Mga Salmo 113
113
Pagdayaw sang Kaayo sang Ginoo
1Dayawa ang Ginoo
Kamo nga mga alagad sang Ginoo,
dayawa ninyo ang iya ngalan!
2Kabay nga ang iya ngalan pagadayawon,
karon kag sa walay katapusan!
3Halin sa sidlangan pakadto sa nakatundan,
ang ngalan sang Ginoo pagadayawon!
4Ang Ginoo nagagahom sa tanan nga mga kapungsoran,
ang iya pagkahalangdon yara sa ibabaw sang kalangitan.
5Wala gid sing isa nga kaangay sa Ginoo nga aton Dios.
Nagaestar sia sa kahitaasan,
6pero nagaduko sia
sa pagtan-aw sang kalangitan kag sang duta.
7Ginabatak niya ang imol halin sa yab-ok,
ginabayaw niya ang nawad-an halin sa abo
8kag ginahatagan sila sing lugar upod sa mga prinsipe,
ang mga prinsipe sang iya mga tawo.
9Ginapasidunggan niya ang baw-as nga babayi sa iya balay,
ginalipay niya sia paagi sa paghatag sa iya sing mga kabataan.
Dayawa ang Ginoo!
Currently Selected:
Mga Salmo 113: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
