapalapit kami sa imo sa pagpakitluoy nga imo kami batunon kasubong sang daw nagadulot sa imo sang mga halad nga sinunog nga mga karnero nga lalaki, mga baka nga toro kag linibo nga matambok nga mga kordero. 17Batuna ang amon paghinulsol subong tanda sang amon karon mga halad agod nga amon ikaw matuman sa bug-os namon nga mga tagipusoon. Ang mga nagasalig sa imo indi gid mapaslawan. 18-19Kag karon, sa bug-os namon nga mga tagipusoon, nagasaad kami sa pagtuman sa imo, sa pagsimba kag sa pagpangamuyo sa imo. Magmaayo ka sa amon kag kaluoyi kami kag indi na kami pagpakahuy-i. 20O Ginoo, luwasa kami paagi sa bisan isa sang imo mga milagro, pasidunggi ang imo ngalan.

21“Pakahuy-i ang tanan nga nagahalit sa amon. Kuhaa ang ila kabakod kag gahom kag dugmokon ang ila kusog. 22Ipakilala sa ila nga ikaw lamang ang Ginoo kag Dios nga nagagahom nga may awtoridad sa bug-os nga kalibutan.”

23Ang mga suloguon sang hari nga naghaboy sang tatlo ka mga pamatan-on sa hornohan nagpadayon sa pagpainit pa gid sang hornohan paagi sa pagbutang sang lana, alkitran, madali maduktan nga mga kahoy kag mga kagingking. 24Ang dabdab nag-ibwal sa kataason nga setentay singko ka tapak 25tubtob nga naglapta ini sa palibot kag nagsunog sa mga taga-Babilonia nga nagatindog malapit sa hornohan. 26Pero#Tob. 5:4. ang anghel sang Ginoo nagpanaog sa kalayo sa diin nahamtang ang mga pamatan-on. Iya ginwahig ang mga dabdab 27agod nga magluntad ang kabugnaw nga daw ang malamig nga dupoydupoy nagahuyop, kag ang kalayo wala makatandog sa paghalit sa tatlo ka mga pamatan-on.

Ang Ambahanon sang Tatlo ka mga Pamatan-on

28Didto sa sulod sang hornohan, ang tatlo ka mga pamatan-on dulongan nga nag-amba liwat sang pagdayaw sa Dios sining masunod:

29“Ginadayaw namon ikaw, O Ginoo, ang Dios sang amon mga katigulangan.

30Kabay nga ang imo mahimayaon kag balaan nga ngalan

tahuron kag pakamahalon sa walay katubtoban.

31Kabay nga ang mga ambahanon pagakantahon para sa imo kahimayaan sa walay katapusan,

kag ang imo balaan nga presensya pagadayawon sa sinang templo,

32sa diin nagapungko ikaw sa langitnon nimo nga trono sa ibabaw sang mga kerubin

kag nagatamod ikaw sa kalibutan sang mga patay.

Kabay nga pagadayawon ikaw kag pagatahuron sa gihapon.

33Kabay nga pagadayawon ikaw samtang nagapungko ikaw sa imo harianon nga trono.

Kabay nga ang mga ambahanon pagakantahon sa imo kahimayaan sa walay katapusan.

34Kabay nga dayawon ikaw sa arko sang mga langit.

Kabay nga ang mga ambahanon pagakantahon sa imo kahimayaan sa walay katapusan.

35“Dayawa ang Ginoo, tanan nga mga tinuga,